اۆستراليالىق تەررورلىق ارەكەتكە كەنگۋرۋدى پايدالانباق بولدى

استانا. 28 قاڭتار. اۆستراليادا «يسلام مەملەكەتى» لاڭكەستىك ۇيىمىنىڭ مۇشەسى كەنگۋرۋدى پايدالانىپ تەررورلىق ارەكەت جاساماق بولعان. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. وتكەن جىلى لاڭكەستىك ارەكەت جاساماق بولدى دەگەن ايىپپەن تۇتقىندالعان 19 جاستاعى اۆستراليالىق سەۆدەت رامادان بەسيم مەلبۋرن سوتى الدىندا جاۋاپ بەرۋدە. وعان ءتورت بىردەي باپ بويىنشا, ونىڭ ىشىندە پوليتسيا قىزمەتكەرىن ءولتىرىپ, باسىن شاۋىپ تاستاماق بولعان دەگەن ايىپ تاعىلعان. سوت كەزىندە ايىپتاۋشى تاراپ ىسكە قاتىستى تاعى ءبىر قىزىقتى جايتتى حابارلادى. قۇقىق قورعاۋ ورگاندارىنىڭ ماتەريالدارىنا قاراعاندا, كۇدىكتى لاڭكەستىكتى قولدايتىن جاقتاستارىمەن ينتەرنەتتە لاڭكەستىك ارەكەت كەزىندە كەنگۋرۋدى پايدالانۋ تۋرالى جوسپاردى تالقىلاعان. ول كەنگۋرۋدىڭ ىشىنە جارىلعىش زاتتى بايلاپ قويىپ, اڭ تەرىسىنە «يسلام مەملەكەتى» لاڭكەستىك توبىنىڭ بەلگىسىن سالىپ قويماق بولعان. وسىلايشا كۇدىكتى اڭدى پوليتسيا قىزمەتكەرلەرىنىڭ جانىنا قويا بەرىپ, جارىپ جىبەرگىسى كەلگەن. سەۆدەت رامادان بەسيم بۇل قىلمىستى لاڭكەستىك ۇيىم ناسيحاتىنىڭ اسەرىنە ەرىپ جوسپارلاعان دەگەن جورامال دا بار. سەبەبى, بۇل توپقا يسلام وقۋلارىن ءدىني تۇرعىدان ءتۇسىندىرۋ ءتان بولىپ كەلەدى. تاعىلعان ايىپتارعا جاۋاپ بەرە وتىرىپ سوتتالۋشى ءوزىن كىناسىز دەپ سانايتىنىن مالىمدەگەن. ەستەرىڭىزگە سالا كەتەيىك, سەۆدەت رامادان بەسيم وتكەن جىلى 18 ساۋىردە مەلبۋرننىڭ وڭتۇستىگىندە پوليتسيا قىزمەتكەرلەرى وتكىزگەن لاڭكەستىككە قارسى ءىس-شارا كەزىندە تۇتقىندالعان بولاتىن. ول كەزدە بەس ادام كۇدىككە ىلىنگەن. قۇقىق قورعاۋ ورگاندارىنىڭ دەرەكتەرىنە سايكەس, ونىڭ ەكەۋى اۆستراليادا 25 ءساۋىر كۇنى سوعىس پەن اسكەري قاقتىعىستار كەزىندە قازا بولعان ارداگەرلەردىڭ قۇرمەتىنە وراي وتەتىن اۆستراليالىق-جاڭازەلانديالىق اسكەري كورپۋسى كۇنى لاڭكەستىك ارەكەت جاساماق بولعان. ەلامان قوڭىر. دەرەك: تاسس. سۋرەت: AP Photo.