ەل تىلەگى ەسكەرىلدى. بۇل – بارشانىڭ قالاۋى
نۇرسۇلتان نازارباەۆتىڭ پرەزيدەنت سايلاۋىنا كانديدات بولىپ ۇسىنىلۋىنا وراي وتانداستارىمىزدىڭ ورتاق ويى وسىنداي
كەزەكتەن تىس پرەزيدەنتتىك سايلاۋ مەرزىمى جاقىنداعان سايىن ەلىمىزدەگى ساياسي كۇشتەر بەلسەندىلىك تانىتا باستادى. بۇعان دەيىن ەكى ساياسي پارتيا ءوز قۇرىلتايلارىن وتكىزسە, كەشە سولاردىڭ قاتارىنا قازاقستاننىڭ «اق جول» دەموكراتيالىق پارتياسى قوسىلدى. ياعني, اتالعان پارتيانىڭ ءحىى سەزى ءوتىپ, وندا كەزەكتەن تىس پرەزيدەنتتىك سايلاۋ بويىنشا پارتيانىڭ ۇستانىمى قارالدى. ەسىلدىڭ سول جاعالاۋىندا ورنالاسقان «اق جول» پارتياسىنىڭ ورتالىق وفيسىندە وتكەن قۇرىلتايعا ەلىمىزدىڭ 16 وڭىرىنەن پارتيالىق كونفەرەنتسيادا سايلانعان 121 دەلەگات كەلىپتى. سونىڭ 118-ءى پارتيالىق جيىندا توبە كورسەتسە, قالعان 3-ءۋى بەلگىلى سەبەپتەرمەن قاتىسا المادى. سايلانعان دەلەگاتتاردىڭ وكىلەتتىكتەرى راستالعان سوڭ, ولاردىڭ قۇرامى قوعامنىڭ ءارتۇرلى تابى مەن توبىنان ەكەنى بەلگىلى بولدى. الدىمەن ءسوز العان «اق جول» پارتياسىنىڭ توراعاسى ازات پەرۋاشەۆ كەلەسى جىلى پرەزيدەنتتىك جانە پارلامەنتتىك سايلاۋدىڭ قاتار كەلۋىنە ساراپشىلار بىلتىردان باستاپ نازار قويا باستاعانىن ەرەكشە اتادى. ەل كونستيتۋتسياسىنىڭ 41-بابىنىڭ 3-تارماعى بۇل سايلاۋلاردى بىرگە وتكىزۋگە مۇمكىندىك بەرمەيتىنى ايتىلدى. وسىعان وراي سوزىندە پارتيا باسشىسى ءوز ويىن بىلايشا ءوربىتتى: «ءبىزدىڭ ساياسي جۇيەدە پرەزيدەنت ينستيتۋتى ولشەۋسىز جوعارى تۇرعانىن مويىنداۋىمىز كەرەك, ويتكەنى, ءدال وسى ينستيتۋت مەملەكەتتىك دامۋدىڭ باعىتىن جانە قارقىندارىن ايقىندايدى. سول سەبەپتى, قازاقستان حالقى اسسامبلەياسى پرەزيدەنتتىك سايلاۋدى كەيىنگە قالدىرماي وتكىزۋدى ۇسىندى». ا.پەرۋاشەۆ, سونىمەن قاتار, كەزەكتەن تىس سايلاۋ وتكىزۋدىڭ استارىندا وتاندىق ەكونوميكاعا سىرتقى قاۋىپتەردىڭ بولۋى, بيزنەستىڭ رىنوكتى جوعالتۋى, بانكتەردە قولما-قول تەڭگەنىڭ كەمۋى سياقتى كەلەڭسىزدىكتەردىڭ ورىن الۋى مۇمكىندىگىمەن تۇسىندىرۋگە تىرىستى. بۇل رەتتە, توراعا گەوساياسي قاۋىپتەردىڭ ورىن الۋى فاكتورلارىنىڭ دا جوق ەمەستىگىنە نازار اۋدارتتى. وسىنداي سىرتقى تۇراقسىزدىقتار: تاياۋ شىعىس, ەۋروپا جانە ۋكراينادا ورىن الۋدا. اسىرەسە, قازاقستان ءۇشىن اۋعانستاننان ەكى اي بۇرىن حالىقارالىق