باتىرعا ەسكەرتكىش ورناتىلدى

تارازدا سۇرمەرگەن ىبىرايىم سۇلەي­مەنوۆكە ەسكەرتكىش ورناتىلدى. ۇلى وتان سوعىسىنىڭ تاريحىنا كوز جۇگىرتەر بولساق, 1941 جىلى قىزىل ارميا قاتارىنا شاقىرىلىپ, قۇرالايدى كوزگە اتقان مەرگەن بولعان ى.سۇلەيمەنوۆ كالينين مايدانىنداعى العاشقى شايقاستاردىڭ وزىندە ۆينتوۆكاسىمەن 79 ءفاشيستى جەر جاس­تاندىرادى. ۆەليكيە لۋكي قالاسى ءۇشىن بولعان شايقاستا 60, ال, 1943 جىلى كۇزىندە نەۆەل قالاسى ءۇشىن بولعان كەسكىلەسكەن شايقاستا 102 ءفاشيستىڭ كوزىن جويىپ, ءوزى دە ەرلىكپەن قازا تابادى. سول قاندى شايقاستا سۇرمەرگەن باتىر قازاقتىڭ اياۋلى قىزى, پۋلەمەتشى مانشۇك مامەتوۆا ەكەۋى ءبىر كۇندە, ءبىر مايدان شەبىندە وتان ءۇشىن جانىن پيدا ەتتى. ەكەۋىنىڭ دە سۇيەگى نەۆەل قالاسىندا جەرلەنەدى. بىلتىر نەۆەل قالاسىنداعى ىبىرايىم سۇلەيمەنوۆ اتىنداعى كوشەدە باتىرعا ارنالعان مەموريالدى تاقتا اشىلعان بولاتىن. «ءبىزدىڭ ىبىرايىمعا ەشكىم تەڭ كەلمەيدى. وتان سوعىسىندا قازاقتا سۇلەيمەنوۆتەن اسقان مەرگەن جوق. ءبىزدىڭ سۇلەيمەنوۆ سوۆەت وداعىنىڭ باتىرى بولادى» دەۋشى ەدى باتالون كومانديرى ۋشاكوۆ», دەپ جازعان ەكەن ول تۋرالى حالىق جازۋشىسى ءازىلحان نۇرشايىقوۆ. ال, جىر الىبى جامبىل جاباەۆ 1943 جىلى 100-ءشى اتقىشتار بريگاداسىنان العان حاتىنا جاۋاپ قايىرعاندا: قىراعى قىردىڭ قىرانى, دالانىڭ ۇشقىر قۇلانى. تاۋدىڭ جۇيرىك بۇلانى, فاشيستەردى ەكى ءجۇز, وتىز توعىزىن ولتىرگەن, سۇلەيمەنوۆ ىبىرايىم, قازاقتىڭ باتىر ۇلانى, – دەپ جىرلاعان ەكەن. ايتسە دە ىبىرايىم سۇلەيمەنوۆ 1943 جىلى شىلدە ايىندا كەڭەس وداعىنىڭ باتىرى اتاعىنا ۇسىنىلعانىمەن بەلگىسىز سەبەپتەرمەن جىبەرىلگەن قۇجات وزگەرتىلىپ, لەنين وردەنىمەن ماراپاتتالدى. ەندى, مىنە, تاراز قالاسىندا باتىر اتىنداعى كوشەدە سۇرمەرگەن جاۋىنگەرگە ارنالعان ەڭسەلى ەسكەرتكىش بوي كوتەردى. – حالقىمىزدىڭ ماقتان تۇتار اردا ۇلى, قۇرالايدى كوزگە اتقان سۇرمەرگەن ىبىرايىم سۇلەيمەنوۆ ءوزىنىڭ جاس ءومىرىن قاسيەتتى جەڭىس جولىندا قۇربان ەتتى. ەسىمى ۇلى وتان سوعىسى تاريحىندا التىن ارىپپەن جازىلىپ قالدى. حالقىمىز «ەل ءۇمىتىن ەر اقتار, ەر اتاعىن ەل ساقتار» دەپ ايتقانىنداي, ەلىنىڭ ءۇمىتىن اقتاپ, حالقىنىڭ بەيبىت بولاشاعى ءۇشىن جانىن قيعان باتىردى ەل دە ۇمىتپاق ەمەس, – دەدى ەسكەرتكىشتىڭ اشىلۋ راسىمىندە جامبىل وبلىسىنىڭ اكىمى كارىم كوكىرەكباەۆ. داڭقتى باتىر ىبىرايىم سۇلەي­مەنوۆتىڭ ءمۇسىنى ورنالاسقان جەر اۋماعى 800 شارشى مەتردى قۇرايدى. ءمۇسىن اۆتورى – قازاقستان سۋرەتشىلەر وداعىنىڭ مۇشەسى مومىش سەيىتكەرىم.   ورالحان ءداۋىت, «ەگەمەن قازاقستان». سۋرەتتى تۇسىرگەن اقادىل رىسماحان. تاراز.