بوريس نەمتسوۆتى ولتىرۋگە تاپسىرىس بەرۋشىنىڭ اتى اتالدى

استانا. 12 ناۋرىز. رەسەيلىك بەلگىلى ساياساتكەر بوريس نەمتسوۆتىڭ ءولتىرىلۋى بويىنشا تەرگەۋشىلەر وتكەن اپتادا ەلدىڭ پرەزيدەنتى ۆلاديمير پۋتينگە بۇل اتىشۋلى قىلمىستى ۇيىمداستىرۋشىنىڭ فاميلياسى مەن تاپسىرىستى ورىنداۋشىلاردىڭ كەيبىرىنىڭ اتى-ءجونىن اتادى. بۇل تۋرالى «نوۆايا گازەتا» باسىلىمىنا سىلتەمە جاساعان «دوجد» تەلەارناسى حابارلادى. اقپارات قۇرالىنىڭ حابارلاۋىنشا, نەمتسوۆتى ءولتىرۋدى ۇيىمداستىرۋى مۇمكىن ادامنىڭ اتى - رۋسلان. «اسكەري شەنى - مايور. ونىڭ فاميلياسى پرەزيدەنتكە بەلگىلى, دۇيسەنبى كۇنى گروزنىيدا ءدال وسى ادامنان جاۋاپ الىندى, اقپاراتتىڭ باسپاسوزگە شىعىپ كەتۋىنە جول بەرىلمەي, بىراق رۋسلاننىڭ جاقىن تۋىسى شەشەننىڭ كۇش قۇرىلىمدارىنىڭ جوعارى لاۋازىمدى وكىلى دەلىندى», - دەپ جازادى «نوۆايا گازەتا». باسىلىمنىڭ مالىمەتىنشە, رۋسلان «سولتۇستىك» باتالونىندا قىزمەت ەتكەن جانە «بىرنەشە مارتە ماراپاتتالعان». سوڭعى كەزدەرى رۋسلان ماسكەۋگە بارعان, بۇل جاقتا ونىڭ ەكى اعايىنى جۇمىس ىستەيدى. «مايور رۋسلاننىڭ" فاميلياسى ىشكى ىستەر مينيسترلىگى, فەدەرالدىق قاۋىپسىزدىك قىزمەتى, تەرگەۋ كوميتەتىنىڭ ونداعان, ءتىپتى, جۇزدەگەن قىزمەتكەرىنە تانىس ەكەن. ول ماقالا اۆتورلارىنا دا بەلگىلى كورىنەدى, بىراق ولار «كىناسىزدىك پرەزۋمپتسياسىن ەسكەرە وتىرىپ», ونىڭ اتىن اتاماۋدى ءجون كورگەن. «ەحو موسكۆى» راديوسى بولسا, ماقۇلدانباعان اقپارات بويىنشا پۋتينگە باياندالعان مالىمەتتە رۋسلان گەرەمەەۆ تۋرالى ايتىلاتىنىن حابارلادى. ول كەزىندە نەمتسوۆتىڭ ءولىمى تۋرالى ءىس بويىنشا نەگىزگى كۇدىكتى زاۋر داداەۆپەن بىرگە ماراپاتقا يە بولعان. «رۋسلاننىڭ اعايى - سۇلەيمان گەرەمەەۆ, شەشەنستاننىڭ سەناتورى, ونىڭ ەسىمى باسپاسوزدە رۋسلان ياماداەۆتىڭ, موۆلادي بايساروۆتىڭ, اننا پوليتكوۆسكايانىڭ ولىمدەرىنە جانە قىلمىس الەمىنىڭ سەركەسى رۋسلان اتلانگەريەۆتىڭ ۇرلانۋىنا قاتىستى ماتەريالداردا اتالادى. رۋسلاننىڭ ەكىنشى اعايى - ۆاحا گەرەمەەۆ, شەشەنستاننىڭ شەلكوۆسكي اۋدانى بويىنشا ىشكى ىستەر ءبولىمىنىڭ باستىعى. ونىڭ نەمەرە اعاسى - مەملەكەتتىك دۋما دەپۋتاتى ادام دەليمحانوۆ», - دەپ حابارلادى راديوستانتسيا. ۆلاديمير ءپۋتيننىڭ ءباسپاسوز حاتشىسى دميتري پەسكوۆ «نوۆايا گازەتا» باسىلىمىنىڭ اقپاراتىنا قاتىستى تۇسىنىك بەرىپ, بۇل مالىمەتتى قيسىنسىز دۇنيە دەپ اتادى. ەسكە سالا كەەتيىك, 8 ناۋرىزدا ماسكەۋدە ساياساتكەر بوريس نەمتسوۆتىڭ ءولىمى تۋرالى ءىس بويىنشا بەس ايىپتالۋشىنىڭ تۇتقىندالعانى حابارلانعان ەدى. ولار – «سولتۇستىك» باتالونى كومانديرىنىڭ ەكس-ورىنباسارى زاۋر داداەۆ, شاگيت جانە ازور گۋباشەۆتار, رامزات باحاەۆ پەن تامەرلان ەسكەرحانوۆ. نەگىزگى كۇدىكتى داداەۆ اۋەلى ساياساتكەردىڭ ولىمىنە قاتىسى بارىن مويىندادى دا. كەيىن ءوز سوزىنەن باس تارتتى. شەشەنستان باسشىسى رامزان قادىروۆ داداەۆتى قورعاپ, ونى «رەسەيدىڭ ناعىز پاتريوتى» دەپ اتادى. مۇرات ايتقوجا. دەرەك, فوتو: «دوجد».