اتاۋلار اجارىن اشقان اكتسيا

م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىندە وبلىستىق تىلدەردى دامىتۋ باسقارماسىنىڭ ۇيىمداستىرۋىمەن «اتاۋلار سىر شەرتەدى» جوبالار بايقاۋىنىڭ اياسىندا «مەنىڭ كوشەمنىڭ تاريحى» اكتسياسى وتكىزىلدى. اكتسيانىڭ ماقساتى تۋعان ولكەسىنىڭ, ەلدى مەكەندەر مەن كوشەلەردىڭ تاريحى تۋرالى جاستار تانىمىن ارتتىرۋ جانە تاريحتى زەرتتەۋگە ۇلەس قوسۋىن قالىپتاستىرۋ, وبلىستىڭ توپونيميا كەڭىستىگىنە عىلىمي نەگىز جاساۋىنا قاتىستىرۋ بولىپ تابىلادى. شاراعا قاتىسۋشىلارعا «ونو­ماس­تيكا ءتىل ءبىلىمىنىڭ اجىراماس بولىگى» تاقىرىبىندا وبلىستىق تىلدەردى دامىتۋ باسقارماسىنىڭ اتقارعان جۇمىس­تارىن قامتيتىن بەينە روليك ۇسى­نىلدى. اكتسيا اقتوبە قالاسىنداعى پاتساەۆ اتىنداعى كوشەنىڭ تاريحىنا ارنالدى. وبلىستىق قوعامدىق ساياسي كەڭەس توراعاسىنىڭ ورىنباسارى, وبلىستىق ونوماستيكا كوميسسياسىنىڭ مۇشەسى ەركىن قۇر­مانبەك «ماڭگىلىك ەل – مۇراتىمىز» اتتى تاقىرىپتا, وبلىستىق پلانەتاري ديرەكتورىنىڭ ورىنباسارى بيبىگۇل مۇستافينا جەرلەسىمىز كوسموناۆت-ۇشقىش ۆ.پاتساەۆتىڭ ءومىر جولى جايلى اسەرلى اڭگىمەلەدى. جينالعاندار ۆ.پاتساەۆ تۋرالى «زۆەزدنىي پۋت ۆيكتورا پاتساەۆا» دەپ اتالاتىن بەينە-روليكتى تاماشالادى. ق.جۇبانوۆ اتىنداعى وڭىرلىك مەملەكەتتىك ۋنيۆەرسيتەتتىڭ تاريح فاكۋلتەتىنىڭ ستۋدەنتى بانۋ جۇمانازاروۆا «اقتوبە كوشەلەرىنىڭ تاريحى تۋرالى», اقتوبە قالاسىنداعى ن.نازارباەۆ زياتكەرلىك مەكتەبىنىڭ وقۋشىسى ايبار شايمۇحانوۆ «حازىرەت مەڭدىعاليەۆ اتىنداعى كوشە» دەگەن تاقىرىپتاردا ءوز زەرتتەۋ ماتەريالدارىن كوپشىلىككە ۇسىندى. اكتسياعا قاتىسۋشىلار ماڭگىلىك ەلدىڭ ءوز وتانىمىزدان باستالاتىنىن, وعان جاستاردىڭ بەلسەندى اتسالىسۋى, وتانسۇيگىشتىك, پاتريوتتىق تاربيە باعىتىندا وي قوزعادى. جاستاردىڭ «اتاۋلار سىر شەرتەدى» جوباسىنا قاتىسۋشىلار سانى جىل سايىن ارتىپ كەلەدى. بۇل جوباعا 2013 جىلى 120 جاس, 2015 جىلى 203 ستۋدەنتتەر مەن مەكتەپ وقۋشىلارى قاتىسىپ ەلدى مەكەندەر مەن كوشەلەر اتاۋلارىن زەرتتەدى. 2013 جىلى بايقاۋعا 67 جوبا, 2015 جىلى 86 جوبا ساراپقا سالىندى. اكتسيا اياسىندا جوبالار بايقاۋىنىڭ جەڭىمپازدارى ق.جۇبانوۆ اتىنداعى وڭىرلىك مەملەكەتتىك ۋنيۆەرسيتەتىنىڭ ستۋدەنتى نۇربولات تىلەگەنوۆكە, اقتوبە قالاسىنداعى №9 مەكتەپ-گيمنازياسىنىڭ 8-سىنىپ وقۋشىلارى دانيل رەزياەۆ پەن ديانا روگوزنيكوۆاعا باس جۇلدە, اقشالاي سىيلىقتار تابىس ەتىلدى. سونىمەن بىرگە, «مەملەكەتتىك ءتىلدىڭ قولدانىلۋ اياسىن كەڭەيتۋگە, قازاقستاندىق رۋحاني بىرلىكتى قالىپتاستىرۋعا زور ۇلەس قوسقانى ءۇشىن» نوميناتسياسى بويىنشا جاستاردى اسكەري-پاتريوتتىق رۋحتا تاربيەلەۋ ماقساتىندا مەكتەپتەردە جاۋىنگەرلىك داڭق مۇراجايلارىن اشىپ, گەرمانيا جانە اۆستريا جەرىندە قازا تاپقان قازاقستاندىقتاردى «ەستەلىك» كىتابىنان ىرىكتەۋ ىسىندەگى ەڭبەگى ءۇشىن «فلوت باۋىرلاستىعى» قوعامدىق ۇيىمىنىڭ توراعاسى مارات سەرداليەۆ, وڭىردەگى جەر-سۋ اتاۋلارىن تاريحي تۇرعىدان رەتتەۋ ىسىندە جۇيەلى جۇمىستى ۇيىمداستىرعانى ءۇشىن وبلىستىق تىلدەردى دامىتۋ باسقارماسىنىڭ ءبولىم باسشىسى المات پانگەرەەۆ, ەل ءۇشىن قازا تاپقان جاۋىنگەرلەردىڭ سۇيەكتەرىن تۋعان جەرىنە جەتكىزىپ, ەسىمدەرىن ۇلىقتاپ, ۇرپاق جادىندا جاڭعىرتۋداعى پاتريوتتىق تاعىلىمى ءۇشىن «قازاقستان رەسپۋبليكاسى اۋعانستان ارداگەرلەرىنىڭ وداعى» قوعامدىق ۇيىمى اقتوبە فيليالىنىڭ باسشىسى گۋمەر گالەەۆ, قازاق ءتىلىن وقىتۋ ادىستەمەسىن حالىقارالىق دەڭگەيدە ناسيحاتتاعانى ءۇشىن اقتوبە قالاسىنداعى №9 ورتا مەكتەپ-گيمنازيانىڭ قازاق ءتىلى مەن ادەبيەتى ءپانىنىڭ مۇعالىمى نۇرگۇل قادىروۆا اقشالاي سىيلىقتارمەن ماراپاتتالدى. وبلىستىق تىلدەردى دامىتۋ باسقارماسى الداعى جىلدارى بۇل جوبانى اقتوبە وڭىرىمەن شەكارالاس اۋداندارداعى ەلدى مەكەندەردىڭ اتاۋلارىنىڭ تاريحىن زەرتتەۋگە ارناماق. جوبا قازاق, ورىس جانە اعىلشىن تىلدەرىندە جۇرگىزىلەتىن بولادى. ساتىبالدى ءساۋىرباي, «ەگەمەن قازاقستان». اقتوبە وبلىسى.