جاپون ەلشىسىمەن ەكىجاقتى اڭگىمە

قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا جاپونيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ماسايوسي كاموحارامەن ونىڭ ديپلوماتيالىق ميسسياسىنىڭ اياقتالۋىنا وراي كەزدەسۋ وتكىزدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. تاراپتار ەكىجاقتى ساۋدا-ەكو­نوميكالىق ىنتىماقتاستىقتىڭ قازىرگى دامۋ قارقىنىنا قانا­عات­تانۋشىلىق ءبىلدىردى. وتكەن 10 جىل ىشىندە ءبىزدىڭ ەكونوميكامىزعا سالىنعان جاپون ينۆەستيتسياسىنىڭ مولشەرى 4,5 ميلليارد دوللاردان استى. 2015 جىلى قازاقستان مەن جاپونيا اراسىنداعى تاۋار اينالىمى 1,4 ميلليارد دوللار بولدى (ەكسپورت – 858,6 ميلليون, يمپورت – 584,7 ميلليون دوللار). 2014 جىلى قوستانايدا «تويوتا» ماركالى ماشينا قۇراستىرۋ زاۋىتى ىسكە قوسىلدى. قازاقستاندا 50-گە جۋىق بىرلەسكەن كاسىپورىن تىركەلگەن, 700 ميلليون دوللاردان اساتىن بىرلەسكەن 6 جوبا ءجۇ­زە­گە اسىرىلعان. قۇنى 700 ميل­ليون تەڭگە بولاتىن تاعى 10 جوبا ناق­تى­لانۋدا. مەملەكەتتىك حاتشى قا­زاق­ستان مەن جاپونيا يادرولىق قا­رۋ­سىز­دانۋ جانە تاراتپاۋ, سونداي-اق, اتوم ەنەرگياسىن بەيبىت ماقساتتا پاي­دالانۋ ءىسى جونىنەن جاقىن وداق­­تاس ەكەنىن اتاپ ءوتتى. 2015 جىل­­عى اقپاندا قازاقستان مەن جاپو­­نيا ۆەنادا يادرولىق سىناق­تار­دى جاپپاي توقتاتۋ تۋرالى شارت ۇيىمىنىڭ وتىرىسىندا كون­فەرەن­تسيانىڭ 2015-2017 جىلعى كەزەڭىندەگى تەڭ توراعالارى بولىپ سايلاندى. گ.ابدىقالىقوۆا جوعارى دەڭ­گەيدە, سونىمەن بىرگە, ىسكەر توپتار اراسىندا تىعىز ساياسي بايلانىس­تار جانە ءجيى دەلەگاتسيالار الماسىپ وتىرۋ ءوزارا جان-جاقتى ءىس-قيمىل ءۇشىن جاڭا كوكجيەكتەر مەن پەرسپەكتيۆالارعا جول اشاتىنىنا سەنىم ءبىلدىردى. مەملەكەتتىك حاتشى كەزدەسۋ سوڭىندا م. كاموحاراعا بەلسەندى ءارى جەمىستى قىزمەتى, قازاقستان مەن جاپونيا اراسىنداعى دوستىقتى نىعايتۋعا قوسقان ۇلەسى ءۇشىن ريزاشىلىعىن ءبىلدىرىپ, يگىلىك پەن تابىس تىلەدى.