ەلباسى نۇرسۇلتان نازارباەۆ اۋىل شارۋاشىلىعىنىڭ كوكەيكەستى ماسەلەلەرىنە ارنالعان كەڭەستە بيىلعى ەگىن وراعىن ۇيىمشىلدىقپەن وتكىزۋگە ناقتى تاپسىرمالار بەرگەن بولاتىن. ونى وزدەرىنە كورسەتىلگەن جوعارى سەنىم دەپ تۇسىنگەن سولتۇستىكقازاقستاندىق ديقاندار جاۋاپتى ناۋقانعا ساقاداي-ساي ازىرلىكپەن كەلىپ, ەگىن وراعىن ادەتتەگىدەن ەرتە باستاپ كەتتى. مەملەكەت باسشىسىنىڭ قىزىلجار وڭىرىنە جۇمىس ساپارى ەگىن وراعىنىڭ ناعىز قىزعان ساتىمەن تۇسپا-تۇس كەلدى. بۇگىندە ەگىس تاناپتارى قىزۋ ەڭبەك دۇبىرىنە ۇلاسىپ, 3,9 ميلليون گەكتار القاپتىڭ ەگىنى ەڭسەرىلىپ تاستالعان بولاتىن. ماڭداي تەرمەن وسىرىلگەن ەل ريزىعىن شاشاۋ شىعارماي قامبالاپ الۋعا ەل بولىپ جۇمىلعان شاق بۇل.
سولتۇستىك قازاقستان وبلىسىنىڭ الەۋمەتتىك-ەكونوميكالىق جاعدايى تۇراقتى دامىپ كەلەدى. جانە دە قارقىندى سيپاتقا يە. بيىلعى جارتى جىلدىڭ دامۋ قورىتىندىلارى بارلىق نەگىزگى كورسەتكىشتەر بويىنشا تۇراقتى ءوسىمدى كورسەتەدى. وبلىس ەكونوميكاسىنىڭ نەگىزگى سالاسى – اگروونەركاسىپ كەشەنى. اۋىل شارۋاشىلىعى سالاسىنا رەسپۋبليكالىق بيۋدجەتتەن 6,8 ميلليارد تەڭگە قارجىلاي كومەك كورسەتىلدى. ونىڭ قايتارىمى ناتيجەسىز ەمەس. بارلىق مال, قۇس باسىنىڭ جانە سالا ونىمدەرىن ءوندىرۋ ءتۇرلەرىنىڭ ءوسۋى بايقالادى. وبلىس ءوزىن تولىقتاي ەتپەن, سۇتپەن قامتاماسىز ەتەدى. جان باسىنا شاققاندا ءسۇت وندىرۋدەن ءبىرىنشى, ەت جانە جۇمىرتقادان ەكىنشى ورىندى يەلەنەدى. جالپى ءونىم كولەمى 5,3 پايىز ارتىپ, 25 ميلليارد تەڭگەنىڭ ءونىمدەرى شىعارىلدى. سوڭعى جىلدارى مال شارۋاشىلىعىن يندۋستريالاندىرۋ ماقساتىمەن جوعارى تەحنولوگيالىق كەشەندەر سالىنا باستادى.
