گۇلنار كاريموۆانىڭ زاڭسىز ارەكەتتەرى اشكەرەلەندى

استانا. 27 ناۋرىز. وزبەكستان پرەزيدەنتىنىڭ قىزى گۇلنار كاريموۆا ەلدىڭ ۇيالى بايلانىس سالاسىنداعى حالىقارالىق كومپانيالاردان كۇدىكتى جولمەن اقشا الىپ وتىرعان. بۇل تۋرالى minval.az حابارلادى. حابارلامادا كورسەتىلگەندەي, گۇلنار كاريموۆا وزبەكستاندا بۇرىن جۇمىس ىستەگەن جانە قازىر قىزمەت كورسەتىپ جاتقان حالىقارالىق ۇيالى بايلانىس كومپانيالارىنان 1 ملرد. اقش دوللارىن زاڭسىز العان كورىنەدى. گ.كاريموۆانىڭ ىسىنە قاتىستى ءۇش جىلعا سوزىلعان زەرتتەۋ جۇمىسىنىڭ ەسەبىن OCCRP (كوررۋپتسيالىق جانە ۇيىمداسقان قىلمىستاردى زەرتتەۋ ۇيىمى) ورتالىعىنىڭ جەتەكشى ساراپشىسى ميراندا پاترۋچيچ نورۆەگيانىڭ تونسبەرگ قالاسىندا جينالعان جۇزدەگەن ءجۋرناليستىڭ الدىندا جاريالاعان. ساراپشىلاردىڭ سوزىنە قاراعاندا, گۇلنار كاريموۆانىڭ رەسەيلىك جانە سكانديناۆيالىق كومپانيالاردان ءوز سىبايلاستارى ارقىلى 1 ملرد.-تان استام اقش دوللارىن العانىن راستاپ بەرەتىن قۇجاتتار تابىلعان. زەرتتەۋشىلەر ولاردى مۇقيات تەكسەرىپ شىققان. زەرتتەۋ ناتيجەلەرى كورسەتىپ بەرگەندەي, پرەزيدەنتتىڭ قىزى ءوزىنىڭ ايتقانىنا كونبەگەن شەتەلدىك كومپانيالاردى «جاپتىرىپ تاستايمىن» دەپ, مەملەكەتتىك قۇزىرلى ورىندار ارقىلى قورقىتىپ وتىرعان. ول سونداي-اق, الگى قۇرىلىمداردىڭ تابىسىنان ۇلەس الۋ ماقساتىندا ءۇزىلدى-كەسىلدى ءارى اقىلعا سىيىمسىز تالاپتار قويعان. دالىرەگى, ول ادەتتە ۇيالى بايلانىس سالاسىنداعى ءىرى كومپانيالاردان تابىستارىنىڭ 26 پايىزىن بەرۋدى تالاپ ەتكەن. وسىنداي قىسىمنان COSCOM كومپانياسى وزبەكستاننىڭ ۇيالى بايلانىس نارىعىن تاستاپ شىققان. ميراندا پاترۋچيچ: «ءبىزدىڭ قولىمىزداعى قۇجاتتار ونىڭ تىم اشكوز ەكەنىن ءارى كوررۋپتسيالىق ارەكەتتەرى مۇلدە تەرەڭدەپ كەتكەنىن كورسەتتى», – دەيدى. تاعى ءبىر ايتا كەتەر جايت, ۇيالى بايلانىس وپەراتورلارى وزبەكستاندا 3G ليتسەنزياسىن قيىندىقسىز الۋ ءۇشىن جانە وپتيكالىق كابەل مەن WiMAX جانە WiFi جەلىلەرىن تارتۋعا رۇقسات الۋ ءۇشىن گۇلنار كاريموۆانىڭ ەسەپ-شوتتارىنا كۇدىكتى تولەمدەر ارقىلى جۇزدەگەن ملن. دوللار اۋدارعان. قازىرگى تاڭدا شۆەيتساريادا ونىڭ يەلىگىندە دەپ سانالعان Takiland ltd كومپانياسىنىڭ 800 ملن. دوللارى مەن شۆەتسياداعى 30 ملن.-نان استام اقش دوللارى بۇعاتتالعان. ايتا كەتەيىك, وزبەكستان باس پروكۋراتۋراسىنىڭ سوڭعى دەرەگىنە سايكەس, گۇلنار كاريموۆا ءۇي قاماعىندا وتىر. جولدىباي بازار. دەرەك, سۋرەت: minval.az.