بىرتەكتى حالىقپىز,ءبىرتۇتاس ۇلتپىز

كەشە ورتالىق كوممۋنيكاتسيالار قىزمەتىندە قازاقستان حالقى اسسامبلەياسىنىڭ وكىلدەرى بريفينگ وتكىزىپ, «نۇر وتان» پارتياسى حVءى سەزىنىڭ شەشىمدەرى بويىنشا وزدەرىنىڭ ويلارىن ورتاعا سالدى. بريفينگكە قحا توراعاسىنىڭ ورىنباسارى اناتولي باشماكوۆ, كومپوزيتور, قحا كەڭەسىنىڭ مۇشەسى تولەگەن مۇحامەدجانوۆ, قاراشاي-بالقار ەتنومادەني بىرلەستىگىنىڭ ءتورايىمى, قحا كەڭەسىنىڭ مۇشەسى ليۋدميلا حوچيەۆا جانە پاۆلودار وبلىسىنداعى قحا جاستار بىرلەستىكتەرىنىڭ ۇيلەستىرۋشىسى ەلينا پاۋلي قاتىستى. العاشقى بولىپ ءسوز العان ا.باشماكوۆ سەزدىڭ ەرەكشە بەلەس بولعانىن اتاپ ءوتتى. ونداعى ەڭ باس­تى ماسەلە پارتيا اتىنان پرەزيدەنت سايلاۋىنا ۇمىتكەر بولۋعا ن.نازارباەۆتىڭ كەلىسىمىن بەرگەنى بولدى. سونىمەن بىرگە سەزدە پرەزيدەنتتىڭ سويلەپ, بەس حالىقتىق رەفورمالار تۋرالى ايتقانى قازاقستان قوعامىنىڭ بۇگىنگى جانە الداعى ۋاقىتتاعى ءومىرىنىڭ باستى باعاسى بولدى دەپ سانايمىن, دەدى. ودان ءارى ا.باشماكوۆ پرەزيدەنت جاريالاعان رەفورمالارعا ءوز تاراپىنان تۇسىنىكتەر بەرىپ, ولاردىڭ ماڭىزدىلىعىن تىڭداۋشىلارعا جەتكىزۋگە تىرىستى. سونىڭ ىشىندە قازاقستاندىقتاردىڭ بولاشاقتا ءبىرتۇتاس ۇلت بولاتىندىعىن جانە ماڭگىلىك ەل يدەياسىن ىسكە اسىرۋدا ونىڭ ماڭىزى زور ەكەندىگىن ايتتى. وسى ارادا 17 ميلليون قازاقستاندىقتاردىڭ مىزعىمايتىن ءبىر ۇلت ەكەندىگى تۋرالى ءوزىنىڭ ءبىر اۋىز ولەڭىن دە ايتىپ بەرىپ, بۇل يدەيانىڭ ءوزىنىڭ ويىنان شىققانىن جەتكىزدى. ءسوزىنىڭ سوڭىندا اسسامبلەيا توراعاسىنىڭ ورىنباسارى سەزدە ايتىلعان ن.نازارباەۆتىڭ باعدارلامالىق سوزدەرى ءبىزدىڭ ەلىمىزدىڭ ەكونوميكالىق, ۇيىمدىق, فيلوسوفيالىق قالىپتاسۋىن انىقتاپ قانا قويماي, الداعى ۋاقىتتا دامۋىنىڭ نەگىزگى باعدارى بولاتىنىن جەتكىزدى. سونىمەن بىرگە, ول بارلىق قازاقستاندىقتاردى 26 ساۋىردە ءبىر كىسىدەي سايلاۋعا قاتىسۋعا شاقىردى. ءوزىنىڭ سوزىندە كومپوزيتور تولەگەن مۇحامەد­جانوۆ تا ەلباسىنىڭ «بولاشاعى ءبىرتۇتاس ۇلت» دەگەن ءسوزىنىڭ مازمۇنىنا تەرەڭ بويلاپ, ونىڭ ماڭىزدىلىعىن اشۋعا تىرىستى. بۇل بىردەي قۇقى مەن مۇمكىنشىلىكتەرى بار ءبىر ەلدىڭ شەكاراسىندا ءومىر سۇرەتىن, ءبىر تاعدىرلى قازاقستان حالقى دەگەن ءسوز. سونىمەن قاتار, ول ەلباسىنىڭ قازاق حالقىنىڭ موينىنا ءبارىنىڭ ۇيىستىرۋشىسى بولۋ تۋرالى ماڭىزدى مىندەت جۇكتەلىپ وتىر دەگەن ءسوزىن دە ەسكە سالىپ ءوتتى. ودان ءارى شەشەن قازاقستان حالقى اسسامبلەياسىنىڭ اتقارىپ وتىرعان قىزمەتتەرىنە, قازاقستان حالقىنىڭ بىرلىگى مەن ىنتىماعىن ساقتاۋداعى ەڭبەگىنە جوعارى باعا بەردى. ءسوز كەزەگى وزىنە تيگەندە ل.حوچيەۆا قازاقستاندا تۇراتىن بارلىق ەتنوستار دا پرەزيدەنتتىڭ سەزدەگى بارلىق سوزدەرىنە, اسىرەسە, بارلىق ەتنوستىڭ دا تەڭ قۇقىلى ءبىرتۇتاس قازاقستاندىق ۇلت قاتارىنا ەنەتىنىنە  ءتانتى بولعانىنا, ونىڭ قازاقستاندى العا دامىتۋ باعدارىن بەلگىلەگەنىنە ريزا بولعاندارىن جەتكىزدى. جاستار اتىنان سويلەگەن ە.پاۋلي پرەزيدەنت العا قويىپ وتىرعان مىندەتتەردى ىسكە اسىرۋ جاۋاپ­كەرشىلىگى جاستاردىڭ موينىنا ءتۇسىپ وتىرعانىن, بۇل ءىستى جاس ازاماتتار وتان مىندەتى دەپ ۇعىناتىنىنا سەنىم ءبىلدىردى. جاقسىباي سامرات, «ەگەمەن قازاقستان».