كواليتسيالىق كۇشتەردىڭ اكەتىلۋىمەن ايماقتا كيكىلجىڭدەر ورىن الىپ, ەلىمىز شەكاراسى ماڭىندا تىنىشتىق بۇزىلۋى مۇمكىندىگى دە اتالماي قالعان جوق. «وسىلايشا, كەزەكتەن تىس سايلاۋ وتكىزۋ تۋرالى شەشىم – تاكتيكالىق ءتاسىل ەمەس. بۇل كەلە جاتقان قاۋىپ-قاتەرلەردىڭ الدىن الۋمەن بايلانىستى. سوندىقتان دا ءبىزدىڭ پارتيا قازاقستان حالقى اسسامبلەياسىنىڭ باستاماسىن قولدادى. وسىدان «اق جول» پارتياسىنىڭ بۇل پرەزيدەنتتىك سايلاۋعا قاتىسۋى تۋرالى سۇراق تۋىندايدى», دەدى ازات تۇرلىبەك ۇلى. بۇل رەتتە, پارتيا سەركەسى قازاقستاندا جانە ونىڭ سىرتىندا مەملەكەتتىك ورگاندار جۇمىسىنا ىرعاق بەرەتىن, ەكونوميكاعا پروگرەسسيۆتى مىندەتتەر قويا بىلەتىن جانە ۇلتتى ۇيىستىرا الاتىن نۇرسۇلتان نازارباەۆقا تەڭەسەر ساياسي جانە مەملەكەتتىك تۇلعا جوق دەگەندى دە باسا ايتتى. ول, سونداي-اق, ۇلتتىق مۇددەلەردى العا جىلجىتۋ مەن مەملەكەتتىلىكتى نىعايتۋ; وندىرىستىك ەكونوميكانى قۇرۋ مەن كاسىپكەرلەردى قولداۋ باعىتتارىندا نۇرسۇلتان نازارباەۆتىڭ كوپ نارسە ىستەگەنىن جانە ىستەي الاتىنىن ەرەكشە اتادى. «ءبىز ميللياردتاعان ينۆەستيتسيالار تارتۋ, كاسىپورىندارىمىزدى زاماناۋي قۇرالدارمەن جابدىقتاۋ, قىزمەتكەرلەرىمىزدى شەتەلدە وقىتۋ, حالىقارالىق نارىققا ەركىن شىعۋ جانە باسقا دا كوپتەگەن مۇمكىندىكتەرگە يە بولىپ وتىرمىز. 20 جىل بۇرىن بىزدە مۇنىڭ بىردە-ءبىرى بولعان ەمەس. بىزگە ۇلكەن بيزنەسكە جول اشقان – نۇرسۇلتان نازارباەۆ. ول ءبىزدى ۇيرەتتى, كومەكتەستى, باعىت بەردى جانە جاڭا جەڭىستەرگە شابىتتاندىردى», دەدى «اق جول» پارتياسىنىڭ باسشىسى ءسوزىن قورىتىندىلاي كەلىپ. ءسويتتى دە, 26 ساۋىردەگى پرەزيدەنتتىك سايلاۋدا «اق جول» دەموكراتيالىق پارتياسى نۇرسۇلتان نازارباەۆتىڭ كانديداتۋراسىنا قولداۋ كورسەتسىن دەگەن ۇسىنىس ەنگىزدى. بۇل ۇسىنىس سەزد دەلەگاتتارى تاراپىنان قولداۋ تاپتى. اسقار تۇراپباي ۇلى, «ەگەمەن قازاقستان». استانا. جاستار – ەلباسىنىڭ سەنىمدى تىرەگى «نۇر وتان» پارتياسى اقتوبە قالالىق فيليالىنىڭ جانە «جاس وتان» جاستار قاناتى بەلسەندىلەرىنىڭ ۇيىمداستىرۋىمەن تۇڭعىش پرەزيدەنت اتىنداعى ورتالىق مادەنيەت جانە دەمالىس ساياباعىندا «نۇر وتان» پارتياسىنىڭ كەزەكتى حVI سەزىندە كەزەكتەن تىس پرەزيدەنتتىك سايلاۋعا ۇمىتكەر رەتىندە ۇسىنىلعان ەلباسى ن. نازارباەۆتىڭ كەلىسىم بەرۋىنە ارنالعان