مالايزيادا لاڭكەستىك ۇيىمعا قاتىسى بار 7 كۇدىكتى ۇستالدى

استانا. 26 قاڭتار. مالايزيانىڭ پوليتسيا قىزمەتكەرلەرى راديكالدى ايماقتارداعى لاڭكەستەرگە قاتىسى بار 7 ادامدى تۇتقىنعا الدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. «ۇستالعانداردىڭ جاس مولشەرى 26-50 جاس ارالىعىندا. ولاردىڭ ءبارى ەكسترەميستىك ۇيىمدارعا قاتىسى بار ەكەنى انىقتالدى. ارنايى جاساق بۇگىن جانە وتكەن جۇما كۇنى كۋالا-لۋمپۋر قالاسى مەن بىرنەشە پروۆينتسيالاردا تەرگەۋ جۇمىستارىن جۇرگىزدى. قولعا تۇسكەندەر ءارتۇرلى ستراتەگيالىق نىسانداردا جوسپار بويىنشا, لاڭكەستىك ارەكەتتەرىن جاساۋعا نيەتتەنگەن», – دەيدى مالايزيانىڭ پوليتسيا باسشىسى حاليد ابۋ باكار. ول سونداي-اق, قولعا تۇسكەندەردىڭ ءبىرى قاۋىپتى ايماقتاردا سوعىسىپ جۇرگەن سودىرلاردان بۇيرىق العانىن, سونىمەن قاتار سول ۋاقىتتا تاعى ءبىر كۇدىكتىنىڭ يندونەزيالىق باحرۋما نايما ەسىمدى ازاماتتان تاپسىرما العانىن اشكەرەلەدى. يندونەزيانىڭ قۇقىق قورعاۋ ورگاندارى جاقىندا دجاكارتادا جاسالعان شابۋىلعا ءدال وسى سودىردىڭ تىكەلەي قاتىسى بار دەپ سانايدى. ايتا كەتەيىك, مالايزيانىڭ پرەمەر-ءمينيسترى نادجيب رازاك لاڭكەستەر ۇيىمىنا قاتىسى 129 سودىردىڭ قاماۋعا الىنعانىن مالىمدەگەن بولاتىن. ونىڭ ايتۋىنشا, راديكالدى ايماقتاردا سوعىسىپ جۇرگەن 55 مالايلىقتىڭ بۇگىندە 17-ءسى قازا تاپقان. ايان ءابدۋالي. دەرەك: تاسس. سۋرەت: zn.ua.