اقتوبەدە جول-كولىك وقيعالارى ازايار ەمەس

اقتوبە. 12 ناۋرىز. اقتوبەدە جول-كولىك اپاتىنان بولاتىن ادام ءولىمى ازايار ەمەس. بۇل تۋرالى egemen.kz ءتىلشىسى حابارلادى. قازىرگى تاڭدا اقتوبە وبلىستىق ىشكى ىستەر دەپارتامەنتى باسشىلىعىن جول-كولىك وقيعاسى سالدارىنان ورىن العان ادام ءولىمى ماسەلەسى ەرەكشە الاڭداتىپ وتىر. جىل باسىنان بەرى وبلىستىڭ اۆتو جولدارىندا بولعان اپاتتان 20 ادام كوز جۇمدى. بۇل وتكەن جىلدىڭ وسى كەزەڭىمەن سالىستىرعاندا ەكى ەسەگە كوپ. جۇرگىزىلگەن مونيتورينگ ناتيجەسىنە سايكەس اۋىر زارداپتارعا الىپ كەلگەن جول-كولىك وقيعالارىنىڭ باستى سەبەبى – جۇرگىزۋشىلەردىڭ كولىك جۇرگىزۋ ءتارتىبىنىڭ تومەندىگى, اتاپ ايتقاندا, جىلدامدىق رەجيمىن بۇزۋ, جولدىڭ قارسى باعىتىنا شىعىپ كەتۋ, كولىك قۇرالىن ماس كۇيىندە باسقارۋدان ەكەنى انىقتالدى. وسىعان بايلانىستى جول قوزعالىسى ەرەجەلەرىن ورەسكەل بۇزۋشىلىقتاردىڭ الدىن الۋ مەن جولىن كەسۋ ماقساتىندا بيىل وبلىس اۋماعىندا بەس پروفيلاكتيكالىق ءىس-شارا وتكىزىلدى. مىسالى, 7-9 ناۋرىز ارالىعىندا «ماس جۇرگىزۋشى – قىلمىسكەر» اتتى جەدەل الدىن الۋ ءىس-شاراسى ۇيىمداستىرىلىپ, سونىڭ ناتيجەسىندە, جول قوزعالىسى سالاسىندا ءبىر جارىم مىڭنان استام ەرەجە بۇزۋشىلىق انىقتالدى. سونىڭ ىشىندە, جىلدامدىق رەجيمىن بۇزعان 125 جۇرگىزۋشى اكىمشىلىك جاۋاپكەرشىلىككە تارتىلدى, كولىكتى ماس كۇيىندە باسقارعان 51 جۇرگىزۋشى ۇستالىپ, جولدىڭ قارسى باعىتىنا شىعىپ كەتۋدىڭ 5 دەرەگى انىقتالدى. ساتىبالدى ءساۋىرباي. دەرەك: egemen.kz. سۋرەت: today.kz.