ەلباسىنىڭ ساپارى پەتروپاۆل قالاسىندا سالىنىپ, پايدالانۋعا بەرىلگەلى وتىرعان جاڭا ۇلگىدەگى ەمحانانىڭ جۇمىسىمەن تانىسۋدان باستالدى. “100 مەكتەپ, 100 اۋرۋحانا” باعدارلاماسى بويىنشا بوي كوتەرگەن ءۇش قاباتتى نىسان ءبىر اۋىسىمدا بەس جۇزدەي ناۋقاستى قابىلداي الادى. ونىڭ قۇرىلىسىنا رەسپۋبليكالىق بيۋدجەتتەن 1 ميلليارد 361 ميلليون تەڭگە بولىنسە, 252 ميلليونى قۇرال-جابدىقتار مەن قوندىرعىلار ساتىپ الۋعا جۇمسالدى. وسى باعدارلاما اياسىندا بىلتىر 10 مىڭ ليتر پلازما ءوندىرەتىن قان ورتالىعى ىسكە قوسىلسا, جىل اياعىنا دەيىن شالعاي اۋدانداردا 2 تۋبەركۋلەزگە قارسى ديسپانسەر قاتارعا قوسىلماق. دەنساۋلىق ساقتاۋ سالاسىنا جۇمسالاتىن قاراجات جىل وتكەن سايىن مولايىپ كەلەدى. بيىل ونىڭ مولشەرى 12 ميلليارد تەڭگەگە جەتتى. نۇرسۇلتان ءابىش ۇلىن وبلىس اكىمىنىڭ ورىنباسارى فارحاد قۋانعانوۆ تۇساۋى كەسىلگەن جاڭا جوبامەن تانىستىردى. اكىمدىكتىڭ باستاماسىمەن قولعا الىنعان “ۇرپاق قورى” باعدارلاماسى كامەلەتكە تولماعان ءتورت جانە ودان دا كوپ بالاسى بار وتباسىلارعا قارجىلىق قولداۋ جاساۋدى ماقسات تۇتقان. ول ءۇشىن ءار بالاعا بانكتەن دەپوزيت اشىلىپ, العاشقى جارنا رەتىندە 1500 دوللار قۇيىلادى. سوسىن قاشان ەرجەتكەنشە جىل سايىن تولىعىپ تۇراتىن بولادى. ەلباسى قازاقستان حالقىن 2015 جىلى 20 ميلليونعا جەتكىزۋ مىندەتى تۇرعانىن, سوعان وراي قارجىلىق كوزى ءتيىمدى ويلاستىرىلعان مۇنداي باستامالاردى قولداۋ, باسقالارعا تاراتۋ كەرەكتىگىن ايتتى. ەڭ قىمبات قازىنا – حالىق دەنساۋلىعى. وعان ەشتەڭە جەتپەيدى. سالاماتتى ءومىر سالتى مەن ادامنىڭ ساۋلىعىن ويلاۋ مەملەكەتتىڭ باستى مۇددەسى. بيىلعى جولداۋىمدا ادامنىڭ ءوز دەنساۋلىعى ءۇشىن ىنتىماقتى جاۋاپكەرشىلىك قاعيداتىن نىعايتۋىن ايرىقشا اتاپ كورسەتتىم. ەلىمىزدە جۇرەك-قان تامىرلارى, ونكولوگيا اۋرۋلارىنا شالدىققان جاندار قاتارى ءالى دە كوپ. سوندىقتان ناۋقاستى بولدىرماۋ, الدىن الۋ, ءومىر ساپاسىن ارتتىرۋ, الەۋمەتتىك قورعاۋدى نىعايتۋ اركىمنىڭ قاجەتتى مىندەتىنە اينالۋى ءتيىس. 2020 جىلعا تامان انا مەن بالا ءولىمىن ەكى ەسە قىسقارتۋ, ءومىر ءسۇرۋدىڭ ورتاشا ۇزاقتىعىن 72 جاسقا دەيىن جەتكىزۋ ماقساتى تۇر. ول ءۇشىن مەديتسينانى قارجىلىق قولداۋدى, دەنساۋلىق ساقتاۋ نىساندارىن سالۋدى, بىلىكتى دارىگەرلەرمەن قامتاماسىز ەتۋدى جالعاستىرامىز. حالىق دەنساۋلىعىن ساقتاۋدىڭ ۇلتتىق ءبىرىڭعاي جۇيەسىنە كوشۋىمىز, “سالاماتتى قازاقستان” باعدارلاماسىنىڭ قابىلدانۋى – مۇنىڭ ءبارى ادام ومىرىنەن قىمبات ەشتەڭە جوقتىعىن كورسەتەدى. مەملەكەت ءوز ازاماتتارىنا دەنساۋلىق ساقتاۋ قۇقىعىن, ساپالى مەديتسينالىق كومەك كورسەتىلۋىن ودان ءارى قامتاماسىز ەتە بەرەتىن بولادى. وبلىستىق دەنساۋلىق ساقتاۋ باسقارماسىنىڭ باستىعى ەرىك ءبايجۇنىسوۆ جوعارى ءبىلىمدى جاس مامانداردى تۇراقتاندىرۋ جايىن بايانداپ بەردى. مەديتسينالىق جوعارى وقۋ ورىندارىن اياقتاعان 85 ديپلومدى جاس قىزىلجار وڭىرىندە ەڭبەك ەتۋدى قالاپتى. جىل اياعىنا دەيىن تاعى وسىنشا مامان كەلمەك. ولار باسپانامەن ءبىرىنشى كەزەكتە قامتاماسىز ەتىلەدى. جۋىردا 80 پاتەرلى جاتاقحانا پايدالانۋعا بەرىلدى. بۇدان تىسقارى 120 پاتەرلى 2 يپوتەكالىق ءۇي سالىنۋدا. جەرگىلىكتى قازىنا ەسەبىنەن ءبىر رەتتىك وتەماقى مولشەرىن ۇلعايتۋ كوزدەلگەن. مەديتسينالىق كوللەدجدى تامامداعان تۇلەكتەردىڭ ءبىر توبىنا وبلىس اكىمىنىڭ گرانتتارى تاعايىندالدى. ولار ءسويتىپ مەديتسينالىق جوعارى وقۋ ورىندارىنىڭ ستۋدەنتتەرى اتانىپ وتىر.
