ەسكە سالا كەتەيىك, ءارتىستى برازيلياعا ەۋروپالىق وپەرا اگەنتى ستەفانيا گامبا شاقىرعان بولاتىن. ول قازاق ءانشىسىنىڭ مارچەللو دجورداني قورىنىڭ بەدەلدى حالىقارالىق ۆوكالدىق بايقاۋى بارىسىندا (2013 ج.) جارقىراپ ءان سالعانىن بايقاپ قالعان, بۇل مەدەت شوتاباەۆتىڭ قانجىعاسىنا ءۇشىنشى جۇلدەنى بايلاپ ۇلگەرگەن كەزى بولاتىن.
سان-پاۋلۋدىڭ مۋنيتسيپالدىق تەاترىنىڭ كونە ساحناسىندا (برازيليا) قۇداي-اۋ, كىمدەر ءان سالماعان دەسەڭشى. ەنريكو كارۋزو, بەنيامينو دجيلي, ماريو دەل موناكو, ماريا كاللاس, رەناتا تەبالدي, ارتۋرو توسكانيني, كامارگو گۆارنەري, ەيتور ۆيللا-لوبوس, پەترو ماسكاني, اننا پاۆلوۆا, ارتۋر رۋبينشتەين, ديۋك ەللينگتون, ەللا فيتسدجەرالد, ايسەدورا دۋنكان, مارگو فونتەين...الەمدەگى وپەرانىڭ ەڭ جارىق جۇلدىزدارى تۇگەل وسى ساحنانىڭ سامالىمەن سامعاعان.
– بۇل مەن ءۇشىن برازيليانىڭ اسەم تەاترلارىنىڭ بىرىندەگى دەبيۋت بولدى, ۇزدىك ونەر ورداسىنىڭ رۋحى مەن ءداستۇرى كەرەمەت ساقتالعان ەكەن. ماعان ماريا تەاترىنىڭ تەنورى – اۆگۋستو امونوۆپەن قوسىلا شىرقاۋ باقىتى بۇيىردى, ايتپاقشى, ونىڭ ءوزى الماتىنىڭ تۋماسى. ءبىرىنشى قۇرامدا باس پارتيانى الەمدىك دەڭگەيدەگى تەنور گرەگوري كۋندە ورىندادى, كەيىن ول ماعان بىرنەشە رەت شەبەرلىك ءدارىسىن وتكىزدى. مەن «بوگەما» وپەراسىنان ءرۋدولفتىڭ ارياسىن شىرقاپ بەرىپ ەدىم, ول يتاليالىق ءتىلىمنىڭ دەڭگەيىن ماقتاي كەلىپ, مۇنان دا ارى قاراي شىڭدالا بەرۋگە كەڭەس بەردى, – دەدى جۋرناليستەرگە بەرگەن سۇحباتىندا وپەرا ءانشىسى. جەتەكشى سوليست مۇنان ءارى اتالعان تەاتردىڭ جۇمىس قارقىنى جوعارى ەكەنىن, ۇلتتىق جانە حالىقارالىق دارەجەدەگى ۇلى ليبرەتتوشىلار مەن كومپوزيتورلاردىڭ وپەرالارىنىڭ تۇساۋكەسەرى بىرىنەن كەيىن ءبىرى الماسىپ جاتاتىنىن اتاپ ءوتتى.
ءبىر قىزىعى, ولاردا تۇراقتى وپەرالىق ترۋپپا دەگەن اتىمەن جوق, شتاتتا تەك حور مەن وركەستر عانا بولعانمەن, نەگىزىنەن وپەرا سوليستەرىن الەمنىڭ ءار شالعايىنان تاڭداپ شاقىرتىپ جاتادى. سوندىقتان برازيليالىق كورەرمەن قازاقستاندىق ءارتىسكە زور قوشەمەت كورسەتىپ, اياماي قول سوعىپ وتىردى. قويىلىمنان كەيىن ولار ونەر يەسى جايىندا جىلى لەبىزدەرىن ءبىلدىرىپ, قولتاڭبا الىپ قالۋعا اسىقتى.
– كەيبىرەۋى مەنىڭ قازاقستاننان ۇشىپ كەلگەنىمە سونشالىق سەنە قويماعانداي كۇمان كەلتىردى. سان-پاۋلۋداعى ارىپتەستەرىمنەن «بۇعان دەيىن قازاق ءانشىسىن كورىپ پە ەدىڭىزدەر؟» دەپ سۇرادىم. «جوق, ءسىز ءبىرىنشىسىز», – دەدى ولار. سوعان قاراماستان, ولار مەنى وتە جاقسى قارسى الدى, مۇندا اقجارقىن, كەڭ پەيىل جاندار تۇرادى ەكەن, دەدى م.شوتاباەۆ سان-پاۋلۋ ساپارى جايىندا.
ءانشى برازيليالىق تاماققا ءبىراز ۋاقىت ۇيرەنە الماي, اسىرەسە, ءۇيدىڭ سورپاسىن قاتتى ساعىنعانىن ايتىپ قالدى. «اساي دەگەن جيدەكتەرىن جەپ كوردىم, ونى مۇندا بالمۇزداق رەتىندە ۇسىنادى ەكەن. ول بويعا قۋات بەرەدى, ساحناعا شىعار الدىندا كۇندە سونى جەپ ءجۇردىم, داۋىسىم وتە جاقسى شىقتى. ال اساي ادام اياعى جەتە بەرمەيتىن امازونكا تاۋلارىندا وسەتىن جەمىس كورىنەدى» دەپ ونەر يەسى ونداعى تاماقتانۋ مادەنيەتىنىڭ ەرەكشەلىگىنە كوڭىل ءبولىپ ءوتتى.
مەدەت شوتاباەۆتىڭ سان-پاۋلۋ مۋنيتسيپالدىق تەاترى ساحناسىنداعى ەندىگى ونەرى 31 مامىردا جانە 4-7 ماۋسىمدا جالعاسادى, بۇل جولى ءانشى «ەۆگەني ونەگين» وپەراسىنداعى لەنسكيدىڭ پارتياسىن شىرقايدى دەپ كۇتىلۋدە.
سالتانات اسكەربەكقىزى.
