اجالىنا استىق جەتتى

ايدىڭ-كۇننىڭ امانىندا ءبىر وتبا­سىنىڭ وتاناسى اجال قۇش­تى. قارابالىق اۋدانىنداعى «ستان­تسيوننىي» جاۋاپ­كەرشىلىگى شەكتەۋلى سەرىكتەستىگىنىڭ استىق ساقتايتىن بۋنكەرىندە جۇمىسشى بولىپ ىستەيتىن 45 جاستاعى ۆالەنتينانىڭ اجالى استىقتان بولادى دەپ كىم ويلاعان؟ سول كۇنى وعان بۋنكەردىڭ تولعان-تول­ماعا­نىن باقىلاپ تۇرۋ تاپسىرىلعان ەكەن. جانىنداعى سەرىكتەس جۇمىسشى تەمەكى شەگۋگە سىرتقا شىعىپ كەتكەندە, ۆالەنتينا پودنىشەۆا استىق قۇيىلىپ جاتقان تەرەڭ قۇبىرعا قۇلاعان. دەرەۋ بايقاعان اينالاسىنداعىلاردىڭ ونى اجال تىرناعىنان قۇتقارام دەپ تىپىرلاعانىنان ەشتەڭە شىقپاعان. ويتكەنى, توقپەن جۇمىس ىستەپ تۇرعان وندىرىستىك ءىرى قۇرىلعىلاردان, تەرەڭ قۇبىردان الىپ شىعۋعا ەشكىمنىڭ دارمەنى جەتپەگەن. مارقۇمنىڭ دەنەسىن اۋداندىق توتەنشە جاعداي بولىمشەسىنىڭ قىزمەتكەرلەرى كەلىپ, شىعارىپ العان. قازىر كوپتەگەن اۋىلشارۋاشىلىق كا­سىپ­ورىندارىندا ءوزىنىڭ استىق ساقتايتىن بۋنكەرلەرى بار. قارابالىق اۋدانىنداعى «ستانتسيوننىي» جاۋاپكەرشىلىگى شەكتەۋلى سەرىكتەستىگى دە استىعىن پريۋرالسكوە سەلوسىندا ورنالاسقان استىق بۋنكەرىندە ساق­تايدى. قىس ايلارىندا استىعىن ساتاتىن شارۋاشىلىقتار ونى بۋنكەردەن كولىكتەرگە تيەيدى نەمەسە تازالاۋ جۇ­مىستارى ءجۇرىپ جاتادى. ونىڭ بارلىعى دا شەتەلدەردەن اكەلىپ قۇراستىرىلعان ءىرى وندىرىستىك قۇرىلعىلاردان تۇرادى. استىق قۇيىلىپ جاتقان تەرەڭ قۇبىردىڭ ىشىندەگى شاڭنان جانە سۋسىعان استىق دەنەسىن باسىپ قالعاندىقتان ايەلدىڭ تىنىسى ءبىتىپ قالسا كەرەك. ول استىق قۇيىلىپ جاتقان قۇبىر ىشىنە ابايسىزدا ءوزى قۇلاپ كەتتى مە, الدە باسقاداي سەبەپ بولدى ما, ونى ءتيىستى ورىندار ءالى انىقتاعان جوق. ايتەۋىر ايلا تاپتىرماس اجال سول كۇنى بەيباق ۆالەنتينانى نىساناسىنا الىپتى. ءنازيرا جارىمبەتوۆا, «ەگەمەن قازاقستان». قوستاناي وبلىسى, قارابالىق اۋدانى.