ىلكىمدىلىك

«كاسىپتىڭ كوزىن تاپقان – ءومىردىڭ ءوزىن تابادى». ەجەلدەن كەلە جاتقان وسى ءتامسىلدىڭ ومىرشەڭ­­­­دىگىنە كۇن سايىن كوز جەتكىزەمىز. اسىرەسە, ءدال قازىرگىدەي الماعايىپ كەزەڭدە الدەبىر كاسىپتى اشىپ, ونىڭ جۇمىسىن جۇيەلەپ, نارىقتاعى باعىت-باعدارىن ايقىن­داپ, دوڭگەلەتىپ اكەتۋ دەگەنىڭىز ۇلكەن كۇش. ونىڭ ۇستىنە, الىپساتارلىقتىڭ دا داۋرەنى ءوتىپ بارادى. سوندىق­تان وندىرىسپەن اينالىسۋ ءتيىمدى بولىپ تۇر. ءىرى دەمەي, ۇساق دەمەي, ءوندىرىس سالاسىن دامىتساق, وندا شاعىن جانە ورتا بيزنەستىڭ دە كوركەيەتىنى اقيقات. جاقىندا قىزىلوردالىق كا­سىپ­كەر ايكەنجە مۇقانوۆا نان ءونىم­دەرىن شىعاراتىن كاسىپورىن اشتى. بۇل ىستە كاسىپكەرگە مەملەكەت تاراپىنان دا قولداۋ بولدى. ايكەنجە مۇقانوۆا ءوز بيزنەسىن ەكى جىل بۇرىن باستاعان. «بيزنەستىڭ جول كارتاسى-2020» باعدارلاماسى اياسىندا نەسيە رەسىمدەپ, جۇبايى ەكەۋى «سەردتسە توميريس» بالا­باقشاسىن اشقان. بۇل يدەيا كا­سىپكەرلەر وتباسىنداعى ءۇش بالاسىن بىردەي بالاباقشاعا ورنالاستىرۋدى ويلاستىرعاندا كەلگەن ەكەن. بيزنەستە تاجىريبەلەرى جوق بولسا دا, ءوز كاسىبىن اشسام دەگەن ىنتاسى بار ازاماتتار تەز ارادا ءوز كاسىپتەرىن دوڭگەلەتىپ اكەتكەن. وسىلايشا, ءىسى العا باسقان كاسىپكەر ەندىگى جەردە جۇ­مىس اۋقىمىن جان-جاقتى كەڭەي­تۋدى جوسپارلاپ, «دامۋ» قو­رىنا كەڭەس الۋعا جۇگىنەدى جانە باستاۋىش كاسىپكەر رەتىندە «Damu Start-up» باعدارلاماسى ارقىلى نەسيە رەسىمدەۋگە كەڭەس الدى. كوپ ويلانباستان شەشىم قابىلداعان ا.مۇقانوۆا «دامۋ» قورىنىڭ 70 پايىز كەپىلدەندىرۋى ارقاسىندا ناۋبايحانا قۇرىلىسىنا 20 ميلليون تەڭگە نەسيە رەسىمدەپ, بۇگىندە ءوندىرىس نىسانى ءوز ەسىگىن ايقارا اشىپ, قىزمەت كورسەتۋدە. – ناۋبايحانامىزدىڭ اشىل­عانىنا ءالى كوپ بولماسا دا, جۇمىسىمىز قارقىندى ءجۇرىپ جاتىر. تاۋلىك بويى قىزمەت كورسەتەمىز جانە ءبىرىنشى كەزەكتە ساپالى ءارى ءدامدى ءونىمدى شىعارۋدى ماقسات ەتەمىز. كاسىپورىندا ناننىڭ بىرنەشە ءتۇرىن ءدامدى ەتىپ ازىرلەيتىن ناعىز بىلىكتى ماماندار جۇمىس جاسايدى. ازىرگە ءبىز تەك 7 جۇمىس ورنىن اشتىق, الايدا, جوسپارىمىزدا ناۋبايحانا ىشىنەن كونديتەرلىك ونىمدەردى شىعارۋ باعىتىن ىسكە قوسىپ, جۇمىس ونىمدىلىگىن ارتتىرۋدى كوزدەيمىز. بۇل دا بولسا جاڭا جۇمىس ورىندارىن اشۋعا ءوز سەپتىگىن تيگىزەرى ءسوزسىز. كەزىندە بالاباقشانى اشقانىمىزدا, تاجىريبەمىز از بولسا دا نەگىزگى ماقساتىمىزعا جەتەمىز دەگەن ويىمىز بيزنەستىڭ جاڭا كەزەڭىن جۇزەگە اسىرۋعا اكەلدى جانە ءبىز تابىسقا جەتەتىنىمىزگە سەنىمدىمىز. جۇمىس بەرۋشى رەتىندە وتباسىڭ مەن قاراماعىڭداعى ادامداردىڭ الدىندا ۇلكەن جاۋاپكەرشىلىكتى ارقالايتىنىڭ انىق. سوندىقتان ءوز بيزنەسىڭدى كەدەرگىلەر مەن قيىن­دىقتارعا قاراماستان جۇزەگە اسىرۋ تاباندى ەڭبەكتى قاجەت ەتەدى,– دەيدى كاسىپكەر. ەرجان بايتىلەس, «ەگەمەن قازاقستان». قىزىلوردا وبلىسى.