پرەزيدەنت ەمحانانىڭ كورپۋستارىن ارالاپ شىققاننان كەيىن ءبىر توپ جاس مامانمەن اڭگىمەلەستى. سولاردىڭ ءبىرى – كامال گاسانوۆ ەڭبەك جولىن سولتۇستىك وڭىردەن باستاۋدى ۇيعارىپتى. الدىمەن جۇمىس ىستەپ, تاجىريبە جيناقتاپ السام دەيمىن, دەدى ول. مەملەكەت باسشىسى ونىڭ بۇل تالابىن قوستادى. ۇجىمعا 4 جەڭىل كولىكتىڭ كىلتىن تاپسىرىپ, ەڭبەكتە تابىس تىلەدى. ەمحانانىڭ باس دارىگەرى ءاليا تاشەتوۆا ەلباسىنا كورسەتكەن قامقورلىعى ءۇشىن ۇجىم اتىنان العىس ءبىلدىردى.
ن.نازارباەۆتىڭ ودان كەيىن ات باسىن تىرەگەن جەرى “قىزىلجار ورانجەرەياسى” مكقك بولدى. ەلىمىزدە تروپيكالىق, سۋبتروپيكالىق وسىمدىكتەر مەن جەمىس اعاشتارىن وسىرۋمەن اينالىساتىن ەكى عانا مەكەمە بولسا, سولاردىڭ ءبىرى – وسى ورانجەرەيا. 1923 جىلى پەتروپاۆل ەت-كونسەرۆى كومبيناتى جانىنان بوتانيكالىق باق رەتىندە شاڭىراق كوتەرگەن ونىڭ گۇلدەنۋىنە باعبان ۆ. وسيپوۆ كوپ ەڭبەك سىڭىرگەن. سوڭعى 30 جىل بويى قازاقستاننىڭ ەڭبەك سىڭىرگەن اگرونومى, بيولوگيا پروفەسسورى راۆيل ريازاپوۆ باسشىلىق ەتىپ كەلەدى. قازىر مۇندا ماڭگى جاسىل وسىمدىكتەردىڭ ءبىر مىڭنان استام ءتۇرى جايقالا ءوسىپ تۇر. ولاردىڭ اراسىندا ەكى عاسىردان بەرى جاساپ كەلە جاتقان قۇرما پالماسى كوزگە ەرەكشە شالىنادى. مۇندا حالىقارالىق “قىزىل كىتاپقا” ەنگەن مانستەرا, دينگو, ۆاشينگتون پالماسىن دا كەزدەستىرۋگە بولادى. ورانجەرەيا جانىندا شاعىن دەندراري, ەكزوتيكالىق قۇستاردىڭ تورلى ورنى, تروپيكالىق بالىق تۇرلەرىنىڭ اكۆاالەمى, ەكولوگيالىق ورتالىق, تروپيكالىق ساياباق جۇمىس ىستەيدى. ەندى, مىنە, “جول كارتاسىنا” ەنگىزىلۋدىڭ ارقاسىندا شيرەك عاسىرعا جۋىق جوندەۋ كورمەگەن ورانجەرەيا ادام تانىماستاي بولىپ وزگەرىپ شىعا كەلدى. كۇردەلى ءجوندەۋگە 295,2 ميلليون تەڭگە ءبولىنىپ, “قىسقى باقتىڭ” اينەكتى عيماراتى بيىكتەتىلىپ, جاڭادان تۇرعىزىلدى. اۋلاعا سۋبۇرقاق ورناتىلدى. قۇنارلىلىقتىڭ, كوكتەم مەن قىر جەمىستەرىنىڭ جانە جانۋارلار الەمىنىڭ قۇداي انالارى – تسەرەرانىڭ, فلورانىڭ, ديانانىڭ گيپستى مۇسىندەرى قويىلدى. ورانجەرەيانىڭ كىرە بەرىسى ورنەكتاستارمەن اشەكەيلەندى. 1,5 گەكتار اۋماق اباتتاندىرىلىپ, ەرەكشە كەيىپكە ەندى. ەلباسى اتقارىلعان جۇمىستارعا وڭ باعا بەرىپ, الەۋمەتتىك سالالاردى ۇدايى نازاردى ۇستاۋدى تاپسىردى. باق اۋلاسىنا ورنالاستىرىلعان ستەندىلەر ارقىلى قىزىلجار وڭىرىندەگى جانە پەتروپاۆل قالاسىنداعى “جول كارتاسى” باعدارلاماسىنىڭ ورىندالۋ جايىمەن تانىستى. ول جونىندە وبلىس اكىمى سەرىك ءبىلالوۆ پەن قالا اكىمى نۇرجان اشىمبەتوۆ اڭگىمەلەدى. وبلىستا تۇرعىن ءۇي كوممۋنالدىق شارۋاشىلىق جۇيەسى بويىنشا 32 جوبا ىسكە اسىرىلىپ, وعان بولىنگەن 2 ميلليارد تەڭگەنىڭ 70 پايىزى يگەرىلگەن. 