كەشەگى ويىنداردا قىزىل قاعاز قانشالىقتى ءادىل بولدى؟ (ۆيدەو)

استانا. 12 ناۋرىز. كەشە تۇندە چەمپيوندار ليگاسىنىڭ 1/8 فينالىندا ەكى ويىن ءوتتى. بۇل تۋرالى egemen.kz حابارلادى. ءبىر قىزىعى, ەكى ويىندا دا قىزىل قاعاز تىركەلىپ, فۋتبولشىلار الاڭنان قۋىلدى. ءدال وسى جايت جانكۇيەرلەر اراسىندا قىزۋ تالقىعا تۇسۋدە. كوپشىلىگى تورەشىلەردىڭ تىم اسىرا سىلتەپ جىبەرگەنىن ايتۋدا. ءتىپتى كەيبىر جانكۇيەرلەر ««چەلسيگە» تورەشى دە كومەكتەسە المادى. «شىن شەبەرگە تۇساۋ جوق» دەگەن وسى», – دەپ قىزىل قاعازدىڭ ورىنسىز بولعانىن سىنعا الۋدا. قالاي دەسەك تە, بولعان ءىس بولدى, بوياۋى ءسىڭدى. ەندى پسج-نىڭ شيرەك فينالداعى العاشقى ويىنىنا زلاتان يبراگيموۆيچ قاتىسا المايدى. «باۆاريا» مەن «شاحتەر» (دونەتسك) اراسىنداعى ويىندا باس قازى قالتاسىنداعى قىزىل قاعازدى 3-مينۋتتا-اق پايدالاندى. ءوز ايىپ الاڭىندا ماريو گەتتسەنى شالىپ جىققان الەكساندر كۋچەر دەنەسى قىزىپ تا ۇلگەرمەستەن, الاڭنان كەتۋگە ءماجبۇر بولدى. ول ازداي باس قازى «باۆاريانىڭ» پايداسىنا پەنالتي بەلگىلەدى. بۇل جەردە دە قىزىل قاعازدىڭ ادىل بولماعانى ايتىلۋدا. جانكۇيەرلەر اراسىندا «سارى قاعازبەن شەكتەلسە دە ەشكىم رەنجىمەيتىن ەدى. ءتىپتى ميۋنحەندىكتەر دە «نەگە قىزىل قاعاز ەمەس؟» دەپ شۋ شىعارمايتىنى انىق. بىراق تورەشىنىڭ ويى مۇلدەم باسقا بولىپ شىقتى», – دەگەن سىڭايداعى پىكىرلەر تۋىنداۋدا. ءسىز, قالاي ويلايسىز, قۇرمەتى وقىرمان؟ قىزىل قاعاز قانشالىقتى ءادىل بولدى؟ ەلامان قوڭىر. دەرەك: egemen.kz. سۋرەت: twitter.com.