اقتوبەدە انالارعا التىن جانە كۇمىس القالار تاپسىرىلدى

اقتوبە. 12 ناۋرىز. اقتوبە قالاسى اكىمىنىڭ ورىنباسارى ايگۇل ارىنعازيەۆا ءبىر توپ كوپ بالالى انالارعا «التىن القا» جانە «كۇمىس القا» بەلگىلەرىن سالتاناتتى تۇردە تابىستادى. بۇل تۋرالى egemen.kz ءتىلشىسى حابارلادى. اكىم ورىنباسارىنىڭ ايتۋىنشا, بۇگىنگى كۇنى قالامىزدا 5971 كوپ بالالى انا تۇرادى, ونىڭ ىشىندە 1285-ءى «التىن القا», 1513-ءى «كۇمىس القا» يەگەرلەرى. سونداي-اق, 285 «باتىر انا», 342 I, II, III دارەجەلى مەدال يەگەرلەرى بار. ايگۇل ارىنعازيەۆا قالا اكىمدىگى كوپبالالى انالارعا قولداۋ كورسەتۋدى داستۇرگە اينالدىرعانىن, وسى جولى سونداي سەگىز اناعا «التىن القا» جانە «كۇمىس القا» بەلگىلەرى تاپسىرىلعانىن ايتىپ ءوتتى. ودان بولەك, ول جىل ساناپ كوپ بالالى انالار قاتارىندا جاس انالار سانى ارتىپ كەلە جاتقانىن جەتكىزدى. ارنايى ۇيىمداستىرىلعان جيىندا ايگۇل ارىنعازيەۆا ەلباسى نۇرسۇلتان نازارباەۆتىڭ جارلىعىنا سايكەس, اقتوبەلىك رايحان ءالجانوۆا, الما قارابالينا, مارجانگۇل قاسەنوۆا, گۇلميرا پاحريددينوۆا جانە ايتكۇل ورازىنبەتوۆاعا «التىن القا», ال گۇلميرا جۇماعاليەۆا, قىزعالداق نياز, رايحان ناۋرىزاليناعا «كۇمىس القا» بەلگىلەرىن تابىس ەتتى. ساتىپالدى ءساۋىرباي. دەرەك: egemen.kz. سۋرەت: qiyan.kz.