الەم چەمپيوناتىنىڭ اشىلۋ سالتاناتىنا قاتىستى

قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا ۆەلوسيپەد سپورتىنان – ۆەلوترەكتەن جاسوسپىرىمدەر اراسىنداعى UCI الەم چەمپيوناتىنىڭ اشىلۋ سالتاناتىنا قاتىستى, دەپ حابارلادى پرەزيدەنتتىڭ ءباسپاسوز قىزمەتى. كىرىسپە سوزىندە گۇلشارا ءابدى­قالىقوۆا مەملەكەت باسشى­سىنىڭ جان-جاقتى قولداۋى ارقاسىندا بۇگىنگى تاڭدا ەلىمىزدە حالىقارالىق تالاپتارعا ساي سپورتتىق نىساندار بوي كوتەرىپ, الەمدىك دەڭگەيدەگى سپورتتىق شارالار ويداعىداي وتكىزىلىپ جاتقانىن اتاپ ءوتتى. ۆەلوسيپەد سپورتى ەلىمىزدە كەڭ تارالعان سپورت تۇرىنە جاتادى, 10 مىڭنان اسا قازاقستان­دىق ۆەلوسپورتپەن جۇيەلى شۇ­عىلدانادى. «استانا» كاسىبي ۆەلوكلۋبى – قازاقستاننىڭ الەمدەگى ەڭ تانىمال سپورتتىق برەندتەرىنىڭ ءبىرى. الەم چەمپيوناتى ازيا قۇرلىعىنىڭ ۇزدىك ءجاسوسپىرىم سپورتشىلارىن, سونىمەن قاتار, ۆەلوسيپەد سپورتى ماماندارى مەن جانكۇيەرلەرىن, الەمدىك سپورت قاۋىمداستىعىنىڭ وكىل­دەرىن جيناپ وتىر. مۇنداي دەڭگەيدەگى شارانى وتكىزۋ ەل ابىرويىن ارتتىرىپ, ا.ۆينوكۋروۆ, ا.بازاەۆ, ز.زابيروۆا جانە باسقا دا الەمدىك دەڭگەيدەگى قازاقستاندىق ساڭلاقتاردى ۇلگى تۇتقان جاستار اراسىندا ۆەلوسپورتتى ناسيحاتتاۋدىڭ پارمەندى قۇرالىنا اينالماق. الەمدىك بىرىنشىلىككە دۇنيە ءجۇزىنىڭ 31 ەلىنەن 200 سپورتشى قاتىسىپ, جالپى سانى 19 مەدال ساراپقا سالىناتىن بولادى. ەلىمىز 2011 جىلى ۆەلوترەكتەن الەم كۋبوگىن, 2014 جىلى تاس جولداعى ۆەلوسپورت جانە ۆەلوترەكتەن ازيا چەمپيوناتىن تابىستى وتكىزدى. جارىستاردىڭ جوعارى دەڭگەيدە ۇيىمداستىرىلۋى, الەمدىك ستاندارتقا ساي قولايلى جاعداي, سونداي-اق ساراپشىلاردىڭ وڭ پىكىرى UCI حالىقارالىق ۆەلوسيپەدشىلەر وداعىنىڭ 2015 جىلعى جاسوسپىرىمدەر اراسىنداعى الەم چەمپيوناتىن استانا قالاسىندا وتكىزۋ جونىندە شەشىم قابىلداۋىنا ىقپال ەتتى.