قاڭعىباس-ميلليونەر

ورال قالاسىنداعى قاڭعىباستارعا ارنالعان ۋاقىتشا بەيىمدەۋ ورتالىعىنىڭ تۇرعىنى ۆلاديمير رادكەۆيچ 2 ميلليون رۋبل ۇتىپ, ءبىر-اق كۇندە ميلليونەر بولىپ شىعا كەلدى. ءارتۇرلى باسىلىمعا جاريالانعان سكانۆوردتاردى شەشۋگە قۇمار ول مول بايلىققا دا وسى قۇپيا سوزدەردىڭ جاۋابىن تابۋ ارقىلى كەنەلىپ وتىر. ءوزىنىڭ ايتۋىنشا, كەزەكتى رەت سكانۆوردى بار گازەت ساتىپ العانىندا, باسىلىم بەتىنەن قورعانىش قاباتىمەن جاسىرىنعان كودتىڭ بارىن بايقاعان. شارت بويىنشا ول كودتى كورسەتىلگەن تەلەفون نومىرىنە قوڭىراۋ شالىپ, حابارلاۋ كەرەك ەكەن. بۇل جونىندە قوماقتى ۇتىس يەسىنىڭ ءوزى بىلاي دەيدى: «مەن ولارعا حابارلاسىپ, جاسىرىنعان كودتى ايتتىم. ال تۇرعىلىقتى مەكەن-جايىم رەتىندە بەيىمدەۋ ورتالىعىن كورسەتتىم. كەيىن ورتالىققا قاعاز كەلدى. وندا كومپيۋتەردىڭ تاڭداۋى ارقىلى مەنىڭ ەكى ميلليون رۋبل ۇتقانىم جايىندا ايتىلعان. سونداي-اق, ۇتىستى الۋ ءۇشىن قانداي قۇجاتتاردى راسىمدەۋ كەرەكتىگى دە تۇسىندىرىلگەن. مەن بارلىق ءتيىستى قۇجاتتى جيناپ, ولار كورسەتكەن مەكەنجايعا جىبەردىم». بۇل وقيعانى الاياقتاردىڭ كەزەكتى ايلاسى دەپ بولجاعان عالامتور قول­دانۋ­شى­لارىنا ا.رادكەۆيچتىڭ ايتار ءۋاجى بار. ونىڭ سوزىنە قاراعاندا, كەل­گەن حاتتا ءبىر جەرگە اقشا جىبەرۋ, تەلەفون نومىرىنە بىرلىك سالۋ نەمەسە قىمبات باعاعا تاۋار ساتىپ الۋ تۋرالى مىندەتتى تالاپتار ايتىلماعان. «ەگەر بىرەۋلەر ايتقانداي, بۇل الاياقتىق بولسا, كوڭىلىم باياعىداي. سەبەبى, شىعىندالىپ, ەش جەرگە اق­شا جىبەرگەم جوق. ال ۇتقانىم راس بولسا, ول اقشاعا ءبىرىنشى كەزەكتە وزىمە باسپانا ساتىپ الامىن», – دەگەن ۆ.رادكەۆيچ كورسەتىلگەن تالاپتار بويىنشا اقشانىڭ ءساۋىر ايىندا قولىنا ءتيۋى ءتيىس ەكەنىن اتاپ ءوتتى. ايتا كەتەيىك, قازىرگى باعاممەن 2 ميلليون رۋبل 9 ميلليوننان استام تەڭگەگە تەڭ.   تەمىر قۇسايىن, «ەگەمەن قازاقستان». ورال.