فلەش-موب وتكىزىلدى. وعان «نۇر وتان» پارتياسىنىڭ وبلىستىق جانە قالالىق ساياسي كەڭەسىنىڭ مۇشەلەرى, قالالىق ءماسليحات دەپۋتاتتارى, باستاۋىش پارتيا ۇيىمدارىنىڭ توراعالارى, «جاس وتان» جاستار قاناتىنىڭ بەلسەندىلەرى قاتىستى. بارلىعى 500-دەن استام ادام قاتىسقان فلەش-موب ىرعاقتى قيمىلمەن بىرگە جاستاردىڭ ەلباسىنىڭ سايلاۋعا تۇسۋگە كەلىسىم بەرگەنىنە دەگەن ىستىق ىقىلاستارىمەن, سونداي-اق, پرەزيدەنتتىكتەن ۇمىتكەر نۇرسۇلتان نازارباەۆتى قولدايتىندىقتارىن بىلدىرگەن تىلەكتەرىمەن استاسىپ جاتتى. – بۇل كۇن قازاقستاندىقتاردىڭ ەسىندە ايرىقشا ساقتالادى. نۇرسۇلتان ءابىش ۇلى قازاقستاندىقتاردىڭ ءوزىن وسى جولى دا ۇمىتكەر رەتىندە پرەزيدەنتتىك سايلاۋعا ۇسىنۋدى قالاعان تىلەكتەرىن جەرگە تاستامادى, وزىندىك تاريحي شەشىم جاسادى. سەزد دەلەگاتتارى نۇرسۇلتان نازارباەۆتىڭ كەلىسىمىن ءبىراۋىزدان قولدادى, بەكىتتى. بۇل ەلى سەنگەن ەردىڭ ءىسى بولدى. مۇنىڭ ءوزى قازاقستاندى دامىعان 30 ەلدىڭ قاتارىنا ەنگىزۋگە باعىت ۇستاعان باتىل قادامىن العا اپارۋعا تاعى ءبىر مۇمكىندىك تۋعىزادى دەگەن سەنىمگە جەتەلەيدى. پرەزيدەنتتىڭ «نۇرلى جول» باعدارلاماسىن جۇزەگە اسىرۋىنا العىشارت جاسايدى. سونداي-اق, «نۇر وتان» پارتياسىنىڭ كەزەكتى XVI سەزىندە سويلەگەن سوزىندە مەملەكەت باسشىسى قازاقستان قوعامىن دامىتۋدىڭ بەس باعىتىن ۇسىندى. مۇنىڭ ءبارى الەمدىك داعدارىس جاعدايىندا العا باسۋدىڭ ناقتى ىستەرىمەن ايقىندالاتىنىن دا تالداپ جەتكىزدى. مىنە, وسىنى تۇسىنگەن جاستاردىڭ وسىنداي باستاما جاساپ, يگى شارا وتكىزىپ قولداۋىنىڭ ءوزى نۇرسۇلتان ءابىش ۇلىنا دەگەن ەل سەنىمىنىڭ ايقىن كورىنىسى دەۋ ورىندى بولماق, – دەدى پارتيانىڭ وبلىستىق فيليالى ساياسي كەڭەسىنىڭ مۇشەسى جۇمابەك كۋكانوۆ. – مەن بولاشاق مەتاللۋرگپىن, «جاس وتان» جاستار قاناتىنىڭ بەلسەندى مۇشەسىمىن. پارتيانىڭ كەزەكتى XVI سەزىندە «نۇر وتان» پارتياسىنىڭ اتىنان قازىرگى ەلباسى ن.نازارباەۆتىڭ الدا بولاتىن كەزەكتەن تىس پرەزيدەنتتىك سايلاۋعا ءوز كانديداتۋراسىن ۇسىنعان پارتيالاستارىنىڭ سەنىمىنە كەلىسىم بەرگەن تاريحي شەشىمىنە وراي وسى شارانى ۇيىمداستىرىپ وتىرمىز. جاستاردىڭ ازاماتتىق كوزقاراسى – قازاقستاننىڭ بولاشاعىن ايقىندايتىن ۇستانىم. ءبىز ەلباسىنىڭ ەل تىزگىنىن ۇستاپ, حالقىنىڭ ەرتەڭى ءۇشىن ەرەن ەڭبەك ەتۋىنە سەنىم ارتامىز, – دەدى ق.