بىلتىر استانادا رەكوردتىق دەڭگەيدە باسپانا بەرىلدى

استانا. 27 قاڭتار. بۇگىن ورتالىق كوممۋنيكاتسيالار قىزمەتىندە استانا قالاسى اكىمىنىڭ ءبىرىنشى ورىنباسارى سەرگەي حوروشۋننىڭ قاتىسۋىمەن «2015 جىلى ەلوردانىڭ قۇرىلىس سالاسىندا اتقارىلعان جۇمىس قورىتىندىلارى تۋرالى» تاقىرىبىندا بريفينگ ءوتتى. بۇل تۋرالى قالا اكىمدىگىنىڭ رەسمي سايتى astana.gov.kz-كە سىلتەمە جاساعان egemen.kz ءتىلشىسى حابارلادى. «وتكەن جىلدىڭ قورىتىندىسىنا سايكەس قۇرىلىس جۇمىستارىنىڭ كولەمى 472 ملرد. تەڭگەنى قۇراپ, 1759 مىڭ شارشى مەتر باسپانا پايدالانۋعا بەرىلدى. بۇل – ەلوردا تاريحىنداعى ەڭ جوعارى كورسەتكىش. پايدالانۋعا بەرىلگەن باسپانا كولەمى 2014 جىلعى كورسەتكىشپەن سالىستىرعاندا 146 پايىزعا ارتىق», – دەدى قالا اكىمىنىڭ ءبىرىنشى ورىنباسارى. وتكەن جىلى جالپى اۋدانى 2371 مىڭ شارشى مەتردى قۇرايتىن 1135 ءارتۇرلى نىسان پايدالانۋعا بەرىلدى. سونىمەن قاتار, 107 الەۋمەتتىك نىسان, سونىڭ ىشىندە ارقايسىسى 1200 ورىندىق جالپى ءبىلىم بەرەتىن 4 مەكتەپ, 1720 ورىندىق 8 بالاباقشا تاپسىرىلدى. بۇعان قوسا, 250 كەرەۋەت-ورىندىق بالالار جۇقپالى اۋرۋلار اۋرۋحاناسى, مەديتسينالىق-الەۋمەتتىك ساۋىقتىرۋ ورتالىعى, سول جاعالاۋدا 500 كەلۋشىگە ارنالعان امبۋلاتوريالىق-ەمحانالىق كەشەن, پرەزيدەنت ءىس باسقارماسىنىڭ كلينيكالىق-وڭالتۋ كەشەنى سياقتى دەنساۋلىق ساقتاۋ نىساندارى پايدالانۋعا بەرىلدى. «قولجەتىمدى باسپانا-2020» مەملەكەتتىك باعدارلاماسى شەڭبەرىندە 343 مىڭ شارشى مەتر, سونىڭ ىشىندە ەسكى جانە اپاتتى جاعدايداعى ۇيلەردى بۇزۋ پيلوتتىق جوباسى اياسىندا 151 مىڭ شارشى مەتر باسپانا پايدالانۋعا بەرىلدى. وسى رەتتە پيلوتتىق جوبا باستالعالى بەرى اپاتتى جاعدايداعى ۇيلەردە تۇرعان وتباسىلارعا 1762 پاتەر تەگىن بەرىلگەنىن اتاپ وتكەن ءجون. بەكىتىلگەن كەستەگە سايكەس, جوبانىڭ 1-كەزەڭىن تولىق جۇزەگە اسىرۋ 2017 جىلدىڭ ەكىنشى جارتىسىندا اياقتالادى. يندۋستريالدى پارك اۋماعىندا 27 وندىرىستىك نىسان پايدالانۋعا بەرىلىپ, 2735 جاڭا جۇمىس ورنى اشىلدى. «جالپى ەكونوميكالىق كونيۋنكتۋرا دامۋىنىڭ تۇراقسىزدىعىنا قاراماستان, 2016 جىلى ەكونوميكانىڭ قۇرىلىس سالاسىنداعى ءوسۋ قارقىنىن كەمىندە 104 پايىز كولەمىندە ساقتاپ قالامىز دەپ جوسپارلاپ وتىرمىز», – دەدى سەرگەي حوروشۋن. ونىڭ ايتۋىنشا, اكىمدىك قولدا بار قارجىلىق رەسۋرستاردىڭ ازدىعىنا بايلانىستى حالىقارالىق قارجى ۇيىمدارىمەن, سونىڭ ىشىندە مەملەكەتتىك-جەكە مەنشىك سەرىكتەستىك تەتىكتەرىن پايدالانۋ ارقىلى قارىز بەن نەسيە تارتۋ ماقساتىندا جۇمىستار جۇرگىزۋدە. بۇل باعىتتا وسى جىلدىڭ وزىندە 960 ورىندىق 4 بالاباقشا, 4 امبۋلاتوريالىق ەمحانا, 4 پاركينگ قۇرىلىسى جوبالارىن باستاۋ جوسپارلانىپ وتىر. بۇگىندە استانا قالاسىندا قۇرىلىس كەزەڭىندە 2591, جوبالاۋ كەزەڭىندە 1195 نىسان جۇزەگە اسىرىلۋدا. استانا قالاسى اكىمىنىڭ ءبىرىنشى ورىنباسارى «قازاقستان رەسپۋبليكاسىنداعى ساۋلەت, قالا قۇرىلىسى جانە قۇرىلىس قىزمەتى تۋرالى» جانە «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭدارىن بۇزۋعا جول بەرگەن ەلوردادا تۇرعىن ءۇي كەشەندەرىن سالۋشىلارعا قاتىستى جاعدايعا ەرەكشە توقتالىپ ءوتتى. بۇل جونىندە ول: «بۇل ماسەلە اكىمدىك پەن ۆەدومستۆوارالىق كوميسسيا مۇشەلەرىنىڭ ءجىتى باقىلاۋىندا. وتكەن جىلى قۇرىلىس بويىنشا 909 بۇزۋشىلىق, پاتەرلەردى زاڭسىز ساتۋ بويىنشا 37 دەرەك انىقتالىپ, ولار بويىنشا مەملەكەتتىك ورگاندار تاراپىنان دەر كەزىندە ءتيىستى شارالار قابىلداندى», – دەدى. سونىمەن قاتار سەرگەي حوروشۋن: «وتكەن جىلى ءبىز ءوز بەتىنشە قۇرىلىس جۇرگىزۋگە قاتىستى بۇزۋشىلىقتاردى ەڭ تومەنگى كورسەتكىشكە دەيىن ازايتتىق. كەزەكشى جوسپارعا سايكەس جەكەلەگەن وقيعالار انىقتالىپ وتىرادى. بۇگىنگى كۇنى قۇرىلىس سالۋشىلار ءوز بەتىنشە سالا باستاعان نىسانداردىڭ قۇرىلىسىن سوت شەشىمىمەن توقتاتىپ, كەيىن قىمبات ايىپپۇلدار تولەگەنشە زاڭمەن بەلگىلەنگەن تارتىپتە رۇقسات قاعازدارىن الىپ جۇمىس ىستەگەن ءتيىمدى ەكەنىنە كوز جەتكىزدى», – دەدى. ەلامان قوڭىر. دەرەك, سۋرەت: astana.gov.kz.