كەشە «استانا ەكسپو-2017» ۇلتتىق كومپانياسى مەن «ەير استانا» اق ءوزارا ىنتىماقتاستىق جونىندەگى مەموراندۋم جاساستى. وسى مەموراندۋم اياسىندا «ەير استانا» كومپانياسىنىڭ اۋە كەمەلەرى ەكسپو-2017 كورمەسىنىڭ رەسمي اۋە تاسىمالداۋشىسى» دەگەن ەكسكليۋزيۆتى مارتەبەگە يە بولدى.
مەموراندۋمعا قول قويۋ ءراسىمىنە ارنالعان سالتاناتتى وتىرىستى «استانا ەكسپو-2017» ۇك باسقارما توراعاسى احمەتجان ەسىموۆ اشىپ, جينالعانداردى ەكى كومپانيا اراسىنداعى ىنتىماقتاستىق بايلانىستىڭ ودان ءارى نىعايۋىمەن قۇتتىقتادى. «ەلباسى «استانا ەكسپو-2017» كومپانياسىنا ەلىمىزدەگى بارلىق ۇلتتىق كومپانيالارمەن تىعىز بايلانىستا جۇمىس ىستەۋى تۋرالى كەشەندى مىندەت قويدى. وسىعان بايلانىستى ءبىز بارلىق ۇلتتىق كومپانيالارمەن ورتاق ماقسات جولىندا تىعىز ىنتىماقتاستىق بايلانىسقا شىقتىق. «ەير استانا» قازاقستانداعى ەڭ ءىرى اۋە تاسىمالداۋشىسى بولىپ تابىلادى. بۇگىنگى مەموراندۋم – ءبىزدىڭ بۇل كومپانيامەن ىنتىماقتاستىق اياسىندا جاساعان العاشقى شارامىز. اۋە كومپانياسىنىڭ كومەگىمەن ءبىز ەكسپو-2017 سىندى ءىرى ۇلتتىق جوبانى بۇكىل الەمدە ىلگەرىلەتۋگە مۇمكىندىك الامىز», – دەدى احمەتجان ەسىموۆ ءوزىنىڭ كىرىسپە سوزىندە.
«ءبىز «ەير استانا» ۇشاقتارىنىڭ بورتتارىندا «ەكسپو-2017» لوگوتيپىن ورنالاستىرىپ, اۋە كومپانياسىنىڭ باسشىلىعىمەن حالىقارالىق كورمەنى ناسيحاتتاۋعا ارنالعان بىرلەسكەن جوسپارىمىزدى ازىرلەدىك. ەكى كومپانيا اراسىنداعى بۇل ىنتىماقتاستىق استانادا وتەتىن ەكسپو-2017 كورمەسىنىڭ حالىقارالىق ساحناداعى يميدجىنە جەمىستى ىقپال ەتەدى. سونىمەن بىرگە, وسى ىنتىماقتاستىق اياسىندا «ەير استانا» كومپانياسىنىڭ اۋە كەمەلەرىمەن قازاقستانعا كەلگەن تۇلعالارعا جانە اۋە كومپانياسىنىڭ ترانزيتتىك جولاۋشىلارىنا 2017 جىلعى كورمەگە تەگىن بيلەتتەر ۇسىنىلاتىن بولادى», – دەپ اتاپ كورسەتتى ءوز سوزىندە «استانا ەكسپو-2017» ۇك باسقارما توراعاسى.
ءوز كەزەگىندە «ەير استانا» كومپانياسىنىڭ پرەزيدەنتى پيتەر فوستەر «استانا ەكسپو-2017» ۇك-پەن جاسالىپ وتىرعان بۇل ىنتىماقتاستىق مەموراندۋمى اۋە تاسىمالداۋشىسىنىڭ حالىقارالىق الاڭدا بەدەلىنىڭ ارتۋىنا ىقپال ەتەتىندىگىن اتاپ كورسەتتى. «الداعى ەكسپو-2017 كورمەسىنىڭ باستى تاقىرىبى «بولاشاقتىڭ ەنەرگياسى» بولعاندىقتان, ەنەرگەتيكا سالاسىنداعى يننوۆاتسيالىق شەشىمدەرگە جانە بۇل جوبالاردىڭ قورشاعان ورتاعا تيگىزەتىن اسەرىنە باستى نازار اۋدارىلاتىن بولادى. ءبىزدىڭ كومپانيادا قورشاعان ورتانى بارىنشا قورعاۋعا مۇمكىندىك بەرەتىن زاماناۋي تەحنولوگيالاردى ەنگىزۋگە باعىتتالعان كەشەندى شارالار قابىلدانۋدا. ءدال وسى سەبەپتى ءبىز جاقىندا پاريجدە وتكەن كورمەدە NEO توبىنا جاتاتىن Airbus ا320 ۇشاعىن ساتىپ الۋعا نيەتتى ەكەنىمىزدى مالىمدەدىك. بۇل ۇشاقتاردىڭ قوزعالتقىشى اۋاعا شىعارىلاتىن زياندى زاتتاردىڭ مولشەرىن 15 پايىزعا دەيىن تومەندەتۋگە مۇمكىندىك بەرەدى. ءبىزدىڭ كومپانيامىزدا NEO لاينەرلەرىن ەنگىزۋ 2016 جىلى باستالادى. جاھاندىق اۋقىمدا ەرەكشە ماڭىزدى وقيعالاردىڭ ءبىرى رەتىندەگى ەكسپو-2017 كورمەسىنە دايىندىق قىزۋ قارقىنمەن جۇرگىزىلۋدە. استاناداعى ەكسپو-2017 كورمەسىنە كەلەتىن قوناقتارعا «ەير استانا» اۋە قاقپاسىنىڭ ايقارا اشىلار ءساتىن اسىعا كۇتۋدەمىز», – دەدى پيتەر فوستەر.
سالتاناتتى راسىمدە «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ جانە «ەير استانا» اۋە كومپانياسىنىڭ پرەزيدەنتى پيتەر فوستەر ەكى كومپانيا اراسىنداعى ىنتىماقتاستىق مەموراندۋمىنا قول قويدى. وسى مەموراندۋم اياسىندا expo2017astana.com ۆەب-سايتىندا اۆتوماتتاندىرىلعان برونداۋ جۇيەسىن ەنگىزۋ جانە ەكى كومپانيا بىرلەسىپ PR-ناۋقاندى وتكىزۋ ماسەلەلەرىن بەلگىلەۋ جوسپارلانىپ وتىر.
جىلقىباي جاعىپار ۇلى,
«ەگەمەن قازاقستان».
