كوكشەتاۋدا جەسىرلەرگە قۇرمەت كورسەتىلدى

كوكشەتاۋ. 21 تامىز. كوكشەتاۋدىڭ «تويحانا» اتالاتىن ءدامحاناسىندا جاقسى ءبىر وتىرىس بولدى. مۇندا جەسىرلەرگە قۇرمەت كورسەتىلدى. بۇل تۋرالى egemen.kz ءتىلشىسى حابارلادى. باستامانى ءوزىمىز كوپتەن بىلەتىن سىيلى اعامىز سيتزيا بايمانوۆ, دولوميت كەنتىنىڭ اكىمى بولعان جۇمابەك جۇكەنوۆ, وسىندا سوڭعى كۇنگە دەيىن جۇمىس ىستەگەن جانباتىر جانسەيىتوۆ كوتەرگەن ەكەن. سيتزيا اعا 1974 جىلى قۇرىلىپ, 1996 جىلى تاراپ كەتكەن كوكشەتاۋ وبلىستىق مال سانيتارلىق وتريادىن باسقارعان ەدى. بۇل مەكەمەدەگى 70 مامان ءوڭىردىڭ بارلىق شارۋاشىلىقتارىنا قىزمەت كورسەتتى, وڭىرلىك دامۋعا سالماقتى ۇلەستەرىن قوستى. كاسىبىنە ادال جانداردىڭ ەسىمى ەل اۋزىندا ءالى كۇنگە قۇرمەتپەن اتالادى. ءومىر ۇردىسىندەگى كوش كەرۋەندە توقتام جوق. تىرشىلىك زاڭى «سانوتريادتىڭ» ساپىن دا سيرەكسىتىپ قالىپتى. بىراق, بىرگە جۇرگەن كۇندەر ۇمىتىلماق ەمەس. ءاۋ باستان باستالعان سىيلاستىقتىڭ ۇزاعىنان بولعانىنا نە جەتسىن. «تويحاناداعى» ەرەكشە جيىنعا قايتىس بولعان التى اعامىزدىڭ جەسىرلەرى جينالدى. ولارعا ەل اۋزىنداعى «جەتپىستىڭ» جىگىتتەرى قۇراق ۇشىپ قىزمەت كورسەتتى. ناۋان حازىرەت اتىنداعى ورتالىق مەشىتتىڭ نايب يمامى سەرىك قۇران باعىشتاپ, جاسى ۇلكەن ۆەتۆراچ جۇمابەك جۇكەنوۆ باتا بەردى. قاجىمۇقان باتقالوۆتىڭ ەسكە الۋ ءسوزى جۇرەكتەردى تولقىتتى. توردە وتىرعان اپالاردىڭ اتىنان شايمار سەرالين مەن بوتا زيكەنوۆتىڭ جەسىرلەرى زايرا جانە كۇلزيا انالار تەبىرەنىستى العىس سەزىمدەرىن جەتكىزدى. وندا ۇجىمدىق ىنتىماق پەن سىيلاستىق, تاربيەلىك تارتىلىس, ۇرپاققا ونەگە ماسەلەلەرى كەڭىنەن قامتىلدى. باقبەرگەن امالبەك. دەرەك, سۋرەت: egemen.kz