جيىنعا ورتالىق مەملەكەتتىك ورگانداردىڭ وكىلدەرى, وبلىستار مەن رەسپۋبليكالىق ماڭىزى بار قالالاردىڭ اكىمدەرى, سونداي-اق «Samruk-Kazyna Construction» اكتسيونەرلىك قوعامىنىڭ باسشىلىعى قاتىستى.
كەڭەستە قۇرىلىس جوبالارىن ىسكە اسىرۋعا باقىلاۋدى كۇشەيتۋ ماسەلەسى تالقىلاندى. بۇل ءىس-شارا مەملەكەت باسشىسىنىڭ قۇرىلىس ساپاسىن ارتتىرۋ, نىسانداردىڭ قاۋىپسىزدىگىن قامتاماسىز ەتۋ جانە بيۋدجەت قاراجاتىنىڭ ءتيىمدى جۇمسالۋىن قاداعالاۋ جونىندەگى تاپسىرمالارىن ورىنداۋ اياسىندا قولعا الىندى.
جيىندا ونەركاسىپ جانە قۇرىلىس مينيسترلىگىنىڭ 2024–2025 جىلدارى پايدالانۋعا بەرىلگەن نىساندارعا جۇرگىزگەن مونيتورينگ قورىتىندىسى تىڭدالدى. ۆەدومستۆو دەرەگىنە سايكەس, باقىلاۋ جۇمىسى 1 032 نىساندى قامتىعان. ونىڭ ىشىندە 725 الەۋمەتتىك ينفراقۇرىلىم نىسانى, 230 تۇرعىن ءۇي قۇرىلىسى مەن اباتتاندىرۋ جوباسى, سونداي-اق 77 ينجەنەرلىك, كولىكتىك, اكىمشىلىك جانە وزگە دە ينفراقۇرىلىمدىق نىسان بار.
مونيتورينگ بارىسىندا بىرقاتار وڭىردە قۇرىلىس-مونتاجداۋ ساپاسىنا, قۇرىلىس باقىلاۋىن ۇيىمداستىرۋعا قاتىستى كەمشىلىكتەر انىقتالعان. اسىرەسە «Samruk-Kazyna Construction» اكتسيونەرلىك قوعامى وپەراتور بولىپ سانالاتىن «كەلەشەك مەكتەپتەرى» ۇلتتىق جوباسى اياسىندا سالىنعان نىساندارعا ەرەكشە نازار اۋدارىلدى.
نۇرلىبەك نالىباەۆ قۇرىلىس ساپاسىنا قاتىستى ماسەلەدە كوزبوياۋشىلىققا جول بەرىلمەيتىنىن قاداپ ايتتى. ونىڭ سوزىنشە, ساپا تالاپتارى جوبالاۋ كەزەڭىنەن باستاپ نىساندى پايدالانۋعا قابىلداۋعا دەيىنگى بارلىق ساتىدا قاتاڭ ساقتالۋعا ءتيىس. بۇل قاتاردا قۇرىلىس-مونتاجداۋ, تەحنيكالىق جانە اۆتورلىق قاداعالاۋ, كەپىلدىك مىندەتتەمەلەرىن ورىنداۋ سەكىلدى باعىتتار بار
كەڭەستە تۇرعىن ۇيلەردىڭ, الەۋمەتتىك نىسانداردىڭ, ينجەنەرلىك-كوممۋنالدىق ينفراقۇرىلىمنىڭ, اۆتوموبيل جولدارىنىڭ, اباتتاندىرۋ جوبالارىنىڭ, اۋلا اۋماقتارىنىڭ, سىرتقى جارىقتاندىرۋ جۇيەلەرىنىڭ, تەمىرجول ۆوكزالدارى مەن اۆتوۆوكزالداردىڭ قۇرىلىسىنا باقىلاۋدى كۇشەيتۋ قاجەتتىگى اتاپ ءوتىلدى.
سونداي-اق انىقتالعان بارلىق كەمشىلىك مەردىگەر ۇيىمداردىڭ ءوز قاراجاتى ەسەبىنەن, كەپىلدىك مىندەتتەمەلەرى شەڭبەرىندە جويىلۋعا ءتيىس ەكەنى باسا ايتىلدى. بۇل جۇمىسقا قوسىمشا بيۋدجەت قاراجاتى تارتىلمايدى. وسىعان بايلانىستى كەڭەستە قۇرىلىس باقىلاۋىن كۇشەيتۋ, تاپسىرىس بەرۋشىلەردىڭ, مەردىگەر ۇيىمداردىڭ, تەحنيكالىق جانە اۆتورلىق قاداعالاۋ قۇرىلىمدارىنىڭ جاۋاپكەرشىلىگىن ارتتىرۋ ماسەلەسى تالقىلاندى.
جيىن بارىسىندا تۇرعىن ءۇيدى مۇقتاج ازاماتتار اراسىندا ءبولۋ ماسەلەسى دە ءسوز بولدى. سونىمەن قاتار جول قۇرىلىسى سالاسىن بيتۋممەن قامتاماسىز ەتۋ جايى قارالدى. قاتىسۋشىلار اكىمدىكتەردىڭ, ۋاكىلەتتى مەملەكەتتىك ورگاندار مەن جاۋاپتى ۇيىمداردىڭ ءوزارا ۇيلەسىمدى جۇمىسىن كۇشەيتۋ قاجەتتىگىن اتاپ ءوتتى. بۇل تۇرعىن ءۇيدى ۋاقتىلى تاپسىرۋعا, بيتۋمعا دەگەن قاجەتتىلىكتى الدىن الا جوسپارلاۋعا ءارى جول-قۇرىلىس ماۋسىمىن تۇراقتى وتكىزۋگە مۇمكىندىك بەرەدى.
كەڭەس قورىتىندىسىندا پرەمەر-ءمينيستردىڭ ءبىرىنشى ورىنباسارى قۇرىلىس پروتسەسىنە قاتىساتىن بارلىق تاراپتىڭ دەربەس جاۋاپكەرشىلىگىن ارتتىرۋ جونىندە بىرقاتار تاپسىرما بەردى. سونىمەن بىرگە فورمالدى باقىلاۋدان باس تارتىپ, بۇزۋشىلىقتاردىڭ الدىن الۋعا باعىتتالعان جۇيەلى جۇمىسقا كوشۋ قاجەتتىگىن ەسكە سالدى.
