ەلۋ توعىز ءماسليحات دەپۋتاتى سايلانادى

«قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 101-بابى 4-تارماعىنا سايكەس وسى جىلعى 29 ناۋ­رىزدا ەلىمىزدىڭ 14 وڭىرىندەگى 59 سايلاۋ وكرۋگىندە ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋ وتەدى. سايلاۋدا بارلىعى 59 دەپۋتات – استانا قالاسى ءماسليحاتىنىڭ ءبىر دەپۋتاتى, وبلىستىق ءماسليحاتتىڭ 8 دەپۋتاتى, قالالىق ءماسليحاتتىڭ 10 دەپۋتاتى جانە اۋداندىق ءماسليحاتتىڭ 40 دەپۋتاتى سايلانادى. ورتالىق سايلاۋ كوميسسياسىنىڭ حابارلاۋىنشا, سايلاۋ ناۋقانى بارىسىندا 196 كانديدات ۇسىنىلدى, ولاردىڭ 60-ىن ساياسي پارتيالار ۇسىندى, 136-سى ءوزىن ءوزى ۇسىنعاندار. قازىرگى كەزدە ءماسليحاتتار دەپۋتاتتىعىنا كانديداتتاردى تىركەۋ اياقتالدى. بارلىعى 179 كانديدات تىركەلدى. ولاردىڭ ىشىندە 128 ەر ادام جانە 51 ايەل بار, 60 كانديدات ساياسي پارتيالاردىڭ مۇشەلەرى بولىپ تابىلادى, 72-ءسى پارتيا قاتارىندا جوق, تاعى 47-ءسى وزدەرىنىڭ پارتياعا تيەسىلىلىگىن كورسەتپەگەن. تىركەلگەن كانديداتتاردىڭ اراسىندا 9 ۇلتتىڭ وكىلى بار. ولاردىڭ ورتاشا جاسى – 42 جاس, 152 كانديدات جوعارى ءبىلىمدى, 22 كانديداتتىڭ ارنايى ورتا جانە 5 كانديدات ورتا ءبىلىمدى. كانديداتتاردىڭ 55,3 پايىزى مەملەكەتتىك مەكەمەلەردە, ۇيىمدار مەن كاسىپورىنداردا, 33,5 پايىزى كوممەرتسيالىق قۇرىلىمداردا جۇمىس ىستەيدى. ال 6,1 پايىزى ساياسي پارتيالار مەن ۇكىمەتتىك ەمەس ۇيىمداردىڭ قىزمەتكەرلەرى, 5,1 پايىزى باسقا كاسىپ تۇرلەرىمەن اينالىسادى. قازىرگى كەزدە كۇنتىزبەلىك جوسپارعا سايكەس سايلاۋ الدىنداعى ۇگىت كەزەڭى باستالدى, ول 27 ناۋرىزدا ساعات 24.00-دە اياقتالادى. سايلاۋ بولاتىن كۇننىڭ الدىنداعى كۇنى جانە داۋىس بەرۋ كۇنى سايلاۋ الدىنداعى ۇگىتكە تىيىم سالىنادى. 14 ناۋرىزدان باستاپ ۋچاسكەلىك سايلاۋ كوميسسيالارىنىڭ ءۇي-جايلارىندا ازاماتتار سايلاۋشىلار تىزىمدەرىمەن تانىسا الادى, ونداعى وزدەرى تۋرالى مالىمەتتەردى تەكسەرۋى مۇمكىن جانە قاتەلەر جىبەرىلگەن جاعدايدا تۇزەتۋلەر ەنگىزۋدى تالاپ ەتەدى. سايلاۋ ناۋقانى قاجەتتى قارجىلىق جانە ماتەريالدىق-تەحنيكالىق رەسۋرس­تارمەن قامتاماسىز ەتىلگەن جانە سايلاۋ زاڭناماسىنىڭ نورمالارىنا قاتاڭ تۇردە سايكەس جۇرگىزىلەدى. ءاليسۇلتان قۇلانباي, «ەگەمەن قازاقستان».