1465 جاڭا جۇمىس ورىندارى اشىلعان. الەۋمەتتىك جۇمىس ورىندارى مەن جاستار پراكتيكاسى جوباسى اياسىندا 2319 ادام جۇمىسقا تارتىلعان. پرەزيدەنتتىڭ 720 وقۋشىعا ارنالعان 80 ورىندى جاتىن كورپۋسى بار حيميا-بيولوگيا باعىتىنداعى زياتكەرلىك مەكتەبىنىڭ جوباسى جايلى باس ساۋلەتكەر ۆالەري زاتاي ايتىپ بەردى. نۇرسۇلتان ءابىش ۇلى باق ىشىنە بىرىككەن اراب امىرلىكتەرىنەن ارنايى اكەلىنگەن جاس قۇرما كوشەتىن ەكتى.
ەلباسىنىڭ ەلىمىزدىڭ تۇرعىندارىن كوبەيتۋ تالابى سولتۇستىك قازاقستان وبلىسى ءۇشىن دە ايرىقشا ماڭىزدى. سوڭعى جىلدارى اتاجۇرتقا ورالىپ جاتقان اعايىندارىمىزدى قونىستاندىرۋعا دەگەن ىنتا-ىقىلاستىڭ ارتا تۇسكەنىن بايقاۋعا بولادى. ۇلى كوش باستالعان 1991 جىلدان بەرى قىزىلجار وڭىرىنە 5437 وتباسى كۆوتا بويىنشا كوشىپ كەلگەن. ءوز ەركىمەن كەلىپ جاتقاندارى قانشاما! ولاردىڭ دەنشىلىگى پەتروپاۆل قالاسىنا جانە ەكونوميكالىق ينفراقۇرىلىمى قارقىندى ەلدى مەكەندەرگە قونىستانعان. بۇرىندارى ەلدى مەكەندەرگە شاشىراي قونىستانسا, ەندى توپتالىپ تۇرۋ ماسەلەسىن شەشۋ جولعا قويىلعان. ماسەلەن, وزبەكستاننان ورالعان ءبىر توپ قانداسىمىز نوۆوكامەن اۋىلىنا جايعاسىپ, قوسالقى شارۋاشىلىقپەن اينالىسۋعا مۇمكىندىك جاسالدى. سول سياقتى پوكروۆ اۋىلىندا دا قانداستارىمىز مول شوعىرلانعان. ولاردىڭ ارقايسىسىنا ءبىر گەكتاردان جەر, شاعىن نەسيە بەرىلدى. ارالارىندا شارۋالارىن ۇرشىقشا ءۇيىرىپ, تابىستىڭ تايقازانىن تاسىتىپ جۇرگەندەرى بارشىلىق. ماسەلەن, “تامدى” شارۋا قوجالىعىن باسقاراتىن جاڭاباي ءپىرمانوۆتىڭ وتباسى ءتورت ت ۇلىك ءوسىرىپ, شۇبات دايىنداۋمەن اينالىسادى. بىلتىر ەليتنوە اۋىلىندا بايتەرەك شاعىن اۋدانىنىڭ ىرگەتاسى قالاندى. جەرگىلىكتى قازىنانىڭ قارجىسىنا 23 ءۇي سالىندى. بيىل “نۇرلى كوش” باعدارلاماسىنىڭ ۇشقىر جوباسى بويىنشا 140 ءۇي سالىنىپ, الدى پايدالانۋعا بەرىلە باستادى. ول ءۇشىن رەسپۋبليكالىق بيۋدجەتتەن 831 ميلليون, وبلىستان 140 ميلليون تەڭگە ءبولىندى. 50 ءۇيدىڭ اۋلاسىنا “توبىل” اكك ارقايسىسى 300 شارشى مەتر جىلىجاي سالىپ بەردى. سۋ, جىلۋ جۇيەلەرى تارتىلىپ, تامشىلاتىپ سۋارۋ ادىسىمەن جۇمىس ىستەيتىن شەتەلدىك قوندىرعىلار ورناتىلدى. ءسويتىپ, كوكونىس وسىرۋمەن جىل بويى اينالىسۋعا جاعداي تۋعىزىلدى. بۇل جەردە مەملەكەت باسشىسىن اتا-بابا قونىسىن اڭساي جەتكەن اعايىندارىمىز قۇشاق جايا قارسى الىپ, ەلباسىنا اق العىستارىن جاۋدىرىپ جاتتى.