جۇبانوۆ اتىنداعى اقتوبە مەملەكەتتىك وڭىرلىك ۋنيۆەرسيتەتىنىڭ II كۋرس ستۋدەنتى يسلام ەسەنعازيەۆ. تۇڭعىش پرەزيدەنت اتىنداعى ورتالىق مادەنيەت جانە دەمالىس ساياباعىندا ۇيىمداستىرىلعان فلەش-موب ءوتىپ جاتقاندا كۇن رايى دا جارقىراپ تۇردى. سالتاناتتى شارا كوكتەمنىڭ نۇرلى شۋاعىنا مالىنىپ, جاستاردىڭ جارقىن جۇزدەرىمەن, اسەم دە ىرعاقتى بيلەرىمەن اجارلانىپ جۇرە بەردى. ساتىبالدى ءساۋىرباي, «ەگەمەن قازاقستان». اقتوبە.قارىشتى قازاقستان ءۇشىن
ورال قالاسىندا ءارى وبلىستىڭ بارلىق اۋدان ورتالىقتارىندا ءبىر مەزگىلدە وتكىزىلگەن جاستار ۇيىمدارىنىڭ فلەش-موبىندا پرەزيدەنتتىك سايلاۋعا قاتىستى قولداۋ شارالارى كورىنىس تاپتى. قازاقستاننىڭ باتىستاعى قاقپاسىنىڭ مانشۇك مامەتوۆا اتىنداعى الاڭىنا جينالعان جۇزدەگەن جاس «سەنىڭ داۋىسىڭ – سەنىڭ بولاشاعىڭ!», «جاستار سايلاۋدى قولدايدى», «ءبىز – قارىشتى قازاقستان ءۇشىن» دەپ جازىلعان ۇراندار مەن پلاكاتتاردى جوعارى كوتەرىپ ۇستاپ شىعىپ, بيىلعى 26 ساۋىردە وتكىزىلەتىن پرەزيدەنتتىك سايلاۋعا تۇرعىنداردى تۇگەل قاتىسۋعا شاقىردى. – ەلىمىزدىڭ تۇراقتى ءارى ورنىقتى دامۋىن قامتاماسىز ەتۋ ءىسى تەك جوعارى جاقتا جاسالمايدى. وعان ەل جاستارى مەن ستۋدەنتتەرى دە قاتىسىپ, ءوز ۇلەستەرىن قوساتىن بولسا جانە قوعامدا بولىپ جاتقان ۇدەرىستەرگە بەلسەندى تۇردە ارالاسسا, مەملەكەتىمىزدىڭ بولاشاعى دا سوعۇرلىم جارقىن بولا تۇسەدى, – دەدى فلەش-موب بارىسىندا گازەت تىلشىسىنە باتىس قازاقستان وبلىستىق جاستار ساياساتى ماسەلەلەرى باسقارماسى باسشىسىنىڭ مىندەتىن اتقارۋشى نۇرلىبەك داۋموۆ. بۇگىنگى فلەش-موبتىڭ باستى ماقساتى دا وسى, دەدى ول ودان ءارى. وسى اكتسيانىڭ شەڭبەرىندە ءبىز جاستاردى وڭ قوعامدىق قۇبىلىستاردىڭ ءبىر جاق شەتىندە قالىپ قويماۋعا شاقىرامىز. ءاربىر قازاقستاندىق ورەن ءوز داۋىسى مەملەكەتىمىزدىڭ قالىپتى دامۋ ۇدەرىسىنە ءبىر تامشى بولىپ قوسىلاتىنىن سەزىنە السا, العا قويعان ماقساتىمىزدىڭ ورىندالعانى. ءيا, جايىقتاعى جاستار جەتەكشىسى ايتقانداي, مۇندا ەل ەرتەڭى بولىپ تابىلاتىن بۇگىنگى ۇرپاق وكىلدەرىنىڭ ازاماتتىق بەلسەندىلىكتەرى جوعارى ەكەندىكتەرى باسقوسۋ مەن جيىن بارىسىندا دا ايقىن اڭعارىلىپ تۇردى. فلەش-موبقا قاتىستى ءىس-شارالار شەڭبەرىندە وعان قاتىسۋشىلار «قازاقستان-2050» ەمبلەماسى بەلگىلەنگەن پلاكاتقا