ءوڭىر چەحيامەن بايلانىسقا دايىن

وبلىس اكىمى بەردىبەك ساپارباەۆ چەحيانىڭ قازاقستانداعى توتەنشە جانە وكىلەتتى ەلشىسى ەليشكا جيگوۆا­مەن كەزدەستى. كەزدەسۋدى قىسقاشا ءسوز سويلەپ اشقان ءوڭىر باسشىسى ەلشىنىڭ ايماقتارمەن تانىسىپ, ءوزارا ىنتىماقتاسا جۇمىس ىستەۋگە جاساپ وتىرعان قادامىنا ساتتىلىك تىلەدى. بەردىبەك ماشبەك ۇلى چەحيا ەل­شى­­لىگىنىڭ دەلەگاتسياسىنا ءوڭىردىڭ ەكو­نوميكالىق-الەۋمەتتىك دامۋ باعىت­تارىن تانىستىرىپ ءوتتى, ەكى ەلدىڭ ءبىر­لە­سىپ جۇمىس ىستەۋ مۇمكىندىكتەرىنە توقتالدى: – اقتوبە – توعىز جولدىڭ تورابىنا ورنالاسقان, ۇستىمەن تەمىرجول, تاس جول جانە اۋە جولى وتەتىن قاتىناس قۋاتى مول ءوڭىر. ءبىزدىڭ وبلىس اۋماعىمەن «باتىس ەۋروپا –باتىس قىتاي» حالىقارالىق كولىك ءدالىزى وتەدى. ەلباسىنىڭ تاپسىرماسىمەن استانامەن ايماقتاردى بايلانىستىراتىن كۇرە جولدار سالىنۋدا, بيىل «اقتوبە – اتىراۋ» تاس جولىنىڭ قۇرىلىسى باستالادى. مىنە, مۇنىڭ ءبارى ءوڭىردىڭ كولىك-لوگيستيكالىق مۇمكىندىگىن ايعاقتاسا كەرەك. بۇل قارىم-قاتىناس جانە جۇك تاسىمالى ءۇشىن قولايلى. سونداي-اق, وڭىردە شاعىن جانە ورتا بيزنەستى دامىتۋدىڭ دا ءمۇم­كىندىكتەرى مول, ينۆەستيتسيا سالۋعا تارتىمدىلىعى ءوز الدىنا. ءبىز چەحيا كاسىپكەرلەرىنىڭ ءبىزدىڭ وڭىردە ءوز ىستەرىن اشۋلارىنا, ينۆەستيتسيا سالۋلارىنا مۇددەلىمىز. ءسىزدىڭ ەلدە شىنى ءوندىرىسى, مەديتسينا سالاسى, اۆتوموبيل جاساۋ, سۋ تازارتۋ قوندىرعىلارىن شىعارۋ جاقسى دامىعانىن بىلەمىز. سوندىقتان دا وسى باعىتتاردا جۇمىس ىستەۋ قايتارىمدى بولاتىنىنا سەنىمدىمىز. اسىرەسە, ءبىزدى مەديتسينا سالاسىنداعى جەتىستىكتەرىڭىز قىزىقتىرادى. ءبىزدىڭ وبلىستا مەدي­تسينالىق كلاستەر قۇرۋعا باعىت ۇستالۋدا. وعان قاجەتتى العىشارتتار بارشىلىق. مەديتسينا كادرلارىن دايارلايتىن ىرگەلى جوعارى وقۋ ورنى – مارات وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتى, ونكولوگيا جانە «دارۋ» وڭالتۋ ورتالىقتارى, وسى زامانعى وزىق مەديتسينالىق قون­دىر­عىلارمەن جاراقتاندىرىلعان وبل­ىس­تىق ەرەسەكتەر جانە بالالار اۋرۋحانالارى تەك وبلىس تۇرعىندارىنا عانا ەمەس, ەلىمىزدىڭ باتىس وڭىرلەرىنە ساپالى مەديتسينالىق قىزمەت كورسەتەدى. قازىردىڭ وزىندە وبلىستا اسا كۇردەلى بۇيرەك جانە باۋىر اۋىستىرۋ وتالارى جاسالادى. جاقىندا وڭتۇستىك كورەيا جانە تۇركيا ماماندارىمەن وسى باعىتتا جۇمىس جاساۋعا بايلانىستى كەلىسىمدەر جاسالدى. بۇعان چەحيا ماماندارى دا قاتىسسا قۇبا-قۇپ بولار ەدى, – دەدى وبلىس اكىمى. ءوز كەزەگىندە ءسوز العان چەحيا ەل­شىسى ەليشكا جيگوۆا ءوزى ەلشى بو­لىپ كەلگەننەن بەرى قازاقستانعا دەگەن قىزىعۋشىلىعى باسىلماعانىن, ەلدەگى تۇراقتىلىققا ءتانتى ەكەنىن ايتتى. ول, سونداي-اق, پرەزيدەنت ن.نازارباەۆپەن كەزدەسۋ بارىسىندا ايماقتارمەن جۇمىس ىستەۋ قاجەتتىگىنە كەڭەس بەرگەنىن تىلگە تيەك ەتە كەلىپ, بۇگىنگى كەزدەسۋدى وسى باعىتتاعى جۇمىستىڭ باستاۋى رەتىندە باعالادى. بۇل جولى كاسىپكەرلىك سالاسىندا ناقتى جوبالارمەن جۇمىس ىستەۋگە كەلگەندەرىن, وسى باعىتتاعى ءوزارا بايلانىس پەن قارىم-قاتىناستى تەرەڭدەتۋگە قولداۋ كورسەتەتىنىن جەتكىزدى. چەحيانىڭ قازاقستانداعى جانە ورتا ازياداعى جوبالارىنىڭ اكىمشىسى انتوني كوفشتاين ناقتى كاسىپكەرلەرمەن جۇمىس ىستەۋگە ىنتالى ەكەندىكتەرىن تاعى ءبىر ەسكە سالىپ ءوتتى. قازىردىڭ وزىندە ەكى اقتوبەلىك كاسىپكەردىڭ چەحيامەن جۇمىس ىستەۋدى باس­تاپ كەتكەنىن ايتتى. مىسالى, «كونتاكت» كومپانياسى چەحيالىق ارىپتەستەرىمەن كەلىسسوزدار جۇرگىزۋدە ەكەن. ول وبلىس بيزنەسمەندەرىمەن بولاتىن كەزدەسۋدە كاسىپكەرلىك سالاسىنداعى ىسكەرلىك بايلانىستى دامىتۋدىڭ وزەكتى ماسەلەلەرىن تالقىلاپ, بىرلەسىپ جۇمىس ىستەۋگە قادام­دار جاسالاتىنىن, ءوز ۇسى­نىستارىن ورتاعا سالاتىنىن جەتكىز­دى. بەردىبەك ساپارباەۆ كەزدەسۋ سوڭىندا وڭىردە چەحيانىڭ وكىلدىگى اشىلىپ جاتسا, قولداۋ-كومەك كور­سەتۋگە ءازىر ەكەنىن مالىمدەدى. ساتىبالدى ءساۋىرباي, «ەگەمەن قازاقستان». اقتوبە وبلىسى.