قىزىلوردادا شىنى كاسىپورنىنىڭ قۇرىلىسى باستالدى

قىزىلوردادا شىنى شىعا­راتىن زاۋىت سالىنادى دەگەلى ءبىراز ۋاقىت بولعان ەدى. تۇتاس ايماق ءۇشىن عانا ەمەس, رەسپۋبليكاعا زور پايدا اكەلەتىن جوبانىڭ قۇرىلىسىن تاعاتسىزدانا كۇت­كەندەر كوپ. دەگەنمەن, ءارتۇرلى جاعدايلارعا بايلانىستى وسى ءبىر الىپ قۇرىلىستىڭ باستالۋى كەيىنگە شەگەرىلە بەردى. «ساباقتى ينە ساتىمەن» دەيدى عوي دانا حالقىمىز. سول ايتقانداي, شىنى زاۋىتىنىڭ قۇرىلىسى بيىل باستالدى. بۇل نە جوبا؟ قانداي پايداسى بار؟ ەندى از-كەم وسى جايىنا توقتالا كەتەلىك. زاۋىت ىسكە قوسىلعاندا تاباقشا شىنىلار شىعارا باستايدى. ونىڭ ءونىمى ءارتۇرلى بولماق. ءتىپتى, ۇيالى تەلەفوننىڭ بەتىنە قويىلاتىن شىنىعا دەيىن شىعارا الادى. نەمىس تەحنولوگياسىمەن سالىناتىن زاۋىت بارلىق زاماناۋي قۇرال-جابدىقتارمەن قامتىلماق. زاۋىتتىڭ ءبىر كۇندىك قۋاتتىلىعى 600 توننا شىنى شىعارۋعا جەتەدى. ياعني, بۇل – جىلىنا 197 100 توننا تاباقشا شىنى شىعادى دەگەن ءسوز. زاۋىت قۇرىلىسىن ىسكە اسىراتىن ستراتەگيالىق ينۆەس­تور رەتىندە اقش-تىڭ «Steward Engineers» كومپانياسى تاڭداپ الىنعان. اتالعان كومپانيا «قا­زاقستاننىڭ ينۆەستيتسيالىق قورى­مەن» بىرىگىپ قۇرىلىستىڭ 20 پايىزىن قارجىلاندىرىپ وتىر. ال قالعان قاراجاتتى «قازاقستاننىڭ دامۋ بانكى» وتەيدى. جوبانىڭ جالپى قۇنى – 52,1 ميلليارد تەڭگە. شىنى زاۋىتىنىڭ قۇرىلىسى ءۇشىن قىزىلوردا قالاسىنداعى يندۋستريالدى ايماقتان 50 گەكتار جەر ءبولىندى. وبلىس بيۋدجەتىنەن وندا ينفراقۇرىلىمدىق جۇ­مىس­تار جۇرگىزىلدى. ايتالىق, گاز, سۋ جەلىسى, تەلەفون سىمدارى, اۆتوموبيل جولدارى مەن كارىز جۇيەلەرى تولىقتاي جاسالدى. تەحنيكالىق-ەكونوميكالىق نە­گىزدەمەسى مەن جوبالىق-سمەتالىق قۇجاتتارى تولىق دايىندالعان. مەملەكەتتىك ساراپتاما جاسالىپ, قاجەتتى كەلىسىمدەرگە قول قويىلعان. زاۋىتتىڭ جوباسى ماقۇلداندى. بۇگىندە قۇرىلىس جۇمىستارى باس­تالىپ كەتتى. كاسىپورىن ىسكە قوسىلعاندا 300 ادام جۇمىسپەن قام­تىلا­دى. ال قۇرىلىس جۇمىس­تا­رى كە­زىندە 200 ادام جۇمىسقا تار­تى­­لادى. جوسپار بويىنشا زاۋىت 2017 جىلدىڭ قازان ايىندا ىسكە قو­سىلماق. ەرجان بايتىلەس, «ەگەمەن قازاقستان». قىزىلوردا.