ەلىمىز تاۋەلسىزدىك العان العاشقى جىلدارى ءىرى شارۋاشىلىقتار تاراپ, جەر بولىسكە ءتۇسىپ, ۇساق اگروقۇرىلىمدار قۇرىلدى. وسى كەزدە وتباسىممەن كەڭەسىپ, ءبىز دە ارەكەت جاساۋدى ۇيعاردىق. شارۋا قوجالىعىن قۇرىپ, ونىڭ اتىن «قوساعاش» دەپ قويدىق. «قوساعاش» – مال وسىرۋمەن شۇعىلداندى. العاشقى كەزدە مال باسى از بولسا, قازىر ءىرى قارا – 30, قوي – 700 جانە جىلقى 130 باسقا جەتتى. ولاردى بىرنەشە وتباسى كۇتىپ-باعادى. جالاقىلارىن ۋاقتىلى تولەيمىز. باسقا دا ماتەريالدىق كومەك كورسەتەمىز. مال ءوسىرۋ وڭاي ەمەس. كەيدە ونىڭ ونىمدەرىن وندىرۋگە جۇمسالعان شىعىن مەن ەڭبەك وتەلمەي جاتادى. سوندىقتان دا شيكىزات وڭدەيتىن شاعىن كاسىپورىن اشۋدى ۇزاق ۋاقىتتان بەرى ويلاستىرىپ جۇرگەن بولاتىنبىز.
سونىڭ ءساتى 2011 جىلى ءتۇستى. باۋىرجان مومىش ۇلى اۋىلىندا ءسۇت وڭدەيتىن شاعىن تسەح اشتىق. قازىر وندا 14 شارۋا قوجالىعىنان جازدا – 5, قىستا 3 توننا ءسۇت قابىلداپ, ودان سارى ماي, قايماق جانە باسقا دا ءسۇت ونىمدەرىن وندىرۋدەمىز. ءونىمنىڭ 80 پايىزى الماتى قالاسىنا, قالعانى تاراز, شىمكەنت جانە قىزىلوردا قالالارىنا وتكىزىلۋدە. تاۋارلارىمىز قويمادا جاتىپ قالعان كەزى بولعان ەمەس. نارىقتا تۇراقتى تۇتىنۋشىلارىمىز بار. قازىر مۇندا 9 ادام جۇمىس ىستەيدى. قابىلداپ العان ءسۇتتىڭ ءار ليترىنە 70 تەڭگەدەن تولەيمىز. ساپاسى جوعارى شيكىزات وتكىزگەندەر قوسىمشا قارجىلاي ىنتالاندىرىلىپ وتىرادى. ءبىزدىڭ جۇمىسىمىزدى وتباسىلىق بيزنەس دەۋگە بولادى. وسىندا كەلىندەرىم – جاڭىلسىن نۇرباەۆا تەحنولوگ, ەلۆيرا مەشەلوۆا مەنەدجەر بولىپ ىستەيدى.
كەيىنگى كەزدە اۋدان جانە وبلىسىمىزدا ءىرى قارا, ونىڭ ىشىندە ساۋىن سيىر ءوسىرۋشىلەر قاتارى كوبەيىپ كەلەدى. سوندىقتان دا وتباسىممەن اقىلداسىپ, ءىرى ءسۇت وڭدەيتىن كاسىپورىن اشۋعا بەل بايلادىق. اۋداندىق اكىمدىكتىڭ قولداۋىمەن بىزگە 2,5 گەكتار جەر بەرىلدى. تاۋلىگىنە 25 توننا ءسۇت وڭدەيتىن زاۋىت جوباسىنىڭ قۇنى 102 ميلليون تەڭگە. ونىڭ 55 ميلليون تەڭگەسى قۇرال-جابدىقتار الۋعا جۇمسالدى. سونداي-اق, 42 ميلليون تەڭگە قۇرىلىس جۇرگىزۋگە ءبولىندى. قالعان قارجىعا قۇجاتتار جاسالدى. ءبىز «حالىق بانكىمەن» ۇزاق ۋاقىتتان بەرى تىعىز ارىپتەستىك قاتىناستا جۇمىس ىستەپ كەلەمىز. مەملەكەتتىڭ ۇلكەن قولداۋى مەن قامقورلىعىن سەزىنۋدەمىز. «دامۋ» كاسىپكەرلىكتى دامىتۋ قورى» اق وبلىستىق فيليالى ارقىلى جەڭىلدىكپەن نەسيە الدىق. بانكتەردەن العان قارىزدارىمىزدىڭ ءوسىم پايىزىنىڭ جارتىسى «بيزنەستىڭ جول كارتاسى-2020» باعدارلاماسى اياسىندا جابىلدى.
جابدىقتاردىڭ دەنى رەسەي جانە بولگاريادان اكەلىندى. قازىر ونى ورناتۋ جۇمىسى اياقتالىپ كەلەدى. تسەح ىسكە قوسىلعان كەزدە «اگروبيزنەس-2020» باعدارلاماسى اياسىندا جابدىقتاردى ساتىپ الۋعا كەتكەن قارجىنىڭ 30 پايىزى سۋبسيديا رەتىندە وزىمىزگە قايتارىلادى. بۇل – مەملەكەتتىڭ كاسىپكەرلەرگە دەگەن ۇلكەن اكەلىك قامقورلىعى بولسا كەرەك. كاسىپورىندى ۇستىمىزدەگى جىلدىڭ مامىر ايىندا ىسكە قوسۋدى كوزدەپ وتىرمىز. ول تولىق قۋاتىندا جۇمىس ىستەگەندە ءسۇت ونىمدەرىنىڭ 12 ءتۇرى شىعارىلادى. جاڭادان 22 جۇمىس ورنى قۇرىلادى. قازىر جىلىنا 63 ميلليون تەڭگەنىڭ تاۋارىن وندىرسەك, جاڭا تسەحتا ول 400 ميلليون تەڭگەگە جەتكىزىلەدى. تەك سالىقتىڭ ەسەبىنەن عانا جەرگىلىكتى بيۋدجەتكە بىزدەن 48 ميلليون تەڭگە اۋدارىلادى. البەتتە, بۇل اۋدان ءۇشىن ۇلكەن قارجىلاي دەمەۋ.
ورىنباسار مەشەلوۆ,
«كاسىپكەر مەشەلوۆ» جەكە كاسىپورنىنىڭ قۇرىلتايشىسى.
جامبىل وبلىسى,
جۋالى اۋدانى.
سۋرەتتەردى تۇسىرگەن
اقادىل رىسماحان.
