قارجى پلاتفورماسى
«Finflow» – شاعىن جانە ورتا بيزنەسكە ارنالعان جاساندى ينتەللەكت نەگىزىندەگى قارجى پلاتفورماسى. جوبا كاسىپكەرلەرگە قارجىلىق جوسپارلاۋدى جەڭىلدەتەدى. كوپ جاعدايدا شاعىن كومپانيالاردا تولىققاندى قارجى ديرەكتورى بولمايدى. ال «Finflow» سول قىزمەتتى تسيفرلىق فورماتتا اتقارادى.
پلاتفورما كاسىپكەرگە كومپانيانىڭ قارجىسىن تالداۋعا, تابىس پەن شىعىندى ەسەپتەۋگە, اقشا اينالىمىن بولجاۋعا, قارجىلىق مودەل قۇرۋعا كومەكتەسەدى. مۇنىڭ ءبارىن بىرنەشە مينۋت ىشىندە جاساۋعا بولادى. ياعني كاسىپكەرگە بولەك قارجى مامانىن جالداۋدىڭ قاجەتى جوق.
«Finflow»-دىڭ ەرەكشەلىگى – ول تەك ەسەپ جۇرگىزۋمەن شەكتەلمەيدى. كوپ بۋحگالتەرلىك باعدارلامالار قارجىلىق دەرەكتەردى جيناقتاۋمەن عانا اينالىسادى. ال بۇل پلاتفورما دەرەكتەردى تالداپ, بيزنەسكە قانداي شەشىم قابىلداۋ ءتيىمدى ەكەنىن دە كورسەتەدى.
تاعى ءبىر ماڭىزدى ارتىقشىلىعى – بانكتەرمەن ينتەگراتسيا. پلاتفورما كاسىپكەرگە قارجىلىق قۇجاتتاردى تەز دايىنداپ, بانكتەن نەسيە الۋ ۇدەرىسىن جەڭىلدەتۋگە كومەكتەسەدى.
قازىر «Finflow» جۇيەسىن ەلىمىزدەن بولەك, شەتەلدەگى ونداعان كومپانيا پايدالانىپ وتىر. ستارتاپ بىرنەشە وتاندىق بانكپەن قاناتقاقتى جوبالاردى ىسكە قوسىپ, شاعىن جانە ورتا بيزنەسكە ارنالعان تسيفرلىق قارجىلاندىرۋ شەشىمدەرىن ازىرلەپ جاتىر.
– ءبىز «Finflow»-دى قارجىلىق جوسپارلاۋدى تەك ءىرى كومپانيالاردىڭ ەمەس, كەز كەلگەن كاسىپكەردىڭ قولى جەتەتىن قۇرالعا اينالدىرۋ ماقساتىندا جاساپ جاتىرمىز. كوپتەگەن شاعىن جانە ورتا بيزنەس قارجىسىن جۇيەلى باسقارا الماي, كاسسالىق الشاقتىققا تاپ بولادى, بانك قارجىلاندىرۋىنا قول جەتكىزە الماي جاتادى. سوندىقتان ءبىز كاسىپكەرگە كۇردەلى قارجىلىق تالداۋدى تۇسىنىكتى, جىلدام ءارى قولجەتىمدى ەتۋدى كوزدەيمىز. ياعني «Finflow» – جاي عانا ەسەپ جۇرگىزەتىن پلاتفورما ەمەس, بيزنەسكە دۇرىس شەشىم قابىلداۋعا كومەكتەسەتىن تسيفرلىق قارجى كومەكشىسى, – دەدى جوبا جەتەكشىسى داۋلەت ايتماحانوۆ.
