اتىراۋدا اناسىن بالاعاتتاعان ەر ادامعا ۇكىم شىقتى

اتىراۋ. 27 قاڭتار. اتىراۋ وبلىسىنىڭ قۇلسارى قالاسىندا جەرگىلىكتى تۇرعىن ءوز اناسىنا ءزابىر كورسەتكەنى ءۇشىن 100 ساعاتقا قوعامدىق جۇمىسقا تارتىلدى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ەلىمىزدەگى شاعىن قالانىڭ ءبىرى – قۇلسارىدا تۇراتىن سوقتالداي جىگىت باسقا ەمەس, ءوزىن 9 اي قۇرساعىندا كوتەرىپ, ايالاعان اناسىنا ءتىل تيگىزىپتى. ارينە, ول ۇيىنە اراق ءىشىپ كەلىپ, ماس كۇيىندە اناسىن ەش سەبەپسىز بوقتاپ-بالاعاتتاپ, سۇيرەلەۋمەن شەكتەلمەي, بەتىنەن تەۋىپ, سوققى دا جاساعان. بالاسىنان بوقتىق ءسوز ەستىپ, سوققى جەۋ انا ءۇشىن وڭاي ەمەس, ول قورعانۋ ماقساتىندا بەتىن الاقانىمەن جاۋىپ قالعان. بالاسىنىڭ ورەسكەل ارەكەتىنەن ابدەن كوڭىلى قالىپ, جۇرەگىنە قاياۋ تۇسكەن انا سوتقا جۇگىنەدى. ويتكەنى, اناسىنىڭ سوتتا ءمالىم ەتكەنىندەي, بالاسى كۇن سايىن ۇيىنە اراق ءىشىپ كەلەدى ەكەن. ءوزى ءوسىپ-ونگەن شاڭىراعىنىڭ شىرقىن بۇزىپ, بەرەكەسىن كەتىرەتىن بالاسىن جازالاۋدى وتىنەدى. راس, سوت وتىرىسىندا كىنالى ءوز كىناسىن تولىق مويىندادى. ءسويتىپ, «بالامنىڭ تابانىنا قادالعان شوڭگە ماڭدايىما قادالسىن» دەپ, ەسەيسە دە ايالاۋىن ايامايتىن اناسىنان كەشىرىم سۇرادى. تاراپتاردىڭ ۋاجدەرىن تىڭداعان جىلىوي اۋداندىق سوتى كىنالىنى قىلمىستىق كودەكستىڭ 108-بابىمەن ايىپتى دەپ تانىپ, 100 ساعاتقا قوعامدىق جۇمىسقا تارتۋ جونىندە ۇكىم شىعاردى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. سۋرەت: rbc.ua.