سايلاۋعا تەگىستەي قاتىسۋ جونىندەگى ۇنقوسۋدى بىلدىرەتىن قولدارىن قويىپ, ونى گەلدى شارلاردىڭ كومەگىمەن اسپانعا ۇشىردى. جايىق جاستارىنىڭ اق نيەتتەرى مەن تىلەكتەرىن قولداعانداي كەشەگى كۇنى بيىلعى كوكتەمنىڭ العاشقى شۋاعى سەزىلىپ تۇردى. تەمىر قۇسايىن, «ەگەمەن قازاقستان». ورال. عالىمدار الداعى سايلاۋعا ۇن قوستى الماتىداعى عىلىم ورداسىندا وتاندىق عىلىمعا ەڭبەگى سىڭگەن عالىمدار باس قوسىپ, 26 ساۋىردە وتەتىن پرەزيدەنتتىك سايلاۋعا تۇسەتىن ەلباسى نۇرسۇلتان نازارباەۆتىڭ كانديداتۋراسىنا قولداۋ كورسەتتى. ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ عىلىم وكىلدەرىنىڭ كەلەلى باسقوسۋىندا ەگەمەندىك العاننان بەرگى مەملەكەت تاريحىن قىسقاشا بايانداپ, ءوز الدىنا تىزگىن ۇستاپ كەتكەن تاعدىرلاس ەلدەردىڭ جاعدايى مەن تاۋەلسىز قازاقستاننىڭ ءومىر جولىنا, ۇستانعان باعىتى مەن جەتكەن جەتىستىكتەرىنە ارنايى توقتالدى. دەربەس قادامىن ءتاي-ءتاي باسىپ, وزىندىك جاڭا تاريح بەلەسىنە ۇمتىلعان جاس مەملەكەتتىڭ تىزگىنى مەن جاۋاپكەرشىلىگىن باتىل تۇردە قولعا العان ەلباسى نۇرسۇلتان نازارباەۆتىڭ شيرەك عاسىرعا جۋىق ۋاقىت ىشىندە اتقارعان ىستەرى مەن سىڭىرگەن ەڭبەگى ءسوز بولدى. – ەلباسى نۇرسۇلتان نازارباەۆتىڭ وسى ۋاقىتقا دەيىنگى جۇرگىزگەن سىندارلى دا ساليقالى ىشكى-سىرتقى ساياساتىنىڭ ارقاسىندا قازاقستان بۇگىنگى تاڭدا حالىقارالىق قوعامداستىق كوشىندە ۇلكەن بەدەلگە يە مەملەكەت رەتىندە بارشا الەمگە ءمالىم بولىپ وتىر. ەلىمىزدىڭ الەمدىك ورتاداعى ابىرويى قازىرگى پرەزيدەنتىمىزدىڭ ەسىمىمەن تىكەلەي بايلانىستى. ونىڭ حالىقارالىق قوعامداستىق الدىندا كوتەرىپ وتىرعان ۇسىنىستارى جوعارى دەڭگەيدە باعالانىپ, ادامزاتقا ورتاق تۇراقتىلىق پەن تىنىشتىق جولىندا قىزمەت ەتۋدە. ءبىزدىڭ عىلىمي ورتا, ەلىمىزگە جانە الەمدىك عىلىمي كەڭىستىككە كەڭىنەن تانىمال عالىمدارىمىز ەلباسى نۇرسۇلتان نازارباەۆتىڭ كانديداتۋراسىن قولدايمىز جانە قۋاتتايمىز, – دەدى مۇرات جۇرىنوۆ. جيىن بارىسىندا مىنبەرگە شىعىپ ءسوز سويلەگەن عالىمدار الداعى سايلاۋعا نۇرسۇلتان نازارباەۆتىڭ ءتۇسۋى ەل ەكونوميكاسىنداعى تۇراقتىلىق پەن ازاماتتىق قوعامنىڭ ىلگەرى باسۋىنا, جالپى قازاق ەلىنىڭ كەلەشەكتە الەمدىك ساياسي ورتادا مىعىم بولۋىنا ۇلكەن ىقپال ەتەتىندىگىن ايتتى. قانات ەسكەندىر, «ەگەمەن قازاقستان». الماتى.
