داڭق تۇعىرىندا

بالۋان داۋلەت نيازبەكوۆ ازيا چەمپيوندىعى اتاعىن قورعاپ قالدى تايلاند استاناسى – بانگكوك قالاسىندا كۇرەس تۇرلەرىنەن كەزەكتى ازيا چەمپيوناتى اياق­تالدى. جارىستىڭ العاشقى كۇن­ى گرەك-ريم كۇرەسىنەن 75 كي­لو سالماق دارەجەسىندە ەل نامىسىن قورعاعان بالۋانىمىز دوسجان قارتىقوۆ قۇرلىق چەمپيونى اتانعانىن بۇعان دەيىن حابارلاعان ەدىك. سوڭعى كۇن دە قازاقستان قۇراماسى ءۇشىن ءساتتى بولدى. اتاپ ايتقاندا, ەركىن كۇرەستەن 61 كيلو سالماقتا سىن­عا تۇسكەن داۋلەت نيازبەكوۆ قورجىنعا التىن مەدال سالدى. وسىلايشا, ول قاتارىنان ەكىنشى رەت ءوز سالماعىندا ازيا­نىڭ مىقتىسى اتانىپ وتىر. وتانداسىمىز العاشقى بەل­دەسۋىندە سيريا سەنىم ارتقان بالۋاندى 10:0 ەسەبىمەن جەڭدى. جارتىلاي فينالدا ءدال وسىنداي ەسەپپەن قىتاي سپورتشىسىنان باسىم ءتۇستى. ال فينالدا يراندىق بەحنام يحسانپۋرمەن كۇش سىناستى. ءار ءادىسىن اقىلعا سالىپ جاساعان بالۋانىمىز ونى دا 10:0 ەسەبىمەن ۇتىپ, ايقىن باسىمدىق تانىتتى. وسى رەتتە داۋلەتتىڭ بىلتىر دوحادا وتكەن ازيا چەمپيوناتىنىڭ شەشۋشى بەلدەسۋىندە دە ءدال وسى يران بالۋانىمەن كەزدەسىپ, جەڭىسكە جەتكەنىن اتاپ وتكەن ءجون. قۇرلىق بىرىنشىلىگىنىڭ جال­پى قورىتىندىسى بويىن­شا قازاقستاندىق بالۋاندار 17 مە­دالعا قول جەتكىزدى. ناقتى ايتار بولساق, گرەك-ريم كۇرەسىنەن – 1 التىن, 1 كۇمىس, 4 قولا, ايەلدەر كۇرەسىنەن – 3 كۇمىس, 2 قولا, ال ەركىن كۇ­رەستەن 1 التىن, 3 كۇمىس ءجا­نە 2 قولا جۇلدە قورجىنعا ءتۇستى. ناتيجەسىندە, قازاقستان قۇراماسى مۇمكىن بولعان 240 ۇپايدان 167 ۇپاي جيناپ, جالپىكوماندالىق ەسەپتە توپ جاردى. بۇل تىزىمدە 2-ورىنعا 144 ۇپايمەن يران قۇراماسى جايعاسسا, ۇزدىك ۇشتىكتى 138 ۇپاي جيعان قىتاي كومانداسى تۇيىندەدى. تاعى ءبىر ايتا كەتەتىن جايت, بالۋاندارىمىزدىڭ بانگ­كوكتەگى تابىسى قۇرامانىڭ سوڭعى 23 جىلداعى ەڭ جوعارى جەتىستىگى رەتىندە تىركەلدى. وسى ۋاقىت ارالىعىندا قۇر­لىق بىرىنشىلىگىندە مۇنداي ءنا­تيجە كورسەتپەگەن قازاقستان بىلتىرعى ازيا چەمپيوناتىندا 12 مەدالمەن شەكتەلگەن بولاتىن. ەلامان قوڭىر, «ەگەمەن قازاقستان».