جالعىز ءوزى ولجا سالعان

مۇنىڭ الدىندا حالىق­ارالىق دارەجەدەگى سپورت شە­بەرى يرينا ەكتوۆانىڭ ءۇش قارعىپ سەكىرۋدەن 2016 جىلى ريو-دە-جانەيرو قالاسىندا وتەتىن وليمپيادا ويىندارىنا جولداما جەڭىپ العانى, ىلە-شالا داريعا شاكىموۆانىڭ بوكستان ازيا چەمپيونى اتانعانى سولتۇستىكقازاقستاندىقتاردى قۋانتسا, امانعالي بەكبو­لاتوۆتىڭ تابىسى مەرەيلەرىن ءتىپتى اسىردى. ءسوز اراسىندا كوماندالاستار اراسىندا داريعانىڭ جالعىز التىن سىيلاعانىن, ال امانعاليدىڭ ەل قۇراماسىنا جۇلدە تارتۋ ەتكەن دارا ساڭلاق ەكەنىن ەسكەرسەك, ءۇشىنشى ورىنعا تابان تىرەۋىن عاجايىپ جەڭىسكە بالاعان بولار ەدىك. سول سەبەپتى برازيليادا ۇيىمداستىرىلعان جاستار اراسىنداعى گرەك-ريم كۇرەسىنەن الەم بىرىنشىلىگىنىڭ جۇلدەسىن قانجىعاعا وڭگەرىپ اكەلگەن ونى قارسى الۋ ءۇشىن وبلىس اكىمىنىڭ ءبىرىنشى ورىنباسارى ايداربەك ساپاروۆ تەمىرجول ۆوكزالىنا ارنايى بارىپ, جاس بالۋاننىڭ قولىن قىستى. ايماق باسشىسى ەرىك سۇلتانوۆتىڭ جۇرەكجاردى قۇتتىقتاۋىن جەتكىزدى. تۋعان-تۋىستارى مەن سپورتسۇيەر قاۋىم گۇل شوقتارىن ۇسىنىپ, ۇلكەن قوشەمەت كورسەتتى. امانعالي – گرەك-ريم كۇرەسىنەن قازاقستاننىڭ ءۇش دۇركىن چەمپيونى. بۇگىندە م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە وقيدى. – الەم بىرىنشىلىگىنە باراتىن سپورتشىلارعا بولىنگەن قاراجاتتىڭ شەكتەۋلىگىنەن امانعاليدىڭ دودالى باسەكەگە قاتىسۋ-قاتىسپاۋى ەكىتالاي ەدى. وبلىس اكىمىنىڭ تىكەلەي قولداۋى ارقاسىندا قاجەتتى قارجى تابىلىپ, ەندى, مىنە, مىڭداعان جانكۇيەرلەردىڭ سەنىمىن اقتاي ءبىلدى. 58 ەلدەن كەلگەن 200 سپورتشى اراسىنان ماڭدايى جارقىراپ, ەل قۇراماسىنا جالعىز جۇلدە اپەرۋىن قالاي اسپەتتەسەك تە جاراسادى, – دەيدى وبلىستىق دەنەشىنىقتىرۋ جانە سپورت باسقارماسىنىڭ باسشىسى رۋسلان ەسەنالين. ول وسىدان ءۇش جىل بۇرىن بولگاريادا ولجا سالعان جەرلەسى اقان بايماعانبەتوۆتىڭ جەتكەن جەتىستىگىن, العان اسۋىن باعىندىردى. ءومىر ەسقالي, «ەگەمەن قازاقستان». سولتۇستىك قازاقستان وبلىسى.