– قاراڭىزدارشى, باسپانالارىڭىز سىڭعىرلاپ تۇر, جەر تەلىمدەرىڭىز بار. جىلىجايعا دەيىن سالىپ بەرگەن. بۇدان ارتىق نە كەرەك؟ اتاجۇرتتى اڭساپ كەلگەن ارماندارىڭا جەتتىڭدەر. ەندى تەر توگىپ, ەڭبەك ەتۋ عانا قالدى. ءار نارسەنىڭ قايتارىمى بولۋ كەرەك. ەلىمىزدى, جەرىمىزدى بىرلەسىپ گۇلدەندىرەيىك. ءبىز وتان دەپ ورالعان تۋىسقاندارىمىزعا مەملەكەت تاراپىنان جاسالاتىن قامقورلىقتى ۇزبەيمىز, – دەدى نۇرسۇلتان نازارباەۆ.
تۇمەن وبلىسىنان كەلىپ وسىندا تۇرىپ جاتقان قايروللا سۇلەيمەنوۆ اقساقال جۇمىسقا ورنالاستىرۋ, كاسىبي دايىندىقتاردان وتكىزۋ, جەڭىلدىك نەسيەلەر الۋ ماسەلەلەرىنىڭ ويداعىداي شەشىلىپ جاتقانىنا ريزاشىلىق بىلدىرە كەلىپ, ەليتنوە اۋىلى دا بۇدان بىلاي بايتەرەك دەپ اتالاتىنىن قۋانا حابارلادى. ەلباسى موڭعوليادان بيىل كوشىپ كەلگەن ساۋلەگۇل حاردىبايدان حال-جاعدايىن, قالاي ورنالاسقانىن سۇرادى. ول ءوزىم دە, جۇبايىم دا جۇمىس ىستەيمىز. ءۇش بولمەلى ءۇي الدىق. ريزامىز. سىزگە دەگەن قۇرمەتىمىز شەكسىز, دەپ جاۋاپ بەردى. نۇرسۇلتان ءابىش ۇلى قۇرىلىسشى بولىپ ەڭبەك ەتەتىن مۇحامەد قازبەكوۆتىڭ شاڭىراعىندا بولىپ, ءتۇرلى-ءتۇستى تەلەديدار تارتۋ ەتتى. قوشتاسار كەزدە اۋىل تۇرعىندارىنا قونىستارىڭىز قۇتتى بولسىن دەگەن يگى تىلەگىن جولدادى.
جازدىڭ اپتاپ ىستىعى ءسولتۇستىك قازاقستان وبلىسى ەگىنشىلەرىن ونشا ساستىرا قويعان جوق. قۋاڭشىلىققا قارسى كوپ جىلعى ءىس-تاجىريبەلەرى مەن قاجىر-قايراتىن قارسى قويا ءبىلدى. پارلى القاپتار ءتيىمدى پايدالانىلدى. ىلعال ساقتاۋ تەحنولوگيالارى كەڭىنەن ەنگىزىلدى. گەربيتسيدتەر مەن مينەرالدىق تىڭايتقىشتار ءتيىمدى ءسىڭىرىلدى. ءناتيجەسى سول, ەگىن بىتىك شىقتى. ەندىگى ماقسات – شاشپاي-توكپەي جيناپ الۋ.
