ۇمىتكەرلەر سانى 21 ادامعا جەتتى

ورتالىق سايلاۋ كوميسسياسى توراعاسىنىڭ ورىنباسارى ۆلاديمير فوسس كەزەكتەن تىس پرەزيدەنتتىك سايلاۋعا كانديدات رەتىندە تاعى ءتورت ادامنىڭ تىركەلگەنىن, كانديداتتار سانى 21 ادامعا جەتكەنىن حابارلادى. ونىڭ ايتۋىنشا, كانديداتتاردىڭ 18-ءى سايلاۋعا ءوزىن ءوزى ۇسىنعاندار. ەكى كانديداتتى, اتاپ ايتقاندا, ن.نازارباەۆتى «نۇر وتان» پارتياسى, ال ت.سىزدىقوۆتى قازاقستاننىڭ كوممۋنيستىك حالىق پارتياسى ۇسىنعان. قازىرگى ۋاقىتتا ۇمىتكەرلەردىڭ سايلاۋ تالاپتارىنا سايكەستىگى تەكسەرىلىپ جاتسا, كەيبىرى لينگۆيستيكالىق كوميسسياعا سىناق تاپسىرۋ ۇستىندە. «سەگىز كانديداتتى تىركەۋدەن باس تارتىلدى. ولاردىڭ 2-ەۋىنىڭ جاسى كونستيتۋتسياعا سايكەس سايلاۋعا ءتۇسۋ جاسىنا تولماعان, 6-ۋى لينگۆيستيكالىق كوميسسيا سىناعىن تاپسىرا المادى. ءتورت ۇمىتكەر لينگۆيستيكالىق كوميسسيا سىناعىنان ءساتتى ءوتتى. ولاردىڭ سايلاۋ تالاپتارىنا سايكەستىگى تەكسەرىلدى. قازىرگى كەزدە سەنىمدى وكىلدەرىن تىركەپ, قول جيناۋ جۇمىسىمەن اينالىسۋدا», – دەدى ۆ.فوسس. سونىمەن قاتار, ول كەشە م.تەلەبەكوۆ, ءا.قۇسايىنوۆ, س.مۇقاش جانە ا.امانتاي ورتالىق سايلاۋ كوميسسياسىنا كەلىپ, پرەزيدەنتتىككە كانديدات رەتىندە تىركەلگەنىن اتادى. بۇدان بولەك, ۆ.فووس پرەزيدەنتتىككە كانديدات رەتىندە تاعى ءبىر ايەل تىركەلگەنىن اتاپ ءوتتى. ول – ۋاقىتشا جۇمىس ىستەمەيتىن شىمكەنتتىك ايگۇل وتەپوۆا. ەندى بۇل كانديدات بەلگىلەنگەن ءتارتىپ بويىنشا لينگۆيستيكالىق كوميسسياعا مەملەكەتتىك ءتىلدى ەركىن مەڭگەرگەندىگى جونىندە سىناق تاپسىرادى. * * * كەشە, سونداي-اق, باق وكىلدەرىنە پرەزيدەنتتىككە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ توراعاسى مىرزاتاي جولداسبەكوۆ كانديداتتىڭ جازبا جۇمىسى ورتالىق سايلاۋ كوميسسياسىنا تاپسىرىلعاننان كەيىن ونى كورسەتۋگە قۇقىقتارى جوق ەكەندىگىن ءمالىم ەتتى. «كەيبىر جۋرناليستەر كانديداتتىڭ جازبا جۇمىستارىن سۋرەتكە ءتۇسىرىپ الۋ ءۇشىن كورسەتۋىمىزدى وتىنۋدە, – دەدى ول وسىعان قاتىستى. – ءبىز مىنانى تۇسىندىرگىمىز كەلەدى, لينگۆيستيكالىق كوميسسيا سىناق اياقتالعاننان كەيىن, ونىڭ قورىتىندىسىن جاريا ەتەدى. كانديداتتىڭ جۇمىسى مەنىڭ قولىمدا تۇرعاندا, بەلگىلى ءبىر دەڭگەيدە ونى كورسەتۋگە قۇقىلىمىن. بىراق, جۇمىستى ورتالىق سايلاۋ كوميسسياسىنا تاپسىرعاننان كەيىن جازبا جۇمىسى رەسمي قۇجاتقا اينالادى. سودان كەيىن ونى كورسەتۋگە قۇقىمىز جوق». م.جولداسبەكوۆ بۇل ماسەلەنى كەشە كەيبىر الەۋمەتتىك جەلىلەردە پرەزيدەنتتىككە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا توراعاسىنان ۇمىتكەرلەردىڭ جازبا جۇمىستارىن كورسەتىپ, سۋرەتكە ءتۇسىرىپ الۋعا مۇمكىندىك بەرۋدى وتىنگەن حاتتار جاريا ەتىلگەنىنە بايلانىستى مالىمدەگەنىن ايتا كەتكەندى ءجون سانادىق. ءاليسۇلتان قۇلانباي, «ەگەمەن قازاقستان».