اۋىلدىقتار ەڭبەك ۇجىمىندا

كەشە «اۋىل» حالىقتىق-دەموكراتيالىق پاتريوتتىق پارتياسى رەسپۋبليكالىق قوعامدىق شتابىنىڭ مۇشەلەرى «الەكساندروۆ» كاسىپورنىنىڭ ەڭبەككەرلەرىمەن جۇزدەستى. ەتتى وڭدەپ, ودان شۇجىق پەن وزگە دە ەت ونىمدەرىن دايىندايتىن وندىرىستىك تسەحتا ۇيىمداستىرىلعان بۇل شارادا «اۋىل» پارتياسىنىڭ مۇشەلەرى كا­سىپ­ورىن قىزمەتكەرلەرىن «اۋىل ءداس­تۇرىن جاڭعىرتامىز» اتتى سايلاۋالدى باعدارلاماسىمەن تانىستىرىپ, ونداعى نەگىزگى باسىمدىقتارعا نازار اۋداردى. ءبىرىنشى كەزەكتە ءسوز العان پارتيا ءتور­اعاسى ءالي بەكتاەۆ اۋىل شارۋاشىلىعى سالاسىنا قاتىستى ماسەلەلەرگە كوبى­رەك توقتالا كەلىپ, «ەلىمىزدىڭ اگرو­ونەر­كاسىپتىك كەشەنىن دامىتۋ, سونىڭ ىشىندە كاسىپكەرلەردى قولداپ, اۋىل-ايماقتارداعى تاۋار وندىرۋشىلەرگە كاسى­بىن كەدەرگىسىز جۇرگىزۋگە جاعداي جاساۋ باستى مىندەتتەرىمىزدىڭ ءبىرى», – دەدى. سون­داي-اق, ول سوڭعى جىلدارى اۋىل مەن اۋىلشارۋاشىلىق سالاسىن قولداۋعا مەملەكەت تاراپىنان ناقتى قادامدار جاسالىپ وتىرعانىن ايتا كەلىپ, بۇل باعىتتا شەشىمىن كۇتكەن تۇيتكىلدەر دە بارشىلىق ەكەنىن جەتكىزدى. سونىمەن قاتار, ءا.بەكتاەۆ پار­تيا­نىڭ وتاندىق اگروونەركاسىپ كەشە­نىن دامىتۋعا باعىتتالعان نەگىزگى مىندەت­تەردى جاقىن كەلەشەكتە جۇزەگە اسىرۋ ماق­ساتىندا ەڭبەكتەنەتىنىن ءمالىم ەتتى. «ءبىزدىڭ پارتيامىزدىڭ بەلسەندىلەرى ءىرى شارۋا قوجالىقتارىن, ۇلكەن كاسىپ­ورىنداردى ارالاپ قانا قويماي, شاعىن كاسىپكەرلەردىڭ دە مۇڭ-مۇقتاجىن تىڭ­داپ, ولاردىڭ قاجەتتىلىكتەرىن وتەۋگە تىرى­سادى. ءبىز ءوندىرىس ورىندارىن ۇلكەن, كىشى دەپ بولمەيمىز. ولاردىڭ بارلى­عىنا بىردەي قارايمىز. ءبىزدىڭ نەگىزگى ماق­ساتىمىز – اۋىلشارۋاشىلىق سالاسىن دامىتۋ جانە وسى باعىتتا كوبىرەك جۇمىس ورىندارىن اشۋ. ءبىز ءۇشىن اتالعان سالاعا كومەك كورسەتۋ ماڭىزدى», – دەدى پارتيا توراعاسى. ال كاسىپورىن قىزمەتكەرلەرى مەن جۇمىسشىلارى دا كەزدەسۋ بارىسىندا ءوز ويلارىن جەتكىزدى. ولاردىڭ ايتۋ­ىن­شا, كاسىپورىن نەگىزگى شيكىزاتتى تەك قازاقستاندىق وندىرۋشىدەن الىپ وتى­رادى. سەبەبى, وتاندىق ءونىمنىڭ ءدامى تۇتىنۋشىعا جاقىنىراق ءارى ارزا­نى­راق. سوندىقتان, كاسىپورىن ەت جەتكى­زەتىن جەرگىلىكتى كاسىپكەرلەردىڭ تۇراقتى قىزمەتىنە مۇددەلى بولىپ وتىر. جيىن بارىسىندا تسەح قىزمەتكەرلەرى مەن جۇمىسشىلارى سايلاۋ ناۋقانىنىڭ ەلىمىز ءۇشىن ماڭىزدىلىعىن جەتە تۇسىنەتىندەرىن جەتكىزە كەلىپ, اۋىل شارۋا­شىلىعى قازاقستاندىق ەكونوميكانىڭ قوزعاۋشى كۇشى بولۋى ءتيىس ەكەنىن, سوندىقتان «اۋىل» پارتياسىنىڭ ساياسي ناۋقاننان تىس قالماعانىن ورىندى دەپ ەسەپتەيتىندەرىن ايتتى. ماسەلەن, تسەح جۇمىسشىسى حاميت شالدانباەۆ «اۋىل» پارتياسىنىڭ باعدارلاماسىنا كوڭىلى تولاتىنىن, وندا وتە ورىندى ماسەلەلەر قامتىلعانىن جەتكىزدى. كەزدەسۋ سوڭىندا پارتيا بەلسەندىلەرى 50 ادامدى جۇمىسپەن قامتىپ وتىرعان كاسىپورىننىڭ جۇمىسىنا ساتتىلىك تىلەدى. جولدىباي بازار, «ەگەمەن قازاقستان».