قىستان قىسىلمايتىندىعىمىزعا كەپىلدىك بار ما؟

بيىلعى جاز بويى باسقاسى باسقا, قالانىڭ ورتالىق بولىگىندە ىستىق سۋ بولعان جوق. جىعىلعانعا جۇدىرىق دەگەندەي, جۋىردا قالا بويىنشا ءبىرجارىم تاۋلىككە جۋىق سۋىق سۋ بولماي قالدى. وسى ءجايت, مىنە, تاعى قايتالانىپ وتىر. ال ونىڭ زاردابى بىردەن سەزىلدى. اسىرەسە, اۋرۋحانادا توسەككە تاڭىلعان ناۋقاستارعا قيىن بولدى. ال بالا- باقشالارىندا بۇلدىرشىندەرگە وزدەرىمەن سۋ الا كەلۋى مىندەتتەلگەنىن ەستىگەندە, نە كۇلەرىمىزدى, نە جىلارىمىزدى بىلمەدىك. سويتسەك, باقساق باقا ەكەن دەمەكشى, مۇنداي سىناق ءتيىستى مەكەمەلەر اراسىنداعى ءوزارا ەرەگىستەن تۋىنداعان ەكەن. ياعني, “سەمەيۆوداكانالدىڭ” “شى­عىس­­ەنەرگوترەيد” مەكەمەسىنە قارىزى 200 ميلليون تەڭگەدەن اسىپ كە­تىپتى. سودان مۇنىڭ سوڭ­عىسى سۋ ستانساسىن ەلەكتر قۋا­تىنان اجى­راتىپ تاستاعان عوي. سولايشا ەكى ور­تادا شىبىن ولە­دىنىڭ كەرى كەلگەن. بۇل ءوزى جىلدا وسى ۋاقىتتا ءجيى قايتالاناتىن تىرلىك. قالا تۇرعىندارىنىڭ ەندى ءالسىن-ءالسىن جارىق سونە باستاي ما دەگەن كۇدىگى دە جوق ەمەس. مونوپوليست مەكەمەلەردىڭ بۇل تىرلىگىن, ارينە, قۇپتاۋعا بولمايدى. ودان دا ولار قىسقا دايىندىق بارىسىندا باس­قاشا امال قاراستىرماي ما دەسەدى بىلايعى جۇرتشىلىق. بۇرىنعى جىلدارعا قارا­عان­دا جاعداي ءبىرشاما وڭالىپ قال­دى دەگەنمەن, سەمەيلىكتەردىڭ ءوت­كەن قىستا دا توڭىپ شىققانى جاسى­رىن ەمەس. كوڭىلدەگى سول الاڭ ءالى دە سەيىلمەي وتىر. ويتكەنى, مۇن­دا جاڭادان سالى­نىپ جاتقان ءۇل­كەن جىلۋ-ەلەكتر ورتالىعىنىڭ قۇرىلىسى بيىل دا بىتپەيتىن ءتۇرى بار. ول كەلەر جىلى عانا پايدا­لانۋعا بەرىلۋى مۇمكىن. سوندا ونىڭ قۇرىلىسى نەگە ساعىزشا سوزىلىپ بارا جاتىر دەگەنگە كەلەتىن بولساق, مۇنىڭ سەبەبى قارجى تاپشى­لى­عىندا ما دەيمىز. وتكەندە بۇل قۇرىلىس بارىسىمەن ۇكىمەت باسشىسى­نىڭ ءوزى ارنايى كەلىپ تانىسىپ كەتكەن. مۇمكىن مۇن­داعى جۇمىس ىلگەرىلەسە ەندى ىلگەرىلەر. بىراق... راس, جىلۋ مەن جارىق, ياعني قالانىڭ قىسقا ازىرلىك ماسەلەسى نازاردان تىس قالىپ وتىرعان جوق. سونىڭ ايعاعىنداي بۇل ءما­سەلە جۋىردا عانا قالالىق ءماس­ليحاتتىڭ سەسسياسىندا ارنايى قارالدى. وندا قالاداعى تۇرعىن ۇيلەردىڭ قىسقا دايىندىعى 80 پايىز مولشەرىندە ەكەندىگى اش­ىپ ايتىلدى. قالا كوشەلەرىندە جىلۋ قۇبىرلارى ءالى اۋىستى­رى­لىپ جاتىر. ايتەۋىر, جىلۋ قا­زان­­دىقتارى تۇگەلگە جۋىق قىسقا ءازىر ەكەن. ەندى تەزدەتىپ قاجەتتى كومىر جانە مازۋت قورىن جيناپ الۋ كە­رەك. بولماسا وتكەن جىلعى جىر­دى قالا تۇرعىندارى ۇمىتا قوي­عان جوق. وندا قاجەتتى كو­مىر­دى الۋعا قارجى ءتىپتى وبلىس قازى­نا­سىنان تابىلا قويماعان. ءسويتىپ, “سەن سالار دا مەن سالار, اتقا جەمدى كىم سالار” دەيتىن جاع­داي قا­لىپتاسقانى دا وتىرىك ەمەس. سونسوڭ ايتتى-ايتپادى تۇر­­عىندار مەن زاڭدى تۇلعالار­دان جىلۋ مەن جارىققا قارىز 250 ميلليون تەڭگەدەن استام قار­جى تەزدەتىپ ءوز ورنىنا قۇيى­لۋى ءتيىس. ال وسى ماقساتتا ءتيىستى مەكە­مە­لەرمەن بىرگە حالىق قا­لاۋ­لىلارى, قوعامدىق ۇيىمدار, جەرگىلىكتى اقپارات قۇرالدارى دا تىزە قوسا وتىرىپ, بىرلەسە وتى­رىپ جۇمىس ىستەۋلەرى كەرەك-اق. سوندا عانا قالا تۇرعىندارىنىڭ قىستان قى­سىلمايتىندىقتارىنا كەپىلدىك بولا ما دەيمىز. سولاي دەي وتىرىپ, بۇل ارادا كوپ ماسەلە پاتەر يەلەرى كووپە­راتيۆتەرىنە قاتىستى ەكەندىگىن ايتپاي كەتۋگە بول­مايدى. ال ولاردىڭ قايسىبىرىنىڭ وزدەرىنە بەكىتىلگەن ۇيلەردىڭ قىس­قا دايىندىعىنا سالعىرت قا­راي­تىندىعى دا وتىرىك ەمەس. سون­دىقتان ولارعا دا ءوز جۇمىسىن شي­راتپاسا بولمايدى. ويتكەنى, قىس – قىر استىندا. داۋلەت سەيسەن ۇلى. سەمەي.