استاناعا انگەلا مەركەل كەلەدى

كەشە سىرتقى ىستەر مينيستر­لىگىندە وسى ۆەدومستۆونىڭ رەسمي وكىلى اسقار ابدراحمانوۆ ءداستۇرلى بريفينگ وتكىزدى. وندا... ول اۋەلى 16 جانە 17 شىلدەدە ەۋرو­پا­داعى قاۋىپ­سىزدىك جانە ىنتىماقتاستىق ۇيىمىنىڭ ءىس باسىنداعى ءتور­اعا­سى, قا­زاق­ستاننىڭ مەملەكەتتىك حات­شىسى – سىرت­قى ىستەر مي­نيسترى قانات ساۋداباەۆتىڭ شا­قى­رۋىمەن ۇيىمعا مۇشە 56 مەم­لە­كەت­تىڭ سىرتقى ساياسي ۆەدوم­ستۆو­لارى­نىڭ باس­شى­لارى نەمەسە جو­عارى مارتەبەلى وكىل­دەرى, ۇيىممەن ىنتىماقتاستىق جونىندەگى ارىپتەس 12 مەملەكەت, سونىمەن قوسا ءبىر­قاتار حالىقارالىق ۇيىمداردىڭ لاۋازىم­دى تۇلعالارى الماتىدا وتەتىن بەيرەسمي كەزدەسۋدە جينا­لاتىنىن حابارلادى. اتال­مىش باس­قوسۋ ەلىمىزدىڭ ەۋروپاداعى قاۋىپ­سىزدىك جانە ىنتىماقتاستىق ۇيىمىنا توراعالىق ەتۋ شەڭ­بە­رىندەگى ەڭ ماڭىزدى شا­رالاردىڭ ءبىرى بولىپ تابىلادى. جو­عارى دارەجەلى جينالىستىڭ اشىلۋىندا پرەزيدەنت نۇرسۇلتان نازارباەۆ ءسوز سويلەيدى دەپ كۇتىلۋدە, دەدى ا.ابدراحمانوۆ. رەسمي وكىلدىڭ ايتۋىنشا, بەي­رەس­مي كەزدەسۋ بارىسىندا وعان قاتىسۋشىلار ۇيىم كەڭىستىگىندە ورتاق جانە بولىنبەيتىن قاۋىپ­سىز­دىك­تى نىعايتۋدىڭ كەڭ اۋقىمدى ماسەلەلەرىن تالقىعا سالادى. اتاپ ايتقان­دا, 2009 جىلى گرەكتىڭ كورفۋ ارالىندا وتكەن مينيستر­لەر­دىڭ العاشقى بەيرەسمي كەزدە­سۋى­نىڭ قورىتىندىسى بويىنشا ىسكە قوسىلعان كورفۋ پروتسەسى اياسىندا ەۋروپا مەن ەۋرازيا قاۋىپسىزدىگى جونىندەگى ۇنقا­تىسۋدىڭ العاشقى قورىتىندىلارى سارالا­ناتىن بولادى. جينالىسقا قاتىسۋشىلار, سو­نىمەن قاتار, ەۋروپاداعى قاۋىپ­سىز­دىك جانە ىن­تىماقتاستىق ۇيى­مى­نىڭ جاۋاپكەرشىلىگى تارايتىن كە­ڭىستىكتە جانە ودان تىس اۋماق­تار­دا­عى قاۋىپسىزدىك ماسەلەلەرىن, سونىڭ ىشىندە قىرعىزستان مەن اۋعانستان جاع­داي­ىن جانە حا­لىق­ارالىق قاۋىمداس­تىق­تىڭ اتال­مىش ەلدەردى تۇراقتاندىرۋداعى قىزمەتىنە ۇيىمنىڭ قوسار ۇلەسىن ارتتىرۋ جولدارىن قاراستىرادى. باسقوسۋ بارىسىندا جوسپارلانعان ءسامميتتىڭ كۇن تارتىبىنە ەنۋى ىقتيمال تاقىرىپتاردى انىقتاۋ جۇمىسىنا ەرەكشە كوڭىل بولىنەدى. مينيسترلەردىڭ بەيرەسمي كەز­دە­سۋى كەزىندە سونداي-اق بىرقاتار جاناما شارالار وتكىزۋ جوسپار­لان­عان, دەدى وسى اۋقىمدى شاراعا وراي ا.ابدراحمانوۆ. سونىڭ ءىشىن­دە ەۋروپاداعى قاۋىپسىزدىك جانە ىنتىماقتاستىق ۇيىمى “ۇشتىلىگى­نىڭ” (ياعني, قازاقستان, گرەكيا جانە ليتۆا سىرتقى ىستەر مي­نيستر­لەرىنىڭ), تاۋلى قاراباق جانجالىن بەيبىت جولمەن شەشۋ جولدارىن تالقىلاۋ ماقساتىندا ءازىرباي­جان مەن ارمەنيا سىرتقى ىستەر مينيستر­لەرى­نىڭ (قۇرامىندا رەسەي, فرانتسيا جانە اقش بار), مينسك توبى تەڭ توراعا­لا­رى­نىڭ (قانات ساۋداباەۆتىڭ قاتىسۋىمەن) كەزدەسۋلەرى وتەدى. سونىمەن قاتار, ەۋرو­پاداعى قاۋىپسىزدىك جانە ىن­تىماقتاستىق ۇيىمى ءىس باسىنداعى توراعاسىنىڭ باس­تاماسىمەن ەۋرو-اتلانتيكا جانە ەۋرازيا ايماق­تارى­نىڭ قاۋىپسىزدىگىمەن اينالى­ساتىن جەتى حالىقارالىق ۇيىمنىڭ (ياعني, ەقىۇ, ەۋرووداق, ناتو, ەۋروپا كەڭەسى, تمد, ۇجىمدىق قاۋىپسىزدىك تۋرالى شارت ۇيىمى, ازيا كەڭەسى) باسشىلارى مەن جوعارى لاۋازىمدى وكىلدەرىنىڭ تۇڭعىش باسقوسۋى وتەدى. رەسمي وكىل كەلەسى كەزەكتە 18 شىلدەدە قازاقستان پرەزيدەنتى نۇر­سۇلتان نازار­باەۆ­تىڭ شاقى­رۋى­مەن گەرمانيا فەدە­را­تيۆ­تىك رەسپۋبليكاسىنىڭ فەدەرالدىق كان­تسلەرى انگەلا مەركەلدىڭ استا­ناعا رەسمي ساپارمەن كەلەتىنىن جەتكىزدى. جو­عا­رى دەڭگەيدەگى كەلىسسوزدەر شەڭبەرىندە تاراپتار ساياسي, ساۋدا-ەكونوميكالىق جانە مادەني-گۋمانيتارلىق سالالارداعى قازاق-نەمىس ىنتىماقتاستىعىنىڭ بۇگىنگى احۋالى مەن كەلەشەگىن تالقىلايدى. سونىمەن قاتار, ءبىر­قاتار ەكىجاقتى كەلىسىمدەرگە جانە كوممەرتسيالىق شارتتارعا قول قويۋ, ەكى ەلدىڭ ىسكەر توپتارىنىڭ قاتىسۋىمەن بيزنەس-فورۋم وتكىزۋ جوسپارلانۋدا. ءلايلا ەدىلقىزى.