بايلانىستاردى تەرەڭدەتۋگە نازار اۋداردى

قازاقستاننىڭ قىتايداعى ەلشىسى شاحرات نۇرىشەۆ ليانيۋنگان قالاسىنىڭ (تسزيانسۋ ولكەسى) مەرى چجاو سياوتسزيانمەن كەزدەستى, دەپ حابارلادى ءسىم-ءنىڭ ءباسپاسوز قىزمەتى. كەزدەسۋدە تاراپتار ترانزيتتىك-كولىكتىك الەۋەتتى دامىتۋ سالا­سىن­داعى ىنتىماقتاستىقتىڭ قازىرگى احۋالى مەن بولاشاعىن, «نۇرلى جول» جاڭا ەكونوميكالىق ساياساتىن جانە قىتاي تاراپىنىڭ «ءبىر بەلدەۋ, ءبىر جول» باس­تاماسىن جۇزەگە اسىرۋ ماسەلەلەرىن, سونداي-اق, ليانيۋنگان تەڭىز پورتىنىڭ مۋلتيمودالدىق تەرمينالىنىڭ ءارى قاراي دامۋىن تالقىلادى. الماتى مەن ليانيۋنگان اراسىندا كونتەينەرلىك پويىزدار اپتاسىنا بەس رەت قاتىناپ, جىلدىق جۇك اينالىمى 100 مىڭ كونتەينەرگە جەتكەنى اتاپ ءوتىلدى. بيىل­عى جىلى كونتەينەرلىك تاسىمالداردى 250 مىڭعا جەتكىزۋ جوسپارلانعان. ليانيۋنگان پورتى قىتايدىڭ ورتالىق جانە باتىس بولىكتەرىمەن بايلانىستىراتىن تەڭىزگە ەڭ ىڭعايلى ءارى تەز شىعاتىن ينفراقۇرىلىمىنىڭ ارقاسىندا, سونداي-اق, قازاقستاننىڭ دۇنيەجۇزىلىك ساۋدا ۇيىمىنا كىرۋىن نازارعا الا وتىرىپ, پورتتىڭ ءوت­كىزۋ قابىلەتىن ارتتىرۋ جانە ليانيۋنگان قالاسى قازاقستان – قىتاي حالىقارالىق لوگيستيكا­لىق كومپانياسىنىڭ قىزمەتىن كەڭەيتۋ جوسپارلانعان. تاراپتار مەملەكەت باسشىلارى دەڭگەيىندە قول جەتكىزىلگەن ۋاعدا­لاستىقتاردى جۇزەگە اسىرۋعا, ەكىجاقتى ينۆەستيتسيالاردىڭ كولە­مىن ارتتىرۋعا, سونىمەن بىرگە, الماتى – ليانيۋنگان باعىتى جانە قازاقستان ارقىلى ترانزيت بويىنشا ورتالىق ازيا مەن ەۋروپانىڭ باسقا مەملەكەتتەرىنە جۇرەتىن كونتەينەرلىك پويىز­داردىڭ جۇك تاسىمالىن ارتتىرۋ جونىندەگى ماقساتتاردى ىسكە اسىرۋ قاجەتتىلىگىنە ايرىقشا نازار اۋدارىلدى.  «ەگەمەن-اقپارات».