ەلباسى قىزىلجار اۋدانىنىڭ ەگىن القاپتارىن ارالاپ, “بازيس-قىزىلجار” جشس وسىرگەن استىقتىڭ شىعىمدىلىعىنا كوڭىلى تولعانىن جاسىرا المادى.
– بيىلعىداي كۇردەلى اۋا رايىندا قىزىلجار ءوڭىرى ديقاندارىنىڭ بىتىك استىق وسىرۋلەرى اتاپ وتۋگە تۇرارلىق, – دەپ باستادى اۋىل شارۋاشىلىعى تاۋار ءوندىرۋشىلەرىمەن تاناپ باسىنداعى اڭگىمەنى ەلباسى. – كوكتەمگى-كۇزگى دالا جۇمىستارىنا بولىنەتىن مەملەكەتتىك سۋبسيديا ارتىپ كەلەدى. وسى زامانعى اۋىل شارۋاشىلىعى تەحنيكالارىن ساتىپ الۋدا ليزينگتىك جەڭىلدىكتەر قولدانىلادى. 2003 جىلدان بەرى اۋىل شارۋاشىلىعى سالاسىنا تۇراقتى قولداۋ كورسەتىلەدى. بيىل بولىنگەنى – 225 ميلليارد تەڭگە. ونىڭ 95 ميللياردى نەسيە بەرۋگە, 50 ميللياردى ليزينگپەن تەحنيكالار الۋعا باعىتتالدى. استىقتىڭ ساپاسى دا كوڭىل قۋانتادى. بيىل وتان قامباسىنا 4 ميلليون توننا استىق قۇيۋدى مەجەلەپ وتىر ەكەنسىزدەر. قازىرگى ەگىن ورۋ قارقىنىنا قاراعاندا, ءۋادەدە تۇراتىندارىڭىزعا سەنىمدىمىن. باسقا وڭىرلەردە دە استىق شىعىمى جامان ەمەس. بىلتىردان قالعان 7 ميلليون توننا استىعىمىز بار. بيىلعىنى قوسساق 21 ميلليون بولىپ قالادى. 8 ميلليونىن ساتامىز. قالعانى ازىق-ت ۇلىك قاۋىپسىزدىگىن قامتاماسىز ەتۋگە, باسقا دا قاجەتىمىزگە جەتىپ ارتىلادى. بولاشاقتا اۋا رايىنىڭ قانداي كۇردەلى جاعدايىنا قاراماستان گەكتار بەرەكەلىلىگىن 10-15 تسەنتنەردەن اينالدىرۋدى قالىپتى ۇردىسكە اينالدىرۋىمىز كەرەك. ول ءۇشىن وزىق تەحنولوگيالارمەن قوسا توپىراق قۇنارلىلىعىن كەمىتپەۋگە, پارلى القاپتارعا, قار توقتاتۋعا ۇلكەن ءمان بەرۋىمىز قاجەت. بۇگىندە تمد ەلدەرىنىڭ الدىندا كەلەمىز. بۇعان توقمەيىلسىمەي, ەكونوميكالىق كورسەتكىشتەردى ەسەلەي تۇسۋگە, حالىقتىڭ تۇرمىسىن جاقسارتۋعا ءتيىسپىز. ءبارىڭىزدى الدا كەلە جاتقان قازاقستان كونستيتۋتسياسىنىڭ 15 جىلدىق مەرەكەسىمەن قۇتتىقتايمىن. ەڭبەكتەرىڭىز ەسەلى, دەنساۋلىقتارىڭىز مىقتى بولسىن. كەلەسى جىلى ەل تاۋەلسىزدىگىنىڭ 20 جىلدىعىن كەڭىنەن اتاپ وتەمىز. وعان جان-جاقتى ءازىرلىكتى وسى باستان پىسىقتاعان دۇرىس.
ەلباسى رەسپۋبليكالىق جانە جەرگىلىكتى باق وكىلدەرىنە بەرگەن سۇحباتىندا وبلىس اكىمى سەرىك ءبىلالوۆتىڭ اتقارعان جۇمىستارىن وڭ باعالادى.
مەملەكەت باسشىسى قىزىلجار وڭىرىندەگى جۇمىس ساپارىنان كەيىن قوستاناي وبلىسىنا اتتانىپ كەتتى.
ءومىر ەسقالي. سولتۇستىك قازاقستان وبلىسى.
----------------------------------
سۋرەتتەردى تۇسىرگەندەر س.بوندارەنكو, ب.وتارباەۆ.
