مايا مانەزا — ەكى دۇركىن الەم چەمپيونى

جاقسى حابار جەردە جاتقان  با, كۇنى كەشە تۇركيانىڭ انتاليا قالاسىندا اۋىر اتلەتيكادان ءوتىپ جاتقان الەم چەمپيوناتىندا ەلىمىزدىڭ ءانۇرانىن شىرقاتقان, سەرپە كوتەرۋدە الەم رەكوردىن جاڭارتقان مايا مانەزانىڭ جەڭىسى قازاقستاندىقتاردى ۇلكەن قۋا­نىش­قا كەنەلتتى. وتكەن جىلى وڭ­تۇستىك كورەيانىڭ گويانگ قالاسىندا وتكەن الەم بىرىنشىلىگىندە مايا مانەزا العاش رەت الەم چەمپيونى اتانعان ەدى. ءوڭىر حالقى سول كەزدە ونى قۇشاق جايا قارسى الىپ, ال­داعى ۋاقىتتا دا جەڭىس تۇعىرىنان كورىنۋىنە تىلەكتەستىك بىلدىرگەن-ءدى. سول اق تىلەك اللانىڭ قۇلاعىنا شالىنىپتى. ەلىمىزدىڭ كوكبايراعى مەن ءان­ۇرانىن شەت ەلدىڭ اسپانىندا شال­قىتقان سپورتشىلارعا دەگەن ەرەك­شە قامقورلىعىمەن تانىلعان وب­لىس اكىمى سەرىك ۇمبەتوۆ چەم­پيون­دارعا تالدىقورعان قالاسىنان ەكى بولمەلى پاتەردىڭ كىلتى مەن قوماقتى قارجى تاپسىرىپ, ءبىز ءسىز­دەردى ءالى تالاي الەم بىرىنشىلىگىندە تۇعىردان تۇسپەيدى دەپ سەنەمىز دە­گەنى كەشەگى قۋانىشتى كۇنى ويعا ورالدى. حالقىمىز “جاقسى ءسوز – جارىم ىرىس” دەپ بەكەر ايتپايدى ەمەس پە. مەرەيلى ساتكە بايلانىستى وب­لىستىق تۋريزم, دەنە تاربيەسى جانە سپورت باسقارماسى وليم­پيا­لىق سپورت تۇرلەرى جانە سپورت رە­زەرۆتەرى ءبولىمىنىڭ باستىعى مۇحيت تۇرسىنباەۆپەن حابارلاسقانى­مىز­دا وسى ۇجىمداعى استا-توك قۋا­نىشقا كۋا بولدىق. – تۇندە “حاباردان” الماتى وب­لىسىنىڭ سپورتشىسى مايا مانە­زا انتالياداعى الەم چەم­پيوناتىندا ايەلدەر اراسىندا 63 كيلو سالماق دارەجەسىندە جۇلقا كوتەرۋدە 105 كيلو, سەرپە كوتەرۋدە ءوزىنىڭ وتكەن جىلعى كورەياداعى الەم رەكوردىن جاڭارتىپ, 143 كيلو زىلتەمىر كوتەردى. جارىس قورىتىن­دىسىندا الەم چەمپيونى اتانىپ, ەلىمىزگە تاعى ءبىر التىن سىيلادى, – دەدى م.تۇرسىنباەۆ. – قازاقستاندى الەمگە تا­نى­تىپ, ەكى مارتە الەم چەمپيونى  اتان­عان مايا مانەزانى وقىرمان­دارعا جاقىنىراق تانىستىرساڭىز. – ءبىز مايادان ۇلكەن ءۇمىت كۇتە­مىز. ول قازىر 24 جاستا عانا. اۋىر اتلەتيكادان الەم چەمپيوندارى اتانعان ۆلاديمير سەدوۆ, سۆەتلانا پودوبەدوۆا, زۋل­فيا چينشانلو, مايا ما­نە­زا­نىڭ جەڭىسىنە وتكەن جىلى  بار­شا­مىز قول سوقساق, مىنە, تۇرىك ەلىنەن دە قۋانىشتى حابار جەتتى. قىتاي­دىڭ كۋانس ەلدى مەكە­نىن­دە ومىرگە كەلگەن دۇنگەن قىزى,  الدىنا قوي­عان ماقساتىنا جەت­كەن­شە تىن­باي­تىن ەڭبەكقور بولعان­دىق­تان, تاعى دا وتكەن جىلعى تابىسىن قاي­تالادى. قازىرگى كەزدە قازاقستان قۇراما كومانداسىنىڭ ساپىندا نامىستى قولدان بەرمەي, ءاردايىم جاتتىق­تىرۋشىسى ۆيكتور نيمەن بىرگە قارسىلاستارىنان الدا بولۋ ءۇشىن ەڭبەكتەنۋدە. ول لوندوندا وتەتىن 2012 جىلعى جازعى وليمپيادادا اۋىر اتلەتي­كا­دان ەل مەرەيىن تاسى­تا­تىن­داردىڭ بىرىنەن سانالادى. ءتۇر­كيادا ونەر كورسەتىپ جاتقان سپورتشىلارىمىز الەم چەمپيوناتىنان تاعى دا قۋا­نىش­تى حابار جەتكىزەدى دەگەن ۇمىتتەمىز. الەم رەكوردىن جاڭارتقان جەر­لەسىمىزدىڭ جەڭىسى قۇتتى بول­سىن. مەرەي تاسىتاتىن سپورت­شى­لاردىڭ قۋانىشتى حابارىن ەستۋگە جازسىن, دەيمىز شىن جۇرەكتەن. كۇمىس مەدالعا تۇرىك قىزى سي­بەل سيمسەك يە بولدى. ونىڭ جي­ىن­تىق ەسەبى 241 كگ. (111+130). دە­گەن­مەن, چەمپيونات يەسىنىڭ دە وسال ەمەس ەكەنىن ايتا كەتۋ كەرەك. ول ەكىنشىسىندە –  135, ءۇشىنشى جولى 136 كگ. سالماقتى باسىنان اسىرا تىك كوتەرگەنىمەن, اياعىن تەڭ ۇستاپ تۇرا الماي, زىلتەمىردى تاستاپ جىبەرۋگە ءماجبۇر بولدى. ەگەر ول سوڭعى – 136 كگ. سالماقتى باعىن­دىر­عاندا دا, ءبىزدىڭ مايا 143 كگ. زىلتەمىردى  ەركىن كوتەرىپ, قانداي جاعدايدا دا ەسە جىبەرمەيتىنىن ايقىن كورسەتتى. ال ءۇشىنشى ورىنعا قىتايلىق زىلتەمىرشى قىز ويان كسەفان يە بولدى.  ونىڭ كورسەتكىشى دە 141 كگ. (112+129). بىراق ول تۇركىلىك شتانگاشىدان جەكە سالماعى بوي­ىن­شا ءسال اۋىرلاۋ بولىپ شىقتى. وسى جەردە اتاپ ايتاتىن تاعى ءبىر ءجايت – مايا مانەزا جۇلدەلى ورىن­دارعا تالاسۋشىلار اراسىندا ەڭ جەڭىلى ەدى. سوندىقتان وعان چەمپيون اتانۋ ءۇشىن العاشقى كوتەرگەن 136 كگ. دا جەتكىلىكتى بولاتىن (105+136-241). كۇمىسجان بايجان. الماتى وبلىسى.