سالىقشىلار سابيلەرگە ەرتەگى سىيلادى

  كوكشەتاۋ قالاسىنىڭ «التىن بالا» بالاباقشاسىندا, اقمولا وبلىسى بويىنشا مەملەكەتتىك كىرىستەر دەپارتامەنتىنىڭ قىزمەتكەرلەرى «سالىق تولەگىسى كەلمەگەن ساراڭ حاسان تۋرالى ەرتەگى» كىتابىن تانىستىردى. دەپارتامەنتتىڭ مەملەكەتتىك قىزمەتتەر باسقارماسىنىڭ باسشىسى نازگۇل ايۋپوۆا سابيلەرگە سىي-ساۋعالار ۇلەستىرىپ, تاقپاق ايتۋ مەن ءان جارىسىن ۇيىمداستىردى. بالالارمەن سۇحبات بارىسىندا ولاردىڭ تۋعان ەل, دوستىق, جانۋارلار الەمىنە قاتىس­تى پىكىرلەرى بەينەتاسپاعا جازىپ الىندى. مۇنداعى ءارتۇرلى ويىنداردىڭ ءوزى تانىمدىق مازمۇنعا قۇرىلادى ەكەن. سونداي-اق, بالا­باقشا تاربيەلەنۋشىلەرىنىڭ بولا­شاققا قاتىستى وي-ورىستەرىنىڭ كەڭدىگى ءتانتى ەتتى. سودان بولسا كەرەك, «سالىقتىق مادەنيەت بالالىق شاقتا قالىپتاسادى, سوندىقتان ءبىز وسكەلەن ۇرپاقپەن جۇمىس جاساۋعا ءاردايىم كوڭىل بولەتىن بولامىز», – دەيدى ءجۇزى بال-بۇل جانعان نازگۇل. تانىستىرۋ كەزىندە دەپارتامەنتتىڭ باس ماماندارى ەلنار قازبەكوۆ پەن دينارا ەشىمتاەۆا بولاشاق 18 سالىق تولەۋشىنىڭ اقايسىسىنا ءبىر-ءبىر دانادان ەرتەگى كىتابىن تابىس ەتتى. مەكتەپكە دەيىنگى مەكەمەنىڭ ديرەك­تورى گۇلجان ەرجانوۆا ايت­قانداي, جاڭا مەملەكەتتىك ورگان­نىڭ بالالارعا قوناق بولىپ, ەرەكشە كوڭىل ءبولۋى قۋانتارلىق, سەبەبى, وسى ءسابي شاقتا بالانىڭ سانا سەزىمى دامىپ, تۇلعا رەتىندە قالىپتاسادى جانە تارتىپتىك ادەپكە ۇمتىلىستارى كورىنىس تابادى. وسى رەتتە, مەملەكەتتىك كىرىستەر دەپارتامەنتى جاڭا وقۋ جىلىندا مەكتەپ تابالدىرىعىن العاش رەت اتتايتىن قالاداعى بارلىق بۇلدىرشىندەرگە «سالىق دەگەنىمىز نە جانە ونىڭ قاجەت­تىلىگى» اتتى كىتابىن سىيعا تار­تۋدى جوسپارلاپ وتىرعانىن ايتا كەت­­كىمىز كەلەدى. باقبەرگەن امالبەك, «ەگەمەن قازاقستان». كوكشەتاۋ.