تاعى ءبىر ۇمىتكەر سىناقتان سۇرىنبەي ءوتتى

استانا. 12 ناۋرىز. پرەزيدەنت سايلاۋىنا ۇمىتكەر رەتىندە قاتىسۋعا نيەت بىلدىرگەن قانات تورەگەلديەۆ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا سىنىنان سۇرىنبەي ءوتتى. بۇل تۋرالى gazeta.kz حابارلادى. «كانديدات ءبىرىنشى سىناقتا «وتتى جىلدار تاعىلىمى» تاقىرىبىن اجەپتەۋىر اشقان. قاتەلەرى دە بار. 7 قاتە جىبەرىپتى, ەملەدەن – 2, تىنىس بەلگىسىنەن – 4, ستيلدىك 1 قاتە كەتكەن. جۇمىسى جامان ەمەس, جاپ-جاقسى», – دەدى كانديداتتىڭ سىناق ناتيجەسىن تانىستىرعان لينگۆيستيكالىق كوميسسيا توراعاسى مىرزاتاي جولداسبەكوۆ. ونىڭ اتاپ وتۋىنشە, ەكىنشى سىناقتا كانديدات ف.وڭعارسىنوۆانىڭ پوەزياسىن بارىنشا مانەرلەپ وقىپ, كوميسسيا مۇشەلەرىنىڭ كوڭىلىنەن شىققان. «ءۇشىنشى سىناقتا «حالىق تاريحى جانە رۋحاني جادىگەرلەر» تاقىرىبىندا ءسوز سويلەدى. دەگەنمەن, قانات مىرزا, رۋحاني جادىگەرلەر دەگەندى ونشا ۇعا المادىڭ. رۋحپەن شاتاستىردىڭىز.  سىزگە بىرقاتار سۇراقتار قويىلدى. بولاشاقتا ەسىڭىزدە بولاتىن نارسە, ءاربىر ساۋالعا جاۋابىڭىز ۇستىرتتەۋ.  سودان كەيىن ويىڭىزدا جۇيەلىلىك, ناقتىلىق جاعى جوق. شىنتۋايتىنا كەلگەندە قانات سىباش ۇلى تورەگەلديەۆ قازاق تىلىندە سايراپ تۇر. قولما-قول ولەڭ جازادى, شىعارمانىڭ ءوزىن ولەڭمەن باستاپتى. سوندىقتان كوميسسيا مۇشەلەرى كەڭ تالقىلاپ, الگىندەي قاتەلەرى بولعانىمەن, وي جۇيەسىندە ۇستىرتتىك ورىن العانىمەن, قانات تورەگەلديەۆ قازاق ءتىلىن ەركىن مەڭگەرگەن دەگەن قورىتىندى شىعاردى», – دەدى كوميسسيا توراعاسى. جولدىباي بازار. دەرەك, سۋرەت: gazeta.kz.