اۋىل – سارقىلماس بۇلاعىمىز

سەمەي قالاسىنداعى ابايدىڭ مەملەكەتتىك قورىق-مۇراجايىندا «اۋىل» حالىقتىق-دەموكراتيالىق پاتريوتتىق پارتياسىنىڭ سايلاۋالدى شتابى اقىن, جازۋشى, ونەر, مادەنيەت وكىلدەرىنىڭ قاتىسۋىمەن ارنايى اكتسيا وتكىزدى. اكتسياعا قاتىسۋشىلار ەڭ الدىمەن مۇراجايدىڭ الدىندا ورنالاسقان اباي ەسكەرتكىشىنە گۇل شوقتارىن قويىپ, اقىن رۋحىنا تاعزىم ەتتى. شارا بارىسىندا «اۋىل» پارتياسىنىڭ توراعاسى ءالي بەكتاەۆ: – ەل پرەزيدەنتى نۇرسۇلتان نازارباەۆ حالىققا «ماڭگىلىك ەل» ۇلتتىق يدەياسىن جاريا ەتتى. وسى تۇرعىدا ءبىز اۋىلدى مادەني تەتىكتى ساقتاپ قالۋعا قابىلەتتى مورالدىق جانە ادامگەرشىلىك ءداستۇردىڭ وزەگى دەپ تانيمىز. اۋىل ءبىزدىڭ ءداستۇرلى قۇندىلىقتارىمىزدىڭ قاينار كوزى, ءتۇپ-تامىرى, سارقىلماس بۇلاعى! – دەدى. – «اۋىل» پارتياسىنىڭ باستى ماقساتى – حالقىمىزدىڭ ءداستۇرلى قۇندىلىقتارىن دامىتۋ, وتانىمىز قازاقستاننىڭ تاۋەلسىزدىگىن باياندى ەتۋ بولىپ تابىلماق, – دەدى پارتيا مۇشەسى, بەلگىلى جازۋشى, مەملەكەتتىك سىيلىقتىڭ لاۋرەاتى الىبەك اسقاروۆ. – قازاقتىڭ ءتۇپ-تامىرى اۋىلدا. «اۋىل – التىن بەسىگىمىز» دەيتىنىمىز دە سوندىقتان. بۇگىندە حالىقتىڭ نەگىزگى بولىگى قالادا تۇرعانىمەن, قازاقستاندى اۋىلسىز ەلەس­تەتۋ مۇمكىن ەمەس. پارتيامىزدىڭ باستى قاعيداسى دا اگرارلىق سەكتوردىڭ سەرپىندى جۇمىس ىستەۋىنە جاعداي جاساۋ. پارتيا پرەزيدەنتتىڭ ستراتەگياسىن, سىندارلى دەموكراتيانى, قوعام مەن مەم­لەكەتتىڭ ساياساتىن جاقتايدى. پار­تيا اۋىل شارۋاشىلىعىنىڭ جوعا­رى قارقىنمەن جان-جاقتى دامۋىن قول­دايدى, وسىعان اتسالىسادى. – ەكونوميكاداعى وڭ وزگەرىستەر ەڭ الدىمەن اۋىلدىقتاردىڭ الەۋمەتتىك جاعدايىنان, تۇرمىس كۇيىنەن كورىنىس تابۋى ءتيىس, –دەدى اقىن تىنىشتىقبەك ابدىكاكىم. – مەملەكەت قازىناسىنا مول تابىس ءتۇسىرىپ جاتقان اۋىل شارۋا­شىلىعىنىڭ ونىمدەرى ارقاشان ماڭىزدى. مال ونىمدەرىنىڭ بارلىعى اۋىلدا وندىرىلەدى. قازاق مالىنىڭ ەتى ساپالى ەمەس دەپ كىم ايتادى؟ ولاي بولسا, ءوز ەلىمىزدى وزىمىزدەن شىعاتىن ونىمدەرمەن تولىق قامتاماسىز ەتۋىمىز كەرەك. اۋىل جاستارىنا بيزنەستەرىن اشۋعا جاعداي جاساۋىمىز كەرەك. بۇدان ءبىراز بۇرىن «ديپلوممەن – اۋىلعا!» جوباسى قولعا الىنىپ, كوپتەگەن جاس ماماندار اۋىلعا بارىپ, پاتەرمەن قامتىلىپ, ەڭبەك ەتە باستادى. اۋىلعا سەرپىن بەرەتىن وسىنداي باعدارلامالار كەرەك-اق. جيىن بارىسىندا ءسوز العان قو­عام قايراتكەرى, عالىم, ەكونوميكا عى­لىم­دارىنىڭ دوكتورى, پروفەس­سور, قازاق­ستان يننوۆاتسيالىق ۋنيۆەر­سي­تەتىنىڭ پرەزيدەنتى نادىربەك ءاپسا­لياموۆ بىلاي دەدى: – ءبىز اۋىل جاستارىنىڭ ساپالى ءبىلىم الۋىنا قول جەتكىزۋىمىز كەرەك. اۋىلداعى مەكتەپتەردىڭ ماتەريالدىق-تەحنيكالىق بازاسى قالاداعىلارمەن تەڭدەس بولۋى ءتيىس. اۋىلداردى تازا سۋمەن قامتاماسىز ەتۋ باعدارلاماسىنىڭ ورىندالۋىن قاداعالاۋ قاجەت. اۋىلداعى تۇرمىسى تومەن وتباسىلاردى ەڭبەككە ورنالاستىرىپ, ولاردىڭ قاتارعا قوسىلىپ كەتۋىنە اتسالىسۋ كەرەك. «اۋىل» پارتياسىنىڭ وسى باعىتتاعى ءىس-ارەكەتتەرىن قولدايتىن ازاماتتار قا­تارىنىڭ دا كوپ بولاتىنىنا سەنىم بىلدىرەمىز. ەلباسىمىزدىڭ جولداۋىندا اتالعان بارلىق مىندەتتەمەلەردى بىرلەسە وتىرىپ, ويداعىداي شەشەتىندىگىمىزگە ءۇمىتىمىز زور. قازاقستان ەۋرازيالىق ستراتەگيالىق جاعدايىن پايدالانا وتىرىپ, بۇل عاسىردا الەمدىك قوعامداستىقتا ءوزىنىڭ لايىقتى ورنىن الادى دەپ ويلايمىز. بۇگىندە اگروونەركاسىپ كەشەنى ەلىمىزدى يندۋستريالاندىرۋدىڭ وزەگى بولۋعا قابىلەتتى. بيداي, ماقتا, جەمىس-جيدەك ءوسىرۋ, ءوندىرۋ ارقىلى ىشكى نارىقتى قامتاماسىز ەتۋگە مۇمكىندىك مول. بۇعان تۇبەگەيلى قولداۋ قاجەت. اۋىل شارۋاشىلىعىن مەم­لەكەتتىك قولداۋ دەڭگەيى الەمنىڭ الدىڭعى قاتارلى مەملەكەتتەرىمەن بىردەي دەڭگەيدە بولعانى دۇرىس. جيىندا «اۋىل» پارتياسىنىڭ مۇشەلەرى مەن جاقتاستارى بۇگىنگى اۋىل شارۋاشىلىعىنىڭ وزەكتى ماسەلەلەرىن كەڭىنەن ءسوز ەتتى. جيىن سوڭىندا سەمەي ءوڭىرىنىڭ ونەر مايتالماندارى اۋىل تاقىرىبىنا ارنالعان جىر-ولەڭدەرىن جۇرتشىلىق نازارىنا ۇسىندى. راۋشان نۇعمانبەكوۆا, جۋرناليست. سەمەي.