الماتىدا ءVى حالىقارالىق “ەۋرازيا” كينوفەستيۆالى باستالدى
كەشە الماتىدا التىنشى رەت “ەۋرازيا” حالىقارالىق كينوفەستيۆالى م.لەرمونتوۆ اتىنداعى مەملەكەتتىك ورىس دراما تەاترىندا بۇكىل ءسان-سالتاناتىمەن شىمىلدىعىن ءتۇردى. سان رەت سىنالىپ, مىنەلسە دە ورتالىق ازيانىڭ ايشىقتى وقيعالارىنىڭ بىرىنە اينالىپ ۇلگەرگەن كينوفەستيۆال داستۇرگە ساي الەمگە ايگىلى كينو ساڭلاقتارىن قازاق جەرىندە توعىستىردى. ال بايقاۋ باعدارلاماسىندا سوڭعى كەزدە تۇسىرىلگەن وتاندىق فيلمدەر باق سىنايتىن بولادى.
بيىلعى فەستيۆالدىڭ ايتۋلى قوناقتارىنىڭ اراسىندا سوڭعى كەزدە قازاقستانعا ءجيى جولى ءتۇسىپ جۇرگەن جەرار دەپاردە, “تەلوحرانيتەل” ءفيلمى ارقىلى تانىس امەريكالىق اكتەر كەۆين كوستنەر, اتى “تيتانيك” ءفيلمى ارقىلى شىققان ۋيليام زەين, رەسەي كينوجۇلدىزدارى – اندرەي مەرزليكين, لاريسا گولۋبكينا, ليۋدميلا چۋرسينا, يرينا كۋپچەنكولار بار. ەكى بىردەي “وسكار” سىيلىعىن العان اكتەر ءارى كينورەجيسسەر كەۆين كوستنەر قازاق جەرىندە ءوزىنىڭ مۋزىكالىق توبىمەن ونەر كورسەتەتىن بولادى.
اتالمىش فەستيۆال ادەتتەگىدەي رەسپۋبليكا سارايىندا ەمەس, ورىس دراما تەاترىنا كوشسە, فەستيۆالدىڭ ءباسپاسوز ورتالىعى دا بيىل “Almaty Towers” اتتى كەلىسكەن كەشەنگە اۋىستى. العاشقى ءباسپاسوز ءماسليحاتىندا ش.ايمانوۆ اتىنداعى “قازاقفيلم” اق پرەزيدەنتى ەرمەك امانشاەۆ, ءVى حالىقارالىق “ەۋرازيا” كينوفەستيۆالىنىڭ ارت-ديرەكتورى گۇلنارا ابىكەەۆا بيىلعى كينوبايقاۋدىڭ جاي-جاپسارى تۋرالى جان-جاقتى باياندادى. جۋرناليستەرمەن كەزدەسۋگە ء“Unىfrance” كومپانياسىنىڭ ورتالىق ازيا جانە شىعىس ەۋروپا ەلدەرى بويىنشا جەتەكشى مامانى جوەل شاپرون قاتىستى. مۇنىڭ دا ءوز ءجون-جوسىعى بار. باعدارلامادا “حالىقارالىق بايقاۋ”, “قازاقستاندىق پانوراما”, “گالا-پرەمەرالاردان” بولەك, “بۇگىنگى فرانتسۋز كينوسى” اتتى ءبولىم جۇمىس ىستەيدى.
جۇزدەسۋ كەزىندە جوەل شاپرون ءوز كومپانياسىن بۇرىنعى مەمكينومەن سالىستىردى, سەبەبى ء“Unىfrance” كومپانياسى دا فرانتسۋز كينەماتوگرافياسىن شەتەلدەردە ناسيحاتتاۋ ىسىمەن اينالىسادى ەكەن. الايدا, ەلىمىزدە قازىرگى تاڭدا ءتۇسىرىلىپ جاتقان تۋىندىلارعا كورەرمەندەردىڭ ىنتاسى ارتىپ كەلە جاتقانىنا قاراماستان, بۇل قىزمەت بىزدە كەنجەلەپ تۇرعانى دا ءسوز بولماي قالعان جوق.
سونىمەن بيىلعى “ەۋرازيا” كينوفەستيۆالىندە قازاقستان, قىرعىزستان, رەسەي, وزبەكستان, تاجىكستان, تۇركيا ەلدەرىنەن بايقاۋعا ۇسىنىلعان 32 ءفيلمنىڭ ىشىنەن 12 كارتينا باس جۇلدە ءۇشىن باق سىنايتىن بولادى. جالپى, اپتا بويى الماتىنى دۋمانعا بولەيتىن كينوبايقاۋدا كوپشىلىك قىرىققا تارتا كينوتۋىندىنى تاماشالاي الادى. ونىڭ ىشىندە سوڭعى ەكى جىلدا ءتۇسىرىلگەن وتاندىق فيلمدەر دە بار. ال نەگىزگى بايقاۋعا قازاقستاننىڭ اتىنان جۋىردا عانا كورەرمەندەرىنە جول تارتقان جاس رەجيسسەر فارحاد ءشارىپوۆتىڭ “قىزعىلت قويان تۋرالى حيكايا” ءفيلمى مەن رەجيسسەر اقان ساتاەۆتىڭ اتىشۋلى “اداسقاندار” تريللەرى جىبەرىلگەن.
سونداي-اق, فەستيۆال اياسىندا جاپون, نەمىس, ورىس كينوپروديۋسەرلەرىنىڭ قاتىسۋىمەن قولعا الىنىپ جاتقان قازاق كينوجوبالارى ناسيحاتتالاتىن بولادى. “ەۋرازيا” كينوفەستيۆالىنىڭ تاعى ءبىر جاڭالىعى – ساندىق فورماتقا كوشىرىلگەن جانە ءوڭدەلگەن “قىز جىبەك” ءفيلمى كورسەتىلمەك.
سەيسەنبى كۇنى كينوفەستيۆالدىڭ سالتاناتتى اشىلۋ ءراسىمى ايگىلى فرانتسۋز اكتەرى جەرار دەپاردەنىڭ قاتىسۋىمەن تۇسىرىلگەن رەجيسسەر ءسابيت قۇرمانبەكوۆتىڭ “كەشىككەن ماحاببات” كارتيناسىنا ۇلاستى. ەلىمىزدىڭ وڭتۇستىگىندە تۇسىرىلگەن بۇل فيلم تۋرالى وتاندىق باق وكىلدەرى از ناسيحاتتاعان جوق. دۇيسەنبى كۇنى دەپاردەنىڭ قاتىسۋىمەن ءتۇسىرۋ توبى ءباسپاسوز ءماسليحاتىن وتكىزگەن بولاتىن. فرانتسۋز اكتەرى جۋرناليستەرگە بەرگەن سۇحباتىندا قازاق كينوسىنا ءتۇسۋ وزىنە اسا ۇناعانىن اتاپ: “بۇل فيلمدە شىندىق پەن ءومىر بار. فيلمدى ءتۇسىرۋ بارىسىندا قازاق اكتەرلارىنا باۋىر باسىپ كەتتىم. مۇنداي فيلمگە قاتىسۋ ۇلكەن تاۋەكەلدى قاجەت ەتەدى. سەبەبى, مۇندا ەشقانداي كوممەرتسيالىق مۇددە بولعان جوق. مەنى ءفيلمنىڭ ادامي جاعى قىزىقتىردى”, – دەدى.
ايتقانداي, “قازاقفيلم” كينوستۋدياسى مەن ء“Tanarىs ءProductىon” كينوكومپانياسى تۇسىرگەن “كەشىككەن ماحاببات” فيلمىندە باستى رولدەردىڭ ءبىرىن سومداعان جەراردىڭ ءوزى دە قازاقستاندىقتارمەن بىرگە ونى ءبىرىنشى رەت تاماشالادى.
مەن وسى ءفيلمدى پاريجبەن بىرگە الەمنىڭ باسقا ەلدەرى تاماشالاۋ ءۇشىن قولىمنان كەلگەننىڭ ءبارىن جاسايمىن, – دەيدى فرانتسۋز اكتەرى. – وكىنىشكە قاراي, كينەماتوگرافتاردىڭ ادامدىقتان اتتايتىن كەزدەرى از بولمايدى. سوندىقتان دا مەن ۇلتتىق باستاۋىن, تامىرىن جوعالتپاعان ءسىزدەردىڭ ەلدەرىڭىزدە ەرەكشە ىلتيپاتپەن كينوعا ءتۇستىم.
“كەشىككەن ماحاببات” جەرار دەپاردە تۇسكەن جالعىز قازاق كارتيناسى ەمەس. جۋىردا عانا ول پاريجدە ءتۇسىرۋ جۇمىستارى اياقتالعان رەجيسسەر تالعات تەمەنوۆتىڭ “مەنىڭ كۇنالى پەرىشتەم” فيلمىنە تۇسكەن.
سونىمەن, سەيسەنبى كۇنى “ەۋرازيا” كينوفەستيۆالىنىڭ اياسىندا ءتورت بىردەي ءباسپاسوز ءماسليحاتى ءوتتى. تاڭەرتەڭگىلىك جۋرناليستەرگە اكتەر ۋيليام زەينمەن سۇحباتتاسۋدىڭ ءساتى تۇسسە, ساسكەگە قاراي حالىقارالىق بايقاۋدىڭ قازىلار القاسى ءباسپاسوز ءماسليحاتىن وتكىزدى. ىلە-شالا فينپرەسسي مەن نەتپاك قازىلارى قازاقستاندىق باق وكىلدەرىمەن وي ءبولىستى. ودان كەيىن رەسەيلىك ولگا لومونوسوۆا, يرينا گرينەۆا مەن پاۆەل سافونوۆتار ءوز شىعارماشىلىقتارى مەن قازاقستاندىق كينەماتوگرافياعا قاتىستى پىكىرلەرىن ورتاعا سالدى.
قالاي دەسەك تە, “ەۋرازيا” كينوفەستيۆالى وتاندىق تالانتتى رەجيسسەرلەر مەن اكتەرلاردى, دارىندى ستسەناريستەردى ءبىر جەرگە توعىستىراتىن, تانىتاتىن, شىعارماشىلىقتارىن العا جەتەلەيتىن دۋماندى شارا. تاجىريبە الماساتىن, مەرەيلەرىن تاسىتاتىن تاماشا ورتا.
سونىمەن كينوفەستيۆال كورسەتىلىمدەرىن جۇرتشىلىق “ارمان”, “تسەزار” كينوتەاترلارى مەن “مەگا”, ء“Sىlk Way ءCىty” سياقتى فەستيۆال ورتالىقتارىنان تاماشالاي الادى.
ايناش ەسالي. الماتى.
--------------------------------
سۋرەتتەردى تۇسىرگەن بەرسىنبەك سارسەنوۆ.
