قازاقستان رەسپۋبليكاسىنىڭ جوعارعى سوتى قىركۇيەك ايىندا قازاق حاندىعىنىڭ 550 جىلدىعىنا وراي «قازاق قۇقىعى مەن بيلەر سوتىنىڭ تورەلىگى – قازاق مەملەكەتتىلىگىنىڭ فەنومەنى» تاقىرىبىندا حالىقارالىق عىلىمي كونفەرەنتسيا وتكىزۋدى جوسپارلاپ وتىر. الداعى باسقوسۋ قارساڭىندا ايماقتىق شارالار باستالىپ تا كەتتى. مىنە, سونىڭ ايعاعىنداي, ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىندە «ەسىم حاننىڭ ەسكى جولى – اۋىزشا قاعيدالار جيىنتىعىنىڭ وزىق ۇلگىلەرى» تاقىرىبىندا كونفەرەنتسيا بولىپ ءوتتى.
فورۋمعا وڭتۇستىك قازاقستان جانە جامبىل وبلىستىق سوتتارىنىڭ توراعالارى مەن سۋديالارى, ارداگەرلەرى, قوعام قايراتكەرلەرى, تاريحشىلار, ادەبيەتشىلەر, عالىمدار, قوعامدىق بىرلەستىكتەردىڭ, باق وكىلدەرى قاتىستى.
ايماقتىق عىلىمي كونفەرەنتسيادا جوعارعى سوتتىڭ سۋدياسى باعلان ماقۇلبەكوۆ ءسوز ءسويلەپ, قر جوعارعى سوتىنىڭ توراعاسى قايرات ءماميدىڭ قاتىسۋشىلارعا ارناعان قۇتتىقتاۋىن وقىپ, سوڭىنان «كيەلى جەرىم, قاسيەتتى ەلىم» تاقىرىبىندا بايانداما جاسادى.
وبلىس اكىمىنىڭ ورىنباسارى ەرلان ايتاحانوۆ قۇتتىقتاۋ ءسوز سويلەدى.
قازاقستان رەسپۋبليكاسىنىڭ قۇرمەتتى سۋدياسى, زاڭ عىلىمدارىنىڭ دوكتورى بەكەت تۇرعاراەۆ «دالا دانالارى بيلەر ينستيتۋتىنىڭ تاريحي ماڭىزى. ەسىم حاننىڭ ەسكى جولى» بايانداماسىندا موڭعوليا مەملەكەتتىك مۇراعاتتارىندا قازاق ەلىنىڭ زاڭدارىنىڭ تولىق نۇسقاسى تابىلعانىن ايتتى.
فيلولوگيا عىلىمدارىنىڭ دوكتورلارى قۇلبەك ەرگوبەك «بيلەر شەشەندىك پەن اقىندىقتىڭ التىن ارقاۋى», مەكەمتاس مىرزاحمەتوۆ «ءداستۇرلى قۇقىقتاعى بي تاڭداۋ جولى», وقمپي وقۋ ءىسى جونىندەگى پرورەكتورى, دوتسەنت بارشاگۇل يسابەك «بيلەردىڭ كەلەر زاماندى بولجاي ءبىلۋى جانە ەل بىرلىگىن ساقتاۋداعى وسيەتتەرى» تاقىرىپتارىندا سۇبەلى بايانداما جاسادى.
ەرتەرەكتە بابالارىمىزدان «ەلگە باي قۇت ەمەس, بي قۇت» دەگەن اتالى ءسوز قالعان. راسىن ايتقاندا, حاننىڭ ءوزى ءبيدىڭ كەسىگىنە تۇرادى. ماسەلەن, جيەمبەت سەكىلدى بي, بۇقار سياقتى جىراۋلاردىڭ حان شەشىمىنە كوڭىلى تولماعان جاعدايدا وتكىر سويلەۋى سارعايعان تاريح پاراقتارىنان بەلگىلى. بۇگىنگى سوت سالاسىنىڭ قىزمەتكەرلەرىنە بىلىكتىلىكپەن قاتار تۋرالىق, شەشەن سويلەي ءبىلۋ قاسيەتى دە كەرەك. كونفەرەنتسيادا وسى ماسەلەگە ايرىقشا كوڭىل ءبولىندى.
جيىندى وقو سوتىنىڭ توراعاسى نۇرسەرىك ءشارىپوۆ قورىتىندىلاپ, فورۋمدا ءتيىستى قارار قابىلداندى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.
