ماڭىزى جوعارى زاڭ جوبالارى

ءماجىلىس توراعاسى ورال مۇحامەدجانوۆتىڭ جەتەكشىلىگىمەن وتكەن پالاتانىڭ سارسەنبى كۇنگى پلەنارلىق وتىرىسىنىڭ كۇن تارتىبىندە جەتى ماسەلە قارالدى. دەپۋتاتتار وسى جالپى وتىرىس بارىسىندا اگرارلىق ماسەلەلەر جونىندەگى كوميتەت قۇرامىنا ت.يبراەۆتى سايلادى. زاڭ جوبالارىن قاراۋ بارىسىن­دا “2010-2012 جىلدارعا ارنالعان رەسپۋبليكالىق بيۋدجەت تۋرالى” زاڭعا وزگەرىستەر مەن تولىقتىرۋلار ەنگىزۋ جونىندەگى زاڭ جوباسى قىزۋ تالقىلانىپ بارىپ ماقۇلداندى. سونىمەن, 2010 جىلعا ارنالعان رەسپۋبليكالىق بيۋدجەتتىڭ تۇسىمدەرى 3517,8 ميلليارد تەڭگە كولەمىندە بەلگىلەندى. ال شىعىس بولىگى 4321,4 ميلليارد تەڭگە نەمەسە ىشكى جالپى ءونىمنىڭ 22,4 پايىزىنا تەڭ بولدى. تاپشىلىق 803,6 ميلليارد تەڭگەنى قۇرادى. 2010 جىلدىڭ قاڭتار-تامىز ايلارى ارالىعىنداعى ينفلياتسيا 4,6 پايىزدى قۇراسا, جىل سوڭىنا دەيىن ول 6,5 پايىزعا جەتەدى دەپ كۇ­تىلۋدە. جالپى, ينفلياتسيا دەڭگەيى 6-8 پايىز ارالىعىندا جوسپار­لانىپ وتىر. سونداي-اق دەپۋتاتتار “اقشا بەل­گىلەرىن قولدان جاساۋعا قارسى كۇرەس جونىندەگى حالىقارالىق كون­ۆەنتسيانى جانە وعان حاتتامانى را­تي­فيكاتسيالاۋ تۋرالى” زاڭ جوبا­سىن ماقۇلداۋدى ۇيعاردى. كونۆەن­تسيا­عا كوپتەگەن ەلدەر كىرسە, ولار­دىڭ ىشىندە اۆستريا, اقش, ۇلى­بريتانيا, بەلگيا, فينليانديا, ليۋكسەمبۋرگ, قىتاي, جاپونيا جانە رەسەي بار ەكەندىگىن ايتا كەتكەن ءجون. قۇجاتتا قاتىسۋشى مەم­لەكەتتەردىڭ اقشا بەلگىلەرىن قولدان جاساۋعا قارسى كۇرەس سالا­سىندا (شەتەلدە جاسىرىنىپ جۇرگەن دايىنداۋشىلار مەن وتكىزۋشىلەردى ىزدەستىرۋگە جانە ۇستاپ بەرۋگە) قۇقىقتىق كومەك كورسەتۋ كوزدەلگەن. سونداي-اق “قازاقستان رەس­پۋبليكاسىنىڭ ۇكىمەتى مەن تاجىكستان رەسپۋبليكاسىنىڭ ۇكىمەتى اراسىنداعى وتەۋسىز اسكەري كومەك كورسەتۋ تۋرالى كەلىسىمدى راتيفيكاتسيالاۋ تۋرالى” زاڭ جوباسى دا دەپۋتاتتار قولداۋىنا يە بولدى. كەلىسىمگە 2009 جىلدىڭ 10 قاراشاسىندا قول قويىلىپ, ۋاكىلەتتى ورگاندار بولىپ ەكى ەلدىڭ قورعانىس مينيسترلەرى بەكىتىلگەن-ءتىن. بەرىلەتىن م ۇلىك تىزبەسى مەن سانى كەلىسىم قوسىمشاسىندا كورىنىس تاپقان. اسقار تۇراپباي ۇلى.