قازاقستان كاسىپوداقتارى باسشىسى ۇمىتكەرلىككە قۇجات تاپسىردى

استانا. 12 ناۋرىز. قازاقستان كاسىپوداقتارىنىڭ باسشىسى, قاراعاندى وبلىسىنىڭ بۇرىنعى اكىمى ابىلعازى قۇسايىنوۆ پرەزيدەنتتىككە ۇمىتكەر رەتىندە ورتالىق سايلاۋ كوميسسياسىنا قۇجات تاپسىردى. بۇل تۋرالى bag.kz حابارلادى. ورتالىق سايلاۋ كوميسسياسىنا كەلگەن ابىلعازى قالياقپار ۇلى جۋرناليستەرگە سۇحبات بەرىپ, بۇل قادامعا نەلىكتەن بارعاندىعىن جانە قانداي ناتيجە كۇتەتىندىگىن اڭگىمەلەپ بەردى. – داۋىس بەرۋ ۋاقىتى باستالمايىنشا سايلاۋدىڭ ناتيەجەلەرى تۋرالى ايتۋ ارتىقتاۋ. پرەزيدەنت سايلاۋى – قوعامداعى وزەكتى ماسەلەلردى كوتەرىپ, ءاربىر ازاماتتىڭ ماڭىزدى پروبلەمالارىنا نازار اۋدارۋعا شاقىراتىن شارا. ماسەلەن, ول ەكولوگيالىق جانە وندىرىستىك قاۋىپسىزدىك سىندى ماسەلەلەر بولۋى مۇمكىن, – دەدى ءا.قۇسايىنوۆ. ءا.قۇسايىنوۆ 1952 جىلى 6 اقپاندا قاراعاندى وبلىسىنىڭ تەلمان اۋدانى مايوزەك كەنتىندە تۋعان. قاراعاندى تاۋ-كەن تەحنيكۋمىنىڭ تاۋ-كەن فاكۋلتەتىن (1971 ج.) تەحنيك-شاحتا سالۋشى ماماندىعى بويىنشا; قاراعاندى پوليتەحنيكالىق ينستيتۋتىنىڭ اۆتوجول فاكۋلتەتىن (1981 ج.) ينجەنەر-مەحانيك ماماندىعى بويىنشا; رەسەي باسقارۋ اكادەمياسىنىڭ ساياساتتانۋ فاكۋلتەتىن (1992 ج.) ساياساتكەر (الەۋمەتتىك-ساياسي ماسەلەلەر جانە بايلانىس بويىنشا كەڭەسشى) ماماندىعى بويىنشا بىتىرگەن. ەڭبەك ءوتىلىنىڭ ءار جىلدارىندا ول ەكونوميكا جانە ساۋدا ۆيتسە-ءمينيسترى, يندۋستريا جانە ساۋدا ۆيتسە-ءمينيسترى, كولىك جانە بايلانىس ۆيتسە-ءمينيسترى, كولىك جانە بايلانىس ءمينيسترى, قاراعاندى وبلىسىنىڭ اكىمى قىزمەتىن اتقارعان. قازىرگى تاڭدا ابىلعازى قالياقپار ۇلى قازاقستان كاسىپوداقتارىنىڭ باسشىسى. جولدىباي بازار. دەرەك, سۋرەت: bag.kz.