ينۆەستيتسيالىق جۇيە
«Paidax» – ينۆەستيتسيا جاساۋعا ارنالعان ءموبيلدى قوسىمشا. پايدالانۋشى بۇل پلاتفورما ارقىلى باعالى قاعازدارعا قارجى قۇيىپ, وزگە ينۆەستورلاردىڭ پورتفەلىن دە باقىلاي الادى. ياعني جوبا ينۆەستيتسيانى تەك ماماندارعا عانا ەمەس, قاراپايىم ادامعا دا جاقىنداتۋدى كوزدەيدى.
«Paidax»-تى ماتەماتيكالىق مودەلدەر مەن تسيفرلىق تەحنولوگيانى ۇشتاستىرعان جوبا دەۋگە بولادى. ونىڭ نەگىزىن قالاۋشى بەكسۇلتانقوجا ءانۋاروۆ بۇل پلاتفورمانى جاڭا بۋىن ينۆەستورلارىنا ارنالعان جۇيە رەتىندە دامىتىپ كەلەدى. جوبا تەك بروكەرلىك قىزمەت كورسەتۋمەن شەكتەلمەي, ينۆەستيتسيانى تۇسىنىكتى ءارى قولجەتىمدى ەتۋگە ۇمتىلادى.
ء«بىز Paidax ارقىلى ينۆەس-تيتسيانى بارىنشا تۇسىنىكتى ءارى قولجەتىمدى ەتكىمىز كەلەدى. قارجى نارىعى كوپ ادامعا جابىق, كۇردەلى جۇيە سياقتى كورىنەدى. ال ءبىزدىڭ ماقسات – سول مۇمكىندىكتەردى قاراپايىم قولدانۋشىعا جاقىنداتۋ. سونىمەن قاتار پلاتفورمادا ەتيكالىق جانە يسلامدىق قارجى قاعيداتتارىنا ساي كەلەتىن قۇرالداردى دامىتۋعا ءمان بەرىپ وتىرمىز. «Paidax» – جاي عانا بروكەرلىك قوسىمشا ەمەس, ينۆەستيتسيا مادەنيەتىن قالىپتاستىرۋعا باعىتتالعان تسيفرلىق الاڭ», دەدى جوبا جەتەكشىسى.
قازىر قوسىمشاعا 36 مىڭعا جۋىق قولدانۋشى تىركەلگەن. ولاردىڭ باسىم بولىگى – 35 پەن 55 جاس ارالىعىنداعى ينۆەستورلار. پلاتفورماداعى اكتيۆتەردىڭ جالپى كولەمى 10 ميلليون دوللارعا تاياپ وتىر.
كومپانيا الداعى ۋاقىتتا جاساندى ينتەللەكت نەگىزىندە اۆتوماتتى تۇردە ينۆەستيتسيالىق پورتفەل ۇسىنۋ قىزمەتىن دامىتپاق. ياعني پايدالانۋشى ءوز مۇمكىندىگى مەن تاۋەكەل دەڭگەيىن كورسەتسە, جۇيە سوعان ساي ينۆەستيتسيالىق شەشىم ۇسىنادى. وسىلايشا, «Paidax» قارجى تەحنولوگياسىن ينۆەستيتسيا مادەنيەتىمەن ۇشتاستىرعان جوبا رەتىندە تانىلىپ كەلەدى.
تسيفرلىق جوبا
«Investbanq» – ينۆەستيتسيالىق بانكينگ پەن كاپيتالدى باسقارۋعا ارنالعان تسيفرلىق پلاتفورما. جوبا كاسىپكەرلەرگە, ءىرى كاپيتال يەلەرىنە جانە قارجى كەڭەسشىلەرىنە ارنالعان. پلاتفورمانىڭ باستى ماقساتى – پايدالانۋشىلارعا ءوز كاپيتالى مەن ينۆەستيتسياسىن ءتيىمدى باسقارۋعا كومەكتەسەتىن زاماناۋي قۇرالدار ۇسىنۋ.
جۇيە جاساندى ينتەللەكت تەحنولوگيالارىن قولدانا وتىرىپ جۇمىس ىستەيدى. مىسالى, پلاتفورمانىڭ «AI Analyst» قىزمەتى ءتۇرلى دەرەككوزدەردەن الىنعان جاڭالىقتار مەن قارجىلىق اقپاراتتى تالداپ, ينۆەستيتسيالىق شەشىم قابىلداۋعا كومەكتەسەدى. وسى ارقىلى پايدالانۋشىلار نارىقتاعى وزگەرىستەردى جىلدام باقىلاپ, ءوز جوباسىن ءتيىمدى باسقارادى.
«Investbanq» كاپيتالدى باسقارۋعا كەشەندى ءتاسىل ۇسىنادى. پلاتفورما اكتسيالار, وبليگاتسيالار, بالامالى ينۆەستيتسيالىق قۇرالدار سياقتى ءتۇرلى اكتيۆتەردى ءبىر جۇيەدە بىرىكتىرەدى. ياعني پايدالانۋشى بارلىق ينۆەستيتسياسىن ءبىر جەردەن باقىلاي الادى.
پلاتفورمانىڭ تاعى ءبىر ەرەكشەلىگى – جاساندى ينتەللەكت نەگىزىندەگى ينۆەستيتسيالىق پورتفەل قۇراستىرۋ جۇيەسى. ول نارىق دەرەكتەرىن تالداپ, ينۆەستورعا وڭتايلى ستراتەگيا ۇسىنادى.
كومپانيانىڭ كەڭسەلەرى سينگاپۋر, دۋباي جانە الماتى قالالارىندا ورنالاسقان. مۇنداي حالىقارالىق قۇرىلىم «Investbanq»-قا الەمدەگى ءىرى قارجى نارىقتارىمەن جۇمىس ىستەۋگە مۇمكىندىك بەرەدى. پلاتفورما سينگاپۋردىڭ اقشا-كرەديت باسقارماسى (MAS) سياقتى قاتاڭ رەتتەۋشى ورگانداردىڭ تالاپتارىنا سايكەس قىزمەت ەتەدى.
كومپانيا وكىلدەرىنىڭ ايتۋىنشا, ولاردىڭ ماقساتى – كاپيتالدى باسقارۋ سالاسىن بۇرىنعىدان دا اشىق ءارى قولجەتىمدى ەتۋ. ياعني كۇردەلى ينۆەستيتسيالىق قىزمەتتەردى تەك ءىرى قارجى ينستيتۋتتارىنا عانا ەمەس, زاماناۋي تەحنولوگيا ارقىلى كەڭ اۋديتورياعا ۇسىنۋ.
ء«بىزدىڭ ماقسات – كاپيتالدى باسقارۋ ۇدەرىسىن بارىنشا اشىق ءارى تۇسىنىكتى ەتۋ. ينۆەستورلار ءوز قارجىسىن باسقارۋ ءۇشىن كۇردەلى جۇيەلەرگە تاۋەلدى بولماۋى كەرەك. سوندىقتان ءبىز جاساندى ينتەللەكت پەن تسيفرلىق تەحنولوگيالاردى پايدالانىپ, ينۆەستيتسيالىق بانكينگتى جاڭا دەڭگەيگە شىعارۋعا تىرىسىپ وتىرمىز», دەيدى جوبا جەتەكشىسى ولجاس جيەنقۇل.
ساراپشىلاردىڭ پىكىرىنشە, فينتەح يندۋسترياسى الداعى جىلدارى ودان ءارى قارقىن الماق. جاساندى ينتەللەكت, دەرەكتەر جۇيەسى جانە تسيفرلىق پلاتفورمالار قارجى قىزمەتىنىڭ سيپاتىن تۇبەگەيلى وزگەرتتى. ەلىمىزدەگى «Finflow», «Paidax» جانە «Investbanq» سەكىلدى جوبالار وسى وزگەرىستىڭ جەرگىلىكتى نارىقتاعى العاشقى مىسالدارىنىڭ ءبىرى بولىپ وتىر.
