تاجىكستاندا ورتا ازياداعى ەڭ ۇلكەن تەاتر سالىنادى

استانا. 27 ناۋرىز. تاجىكستاندا ۇلتتىق تەاتردىڭ قۇرىلىسى باستالدى. ەل پرەزيدەنتى ەمومالي راحمونوۆ العاشقى ىرگەتاسىن قالاعان مادەني وشاق ورتا ازياداعى ەڭ ۇلكەن تەاتر بولادى دەپ كۇتىلۋدە. بۇل تۋرالى news-asia.ru حابارلادى. پرەزيدەنتتىڭ ءباسپاسوز قىزمەتى تاراتقان مالىمەتتە تەاتر دۋشانبەدەگى ۇلتتىق مۋزەيدىڭ قاسىنا سالىناتىنى ايتىلعان. بيىكتىگى 34,5 مەتردى قۇرايتىن جاڭا نىسان 5 قاباتتان تۇرادى. ودان بولەك, تاعى ەكى جەراستى قاباتى بار. كورەرمەندەرگە ارنالعان ءۇش زال بولماق. ەڭ ۇلكەنى 2 500 ادامعا ارنالعان. ال قالعان ەكەۋى 1 200 جانە 1 000 ورىندىق. تەاتردىڭ تەحنيكالىق جابدىقتارى الەمدىك ستاندارتتارعا تولىق جاۋاپ بەرەدى. عيماراتتىڭ جوعارعى قاباتتارىندا كورمە جانە قولونەر بۇيىمدارىنا ارنالعان زالدار مەن دايىندىق بولمەلەرى ورنالاسادى. جەراستى قاباتىندا 250 ورىندىق اۆتوتۇراق پەن تەحنيكالىق جايلار بولادى. ۇلتتىق تەاتردىڭ جوباسى 5 جىل بويى دايىندالعان. وسى ۋاقىت ارالىعىندا تاجىك ساۋلەتشىلەرى الەمدەگى ەڭ تانىمال تەاترلاردىڭ ديزاينىمەن تانىسىپ, زەرتتەۋ جۇمىستارىن جۇرگىزگەن. وسىعان قاراپ ساراپشىلار جاڭا تەاتر ورتا ازياداعى تەڭدەسى جوق مادەني نىسان بولادى دەپ باعا بەرۋدە. الايدا, بۇل جاڭالىققا تاجىكستان حالقى اسا قاتتى قۋانا قويعان جوق. ءتىپتى كەيبىر تاۋەلسىز جۋرناليستەر ەلدىڭ وسىنشالىقتى استا-توك قۇرىلىس جۇرگىزەتىندەي ءجونى جوق ەكەنىن ايتۋدا. ەلدەگى تاۋەلسىز باق وكىلدەرى ۇلتتىق قاۋىمداستىعىنىڭ باسشىسى نۋريددين كارشيباەۆ: «شىنى كەرەك, بۇل حابار كوپتەگەن تاجىكستاندىقتىڭ اشۋ-ىزاسىن تۋدىردى. سەبەبى, بىزدە كۇندەلىكتى ءبىر ءتىلىم نانعا زار بولىپ وتىرعاندار بار. مۇنداي ءىرى تەاترعا ءدال قازىر تاجىك حالقى مۇقتاج ەمەس. ويتكەنى, بۇل ءبىزدىڭ شاما-شارقىمىزعا ساي دۇنيە ەمەس», – دەيدى. سونداي-اق, ول ۇكىمەتتىڭ وسىنداي جۇمىستى قولعا الماستان بۇرىن حالىقتىڭ پىكىرىمەن ساناسۋى كەرەكتىگىن ايتتى. «بيلىك كەز كەلگەن باستامانى قولعا الاردا الدىمەن قاراپايىم حالىققا قولجەتىمدى بولۋىن ويلاۋى كەرەك. ميلليونداعان قارجى جۇمساپ دۋشانبەدە «كوحي ناۆرۋز» اتتى سالتانات سارايىن سالدى. سول جەرگە كىرىپ-شىققان قاراپايىم حالىقتىڭ قاراسىن كورمەيسىز. ەلدىڭ يگىلىگىنە سالىنباعان سوڭ, مۇنداي نىسانداردىڭ قۇنى كوك تيىن. قازىر كورپەگە قاراپ كوسىلەتىن زامان», – دەدى كارشيباەۆ. ەلامان قوڭىر. دەرەك, سۋرەت: news-asia.ru.