استاناعا ارزان ەت كەلە جاتىر

كەشە كونە تارازدان ارمان قالا استاناعا قاراي كەرۋەن شىقتى. ناقتىراق ايتساق, جامبىل وبلىسىنىڭ اۋىل شارۋاشىلىعى ونىمدەرى تيەلگەن جۇك كولىكتەر كەرۋەنى. بۇل جولى جامبىلدىق ديقاندار استانا قالاسىنا 24,5 ملن. تەڭگەنى قۇرايتىن 115 توننا اۋىل­شارۋاشىلىق ونىمدەرىن اكەتتى. – استانا قالاسىنىڭ اينالاسىندا ازىق-ت ۇلىك بەلدەۋىن قۇرۋ جونىندەگى ەلباسىنىڭ تاپسىرماسىن ورىنداۋ ماقساتىندا «قازاق حاندىعىنىڭ 550 جىلدىعىنا» وراي جامبىل وبلىسى اكىمدىگى مەن اۋىل شارۋاشىلىعى باسقارماسى جانە «تاراز» اكك» اق-تىڭ ۇيىمداستىرۋىمەن تامىز ايىنىڭ 22-ءسى مەن قىركۇيەك ايىنىڭ 22-ءسى ارالىعىندا استانا قالاسىندا اپتا سايىن اۋىل شارۋاشىلىعى جارمەڭكەسىن وتكىزۋ جوسپارلانعان, – دەيدى بۇل جونىندە جامبىل وبلىسى اكىمىنىڭ ورىنباسارى ابدالى نۇراليەۆ. – وسىعان وراي استانا قالاسىنا 10 توننا ەت ونىمدەرى, 2 توننا ءسۇت, 5 توننا شۇجىق, 57 توننادان استام كوكونىس-باقشا ونىمدەرى جونەلتىلدى. ودان بولەك, وبلىستا وندىرىلەتىن باسقا دا اۋىل شارۋاشىلىعى تاۋارلارى, اتاپ ايتساق, ارا بالى, قىمىز, ماكارون ونىمدەرى, وسىمدىك مايى بار. 6 رەفريجەراتور كولىگىنە تيەلگەن تاۋارلاردى 30 ساتۋشى الداعى دەمالىس كۇندەرى استانا قالاسىنىڭ تۇرعىندارىنا 15-20 پايىز تومەن باعامەن ۇسىناتىن بولادى. مىنە, جامبىلدىق ديقاندار وسىنداي جومارتتىق تانىتىپ وتىر. تەگىندە توننالاپ جيناعان ونىمدەردى ءتيىمدى, شىعىنسىز ساتۋ دا ۇلكەن ەڭبەك. بۇل جاعىنان كەلگەندە بۇل ساۋدا ەكى جاققا دا ءتيىمدى بولىپ تۇرعانى تاعى انىق. ورالحان ءداۋىت, «ەگەمەن قازاقستان». جامبىل وبلىسى. سۋرەتتەردى تۇسىرگەن اقادىل رىسماحان.