تىنىق مۇحيت تابانى ءتۇسىپ كەتتى

بۇل جايت امەريكا تۇرعىندارىنىڭ زارەسىن الىپ وتىر سوڭعى جىلدارى الەۋمەتتىك جەلىلەردە امەريكا قۇرلىعىنىڭ ءبىر بولىگىن تاسقىن سۋدىڭ باسىپ قالاتىنى تۋرالى قاۋەسەت جەلدەي ەسىپ تۇر. الايدا, اقش-تىڭ ورە­گون شتاتىنىڭ تۇرعىندارى كەشەدەن بەرى تىنىق مۇحيتتىڭ ءوز جەرىمەن شەن­دەسىپ جاتقان جاعالاۋىنان سۋ قاشىپ بارا جاتقانىن ايتىپ, جۇرتتى تاعى دۇرلىكتىرە باستادى. ۇرەيگە بوي الدىرعان كوپشىلىك مۇحيت دەڭگەيىنىڭ ادەپكى كۇنى – 14, كەلەسى كۇنى 96 سانتيمەترگە دەيىن ءتۇسىپ كەتكەنىن جەتكىزدى. وسىدان مۇحيت ايدىنىنداعى №46404 بەلگىسى كورىنىپ قالعان. مۇندايدىڭ بولۋى ابدەن مۇمكىن, دەسەدى عالىمدار. تەك بۇل جاعدايدا حۋان دە فۋكا مەن سول­تۇستىك امەريكا اراسىندا ورنالاسقان سۋ استىنداعى ءۇستىرت كورىنىپ قالۋى كەرەك. سول كەزدە مۇحيت اۋماعىندا جەر سىلكىنىسى ورىن الىپ, اسا قۋاتتى تسۋنامي كوتەرىلەدى. تاپ سونداي كورىنىس 1700 جىلى بولعان ەكەن. سونىڭ سالدارىنان سولتۇستىك امەريكانىڭ باتىس جاعالاۋىنان كوپتەگەن شاقىرىمعا دەيىن سۋ قاشقان. ەندەشە, جاعالاۋ تۇرعىندارىنىڭ ۇرەيگە بوي الدىرۋلارى بەكەر ەمەس. راس, جەرگىلىكتى بيلىك سول بويدا بۇ­دان قورقاتىن ەشتەڭە جوق ەكەنىن ءبىلدىرىپ, جۇرتتىڭ تولقۋىن باسۋعا ارە­كەت ەتتى. ول بەلگىنىڭ كورىنىپ قالۋى ءجو­نىندەگى الىپ-قاشتى اڭگىمەنى جۋرنا­ليستەر سكرينشوت ارقىلى دايىنداپ, ويدان شىعارىپ جۇرگەن بوستەكى ءتىر­لىككە جاتقىزا سالدى. ال رەسمي ورگان­دار ازىرگە جۇمعان اۋىزدارىن اشار ەمەس. بۇل وتقا ماي قۇيا تۇسكەننەن باسقا ەش­تەڭە اكەلە قويمادى. قازىر جۇرتتىڭ ورەكپىگەن كوڭىلىن باسىپ, مازاسىز حالگە ۇرىندىرماي تۇرعان ءبىر عانا نارسە بار. ول سوڭعى بىرنەشە كۇننىڭ ىشىندە ەشقانداي اپاتتى وزگەرىستەر ورىن الىپ, امەريكانىڭ سولتۇستىك-باتىس جاعالاۋى «جالا­ڭاشتانا» قويماعانىنا, سونداي-اق, جاقىنداپ كەلە جاتقان تسۋ­ناميدىڭ ەكپىنى بايقالمايتىنا سايادى. جۋرناليستەر بيلىك تاراپىنان قولداۋ تاپپاعاننان كەيىن جاعدايدى ءتۇسىندىرىپ بەرۋدى سۇراعان اقش-تىڭ كورنەكتى سەيس­مولوگ-عالىمى دجون ۆيدال وقيعاعا مى­ناداي باعا بەردى. سۋ دەڭگەيىنىڭ اي­تارلىقتاي ءتۇسىپ كەتكەنى قانشالىقتى شىندىق بولعانىمەن, اسا ءبىر قورقىنىش اكەلەتىندەي ەشتەڭە دە جوق. مۇنىڭ بۋي-بەلگى ەلەكترونيكاسى جۇمىسىنداعى ول­قىلىق قانا بولۋى دا ىقتيمال. مۇرات ايتقوجا.