پاۆلودار وبلىسىندا جىلقى ىزدەپ شىققان كىسى جوعالىپ كەتتى

استانا. 12 ناۋرىز. پاۆلودار وبلىسى ەرتىس اۋدانى پانفيلوۆ اۋىلدىق وكرۋگىنە قاراستى توقتا اۋىلىنىڭ 46 جاستاعى تۇرعىنى اقتۇتەك بوراندا جىلقى ىزدەۋگە كەتىپ, جوعالىپ كەتتى. بۇل تۋرالى pavlodarnews.kz تىلشىسىنە وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى مالىمدەدى. «كەشە تۇنگى ساعات 23.10-دا ەرتىس اۋدانىنىڭ توتەنشە جاعدايلار بولىمىنە توقتا اۋىلىنىڭ 1968 جىلعى تۇرعىنى قاليت زاكيپوۆتىڭ جوعالىپ كەتكەنى تۋرالى حابار ءتۇستى. ازامات جىلقىسىن ىزدەۋگە كەتىپ قالعان. ق. زاكيپوۆ تاڭعى ساعات 03.57-دە تەلەفون ارقىلى حابارلاسىپ, اداسىپ كەتكەنىن مالىمدەگەن», - دەپ حابارلادى ءباسپاسوز قىزمەتى. جوعالىپ كەتكەن ازاماتتى ىزدەستىرۋگە «ءورت ءسوندىرۋ جانە اپاتتى-قۇتقارۋ قىزمەتى» مم-ءى جەكە قۇرامىنىڭ 5 جۇمىسكەرى مەن ءبىر تەحنيكاسى, سونىمەن قاتار اۋداندىق ىشكى ىستەر ءبولىمى جەكە قۇرامىنىڭ 6 مامانى مەن 3 تەحنيكا بىرلىگى جۇمىلدىرىلدى. بۇل ىسكە اۋداندىق اكىمدىكتىڭ 11 مامانى, 4 تەحنيكاسى قولعابىس ەتۋدە. اۋىلداستاردىڭ ايتۋىنشا, ق. زاكيپوۆ بىرنەشە رەت حابارلاسىپ, قاي جەردە جۇرگەنىن بىلمەيتىنىن ايتقان. مۇرات ايتقوجا. دەرەك, سۋرەت: pavlodarnews.kz.