مالدارىگەرلىك شارالارعا جوعارى ماڭىز

كەشە استانادا ەۋروپا بويىنشا حالىقارالىق ەپيزووتيكالىق بيۋرونىڭ ايماقتىق كوميسسياسىنىڭ 24-ءىنشى كونفەرەنتسياسى ءوز جۇمىسىن باستادى. ءۇش كۇنگە سوزىلاتىن حالىقارالىق جيىننىڭ اشىلۋىنا پرەمەر-مينيستر كارىم ءماسىموۆ قاتىستى. حالىقارالىق كونفەرەنتسيا جۇمىسىنا ەۋروپا, تمد, بالتىق جاعالاۋى ەلدەرى مەن 22 حالىقارالىق ۇيىم وكىلدەرى, سونىمەن قاتار, ۆەتەريناريانىڭ سالاسىندا قىزمەت ەتەتىن وتاندىق ماماندار قاتىسۋدا. فورۋمنىڭ اشىلۋىندا ءسوز سويلەپ, جيىنعا قاتىسۋشىلار جۇمىسىنا ساتتىلىك تىلەگەن ۇكىمەت باسشىسى ك.ءماسىموۆ بۇگىنگى تاڭدا اۋىل شارۋاشىلىعىنىڭ ىشكى جال­پى ونىمىندەگى مال شارۋاشىلىعى ونىمدەرى ۇلەسىنىڭ 43 پايىزدى قۇ­رايتىندىعىن, سونىمەن قاتار, مال شارۋاشىلىعى ونىمدەرىنىڭ ەلىمىز­دىڭ ىشكى سۇرانىسىن بەلگىلى ءبىر ءدا­رەجەدە قامتاماسىز ەتىپ وتىرعان­دى­عىن ايتتى. سونداي-اق ول قازاق­ستاننىڭ تابيعي-كليماتتىق جاع­دايى مەن اۋقىمدى تابيعي جايى­لىم­دىق جەرىنىڭ بولۋى سالانى ءارى قاراي دامىتۋعا جاعداي جاساپ, ەكو­لو­گيالىق تازا مال ونىمدەرىنىڭ بار­لىق تۇرلەرىن وندىرۋگە جول اشا­تىندىعىن دا نازاردان تىس قال­دىرمادى. حەب پرەزيدەنتى ك.كورەا جيىن­نىڭ باستى ماقساتى الەمدە جوعارى دەڭگەيدە ۆەتەرينارلىق قىزمەتتى قامتاماسىز ەتۋ بولىپ تابىلاتىن­دىعىن ايتا كەلە, قازاقستان مەم­لەكەتى باسشىلارىنىڭ قولداۋىمەن ۇيىمداستىرىلىپ وتىرعان حەب-ءتىڭ ايماقتىق 24-ءىنشى كونفەرەنتسيا­سى­نىڭ اسا ماڭىزدى ماسەلەلەردى قام­تىپ وتىرعانىن تىلگە تيەك ەتتى. سو­نىمەن قاتار, ۇيىم توراعاسى حەب-ءتىڭ ستراتەگيالىق جوسپارىنا توق­تا­لا كەلە, مۇندا نەگىزىنەن ۆەتەري­نار­لىق قىزمەتتەردى كۇشەيتۋدىڭ جا­ھاندىق جوسپارى قامتىلعانىن دا ايتتى. ەلىمىز اۋىل شارۋاشىلىعى مينيسترلىگىنىڭ باستاماسىمەن جانە حالىقارالىق ەپيزووتيكالىق بيۋ­رو­نىڭ قامقورلىعىمەن بۇل باسقوسۋ قازاقستاندا تۇڭعىش رەت ۇيىمداس­تىرىلىپ وتىر. قازاقستان بيۋروعا 1995 جىلدان بەرى مۇشە. ەلىمىزدە ۇيىمداستىرىلىپ وتىرعان كون­فەرەنتسيا جۇمىسى نەگىزىنەن اتال­مىش حالىقارالىق ۇيىمعا قاتى­سۋشى مەملەكەتتەر اراسىندا ۆەتە­رينارلىق قىزمەت بويىنشا ۇستا­نىمداردى كۇشەيتۋ, شەكارالىق ۆەتەرينارلىق باقىلاۋدىڭ ءتيىمدىلى­گىن ارتتىرۋ, جانۋارلاردىڭ ايرىق­شا قاۋىپتى اۋرۋلارى بايقالعان جاعدايدا الدىن الۋ شارالار مەن ەسكەرتۋ جۇمىستارىن ۇيىمداستىرۋ, سونداي-اق ءتيىستى ءىس-شارالار قا­بىلداۋ جونىنەن ىنتىماقتاستىقتى ارتتىرۋ ماقساتتارىن كوزدەيدى. وسى ماقساتتا حالىقارالىق ەپيزووتيكا­لىق بيۋرو كوميسسياسىنىڭ ساني­تارلىق كودەكسىنىڭ جاڭارتىلعان نۇسقاسى دا تالقىلاندى. بۇل قۇجات­تا جانۋارلار ساۋلىعىن قورعاۋ, ترانسشەكارالىق اۋرۋ نەگىزدەرى بويىنشا ەپيزووتيكالىق جاعدايدى ساراپتاۋ شارالارى قامتىلعان. ءابدىراحمان قىدىربەك.