باس گازەتتىڭ باسشىسى جاستارمەن كەزدەستى

استانا. 27 ناۋرىز. استانادا جۋرناليستيكا سالاسىنا قىزىعۋشىلىق تانىتقان مەكتەپ وقۋشىلارى اراسىندا ءحى حالىقارالىق مەديا فەستيۆال وتۋدە. سونىڭ اياسىندا بۇگىن فەستيۆالعا قاتىسۋشىلار «ەگەمەن قازاقستان» رەسپۋبليكالىق گازەتى اق-نىڭ پرەزيدەنتى ساۋىتبەك ابدراحمانوۆپەن كەزدەستى. بۇل تۋرالى egemen.kz حابارلادى. كەزدەسۋ «ەگەمەن قازاقستان» گازەتى رەداكتسياسىنىڭ ءماجىلىس زالىندا ءوتتى. شارا بارىسىندا ساۋىتبەك ابدراحمان ۇلى وقۋشىلارعا جۋرناليستيكانىڭ قىر-سىرى مەن ەلىمىزدەگى باس گازەتتىڭ تاريحى جايىندا اڭگىمەلەپ بەردى. ءسوز باسىندا گازەت باسشىسى: «جۋرناليستيكا – ەلدىڭ الدىنا شىعىپ ءسوز سويلەۋگە, كەز كەلگەن قۇبىلىستى وزىنشە باعالاۋعا قۇقىق بەرەتىن ماماندىق. بۇل سالانىڭ وزگەلەردەن باستى ارتىقشىلىعى وسى», – دەدى. سونىمەن قاتار وقۋشىلار جۋرناليستيكانىڭ قادىر-قاسيەتى, نەگىزگى فۋنكتسياسى جانە بولاشاقتاعى ءرولى تۋرالى كوپ جايعا قانىق بولدى. بۇل جونىندە باسىلىم باسشىسى: «جۋرناليستيكانىڭ نەگىزگى قادىر-قاسيەتى – ول ومىرگە ءتۇرلى-ءتۇستى رەڭ بەرەدى. ءبىر جازىلعان ماقالا ەكىنشى رەت قايتا جازىلمايدى. ال كوپتەگەن ماماندىقتا ءبىر ءىستىڭ بىرنەشە رەت قايتالاناتىنىن بىلەمىز. وسىعان قاراپ جۋرناليستيكانىڭ قۇنى وزگە سالادان قانشالىقتى جوعارى ەكەنىن كورۋگە بولادى», – دەدى. اقپارات قۇرالدارىنىڭ اتقارىپ وتىرعان باستى قىزمەتى جايىندا: «جۋرناليستيكانىڭ نەگىزگى فۋنكتسياسى – قوعامدىق پىكىرگە ىقپال ەتۋ ارقىلى ادامداردىڭ كوزقاراسىن قالىپتاستىرۋ. ال بولاشاقتا جۋرناليستەرگە جۇكتەلەتىن جاۋاپكەرشىلىك بۇگىنگىدەن دە اۋىر بولاتىنى اقيقات. بۇل – زامان تالابى», – دەگەن ساۋىتبەك ابدراحمانوۆ جاس جەتكىنشەكتەرگە شەت تىلدەرىن ەركىن مەڭگەرۋ كەرەك ەكەنىن ايتتى. سونداي-اق, كىتاپ جانە گازەت-جۋرنال وقۋ ماسەلەسىنە توقتالعان ول «ەگەمەن قازاقستان» گازەتىنىڭ تاريحىن دا نازاردان تىس قالدىرمادى. «وتكەن جىلدىڭ سوڭىندا گازەتىمىزگە 95 جىل تولدى. بۇل جەردە ساكەن سەيفۋللين, بەيىمبەت مايلين, جۇسىپبەك ايماۋىتوۆ سىندى ۇلتتىڭ ۇلاعاتتى تۇعالارى قىزمەت ىستەگەن. قازىر وتىرعان رەداكتسيامىزدى 2009 جىلى ەلباسىمىز ءوزى كەلىپ اشىپ بەردى. بۇگىندە پرەزيدەنتىمىزدىڭ تىكەلەي قامقورلىعىمەن جارىق كورىپ وتىرعان گازەتتىڭ تيراجى 200 مىڭنان اسادى», – دەپ, باس باسىلىمنىڭ بۇگىنگى تىنىس-تىرشىلىگىنەن حابار بەردى. كەزدەسۋ سوڭى ەركىن اڭگىمەگە ۇلاسىپ, وقۋشىلار وزدەرىن قىزىقتىرعان ساۋالدارعا جاۋاپ الدى. ءوز كەزەگىندە, وقۋشىلاردى باستاپ كەلگەن «جۇلدىز بالالار وداعى» قوعامدىق ۇيىمىنىڭ اتقارۋشى ديرەكتورى جاننا ابىلحاەۆا ماعىنالى كەزدەسۋ ءۇشىن گازەت باسشىسىنا العىسىن جەتكىزدى. ەلامان قوڭىر. دەرەك: egemen.kz. سۋرەت: ەرلان وماروۆ.