ورالدا ادامداردى قاعىپ كەتىپ, بوي تاسالاعان جۇرگىزۋشىلەر ۇستالدى

ورال. 27 ماۋسىم. ورال قالاسىندا 25 ماۋسىم كۇنى ءۇش اۆتوكولىك ءۇش ادامدى قاعىپ كەتىپ, بوي تاسالادى. بۇل تۋرالى باتىس قازاقستان وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان «قازاقپارات» حابارلادى. اتالعان دەپارتامەنتتىڭ اكىمشىلىك پوليتسياسى باسقارماسىنىڭ اعا ينسپەكتورى نۇرتاي لەزوۆتىڭ حابارلاعانىنداي, قاعىلعانداردىڭ ەكەۋى – بالا. شامامەن 13 ساعات 50 مينۋتتا «حيۋنداي» اۆتوكولىگىنىڭ جۇرگىزۋشىسى قۇرمانعازى مەن تەمىر ماسين كوشەلەرىنىڭ قيىلىسىندا جاياۋ جۇرگىنشىلەر وتەتىن جەردەن 1986 جىلعى ك. دەگەن ازاماتتى قاعىپ, وقيعا ورنىنان تايىپ تۇرعان. وڭ جاق جامباسىنان جاراقاتتانعان جۇرگىنشى وبلىستىق اۋرۋحانانىڭ جاراقات بولىمىنە قارالۋعا ءماجبۇر بولدى. سودان كەيىن ساعات 18:30-دا بەلگىسىز جۇرگىزۋشى «مازدا» كولىگىمەن قوناەۆ اتىنداعى شاعىن اۋداندا پ. دەگەن 2007 جىلعى بالانى قاعىپ, وقيعا ورنىنان بوي تاسالاعان. بەتىنەن جاراقات العان ءجاسوسپىرىم دە اتالعان اۋرۋحانا كومەگىنە جۇگىندى. ءۇشىنشى وقيعا ساعات 20:40-تا ورىن الدى. «لادا» ماركالى كولىكتىڭ جۇرگىزۋشىسى زاۆوكزالنىي تۋپيك كوشەسى بويىنداعى 25/1 ءۇيدىڭ اۋلاسىندا م. دەگەن 2005 جىلعى جەتكىنشەكتى قاعىپ, ول دا بوي تاسالاعان. سول جاق يىعى مەن تىزەسىنەن جاراقات العان بالا جاراقات بولىمىنە ءتۇستى. جەدەل ىزدەستىرۋ شارالارى بارىسىندا جول-كولىك وقيعاسىنا كىنالىلەر تەز انىقتالدى. اتاپ ايتقاندا, «حيۋنداي-اكتسەنتتىڭ» جۇرگىزۋشىسى 1981 جىلعى گ., «مازدا-626» كولىگىن جۇرگىزگەن 1992 جىلعى ۋ., «لادا-21703» كولىگىنە وتىرعان 1988 جىلعى ز. ەسىمدى ازاماتتار بولىپ شىقتى. ەندى ولارعا قاتىستى ءتيىستى شارالار قولدانىلاتىن بولادى. تەمىر قۇسايىن. دەرەك, سۋرەت: «